ବୌଦ୍ଧ,୧୮/୦୮: ଡୁଙ୍ଗୁରିପାଲି ଛକରେ ମର୍ମନ୍ତୁଦ ସଡ଼କ ଦୁର୍ଘଟଣା । ବାଇକ୍କୁ ଧକ୍କା ଦେଇ ଫେରାର ହେଲା ନାଇଟ କୋଚ ବସ । ଘଟଣା ସ୍ଥଳରେ ମହିଳା ମୃତ ଏବଂ ବାଇକ୍ ଚାଳକ ଗୁରୁତର । ବୌଦ୍ଧ ଜିଲ୍ଲା ବାଉଁସୁଣି ଥାନା ଡୁଙ୍ଗୁରିପାଲି ଛକରେ ଏଭଳି ଘଟଣା ଘଟିଛି । ମୃତ ମହିଳା ଜଣକ ମୁଣ୍ଡିପଦର ଗ୍ରାମର ବିଶାଖା ଭୋଇ ବୋଲି ଜଣା ପଡିଛି ।
ସୂଚନା ଅନୁଯାୟୀ, ବିଶାଖାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କର ଜଣେ ସମ୍ପର୍କୀୟ ତାଙ୍କୁ ନେଇ ବାଉଁଶୁଣି ମେଡିକାଲ ଆସିଥିଲେ । ସେଠାରେ ମହିଳା ଜଣକ ନିଜର ଚିକିତ୍ସା କରାଇଥିଲେ । ତେବେ ଶନିବାର ବିଳମ୍ବିତ ରାତିରେ ସେ ମେଡିକାଲରୁ ଚିକିତ୍ସା କରାଇ ତାଙ୍କ ସମ୍ପର୍କୀୟଙ୍କ ସହିତ ବାଇକ୍ ଯୋଗେ ଘରକୁ ଫେରୁଇବା ବେଳେ ଏହି ଦୁର୍ଘଟଣା ହୋଇଥିଲା । ଭୁବନେଶ୍ୱରରୁ ବଲାଙ୍ଗୀରକୁ ଯାଉଥିବା ଏକ ନାଇଟ କୋଚ ବସ୍ ବାଇକ୍କୁ ପଛପଟୁ ଧକ୍କା ଦେଇ ଘଟଣା ସ୍ଥଳରୁ ଛୁ ମାରିଥିଲା । ଫଳରେ ଘଟଣା ସ୍ଥଳରେ ହିଁ ପ୍ରାଣ ହରାଇଥିଲେ ବିଶାଖା । ଏଥି ସହିତ ତାଙ୍କ ସମ୍ପର୍କୀୟ ଗୁରୁତର ଆହତ ହୋଇଥିଲେ ।
ଅନ୍ୟପଟେ ସ୍ଥାନୀୟ ଅଞ୍ଚଳର ଉତ୍ୟକ୍ତ ଲୋକେ ରାସ୍ତାରେ ଶବ ରଖି ୫୭ ନମ୍ୱର ଜାତୀୟ ରାଜପଥ ଅବରୋଧ କରିଛନ୍ତି । ଫଳରେ ରାସ୍ତାର ଉଭୟ ପାର୍ଶ୍ୱରେ ଯାନବାହାନ ଅଟକି ରହିଛି । ପରେ ଘଟଣା ସ୍ଥଳରେ ଉତ୍ତେଜନା ପରିସ୍ଥିତି ମଧ୍ୟ ଦେଖିବାକୁ ମିଳିଛି । ଏନେଇ ଖବର ପାଇବା ପରେ ପୋଲିସ ପହଞ୍ଚି ଗ୍ରାମବାସୀଙ୍କୁ ବୁଝାସୁଝା କରିବା ସହ ତଦନ୍ତ ଜାରି ରଖିଛି ।
