କୋରାପୁଟ,୧୭/୦୮: କାର୍ଯ୍ୟରତ ମହିଳା ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ଘଟଣା ପ୍ରତିବାଦରେ କାର୍ଯ୍ୟ ବନ୍ଦ ଆନ୍ଦୋଳନ । କୋରାପୁଟର ସହୀଦ ଲକ୍ଷ୍ମଣ ନାୟକ ମେଡିକାଲ କଲେଜର ଡାକ୍ତରୀ ଛାତ୍ର ଓ ହସ୍ପିଟାଲରେ ହାଉସ ସର୍ଜନ ଡାକ୍ତରମାନେ କାର୍ଯ୍ୟ ବନ୍ଦ କରି ଆନ୍ଦୋଳନ କରିଛନ୍ତି । କେବଳ ଜରୁରୀ କାଳୀନ ସେବାକୁ ଛାଡ଼ି ଅନ୍ୟ ସମସ୍ତ ମେଡିକାଲ ସେବା ବନ୍ଦ ରହିଛି । 

ସୂଚନା ଅନୁଯାୟୀ, କୋଲକାତାରେ କାର୍ଯ୍ୟରତ ମହିଳା ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ଘଟଣାରେ ଉତ୍ୟକ୍ତ ହୋଇଉଠିଛି ସାରା ଦେଶ । ଏଭଳି ସ୍ଥିତିରେ ସହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଡାକ୍ତରୀ ଛାତ୍ର ଓ ହସ୍ପିଟାଲରେ ହାଉସ ସର୍ଜନ ଡାକ୍ତରମାନେ ଆନ୍ଦୋଳନର ସ୍ୱର ଉତ୍ତୋଳନ କରିଛନ୍ତି । ନିଜର କାମ ବନ୍ଦ କରି ଦେଶବ୍ୟପି ଆନ୍ଦୋଳନରେ ସାମିଲ ହୋଇଛନ୍ତି । ଏହି ଆନ୍ଦୋଳନରେ କେବଳ ଜରୁରୀ କାଳୀନ ସେବାକୁ ଛାଡ଼ି ଅନ୍ୟ ସମସ୍ତ ମେଡିକାଲ ସେବା କୋରାପୁଟ ମେଡିକାଲ କଲେଜରେ ବନ୍ଦ ରହିଛି । ଫଳରେ ରୋଗୀ ସେବା ବ୍ୟାହତ ହୋଇଥିବା ଦେଖିବାକୁ ମିଳୁଛି । ମହିଳା ଡ଼ାକ୍ତରଙ୍କ ସୁରକ୍ଷା ବିନା କାର୍ଯ୍ୟ କରିବେ ନାହିଁ ବୋଲି ଡାକ୍ତରମାନେ କହିଛନ୍ତି । ଏଥି ସହିତ ମହିଳା ଡ଼ାକ୍ତରଙ୍କ ସୁରକ୍ଷା ଉପରେ ଦୃଷ୍ଟି ଦେବାକୁ ମଧ୍ୟ ରାଜ୍ୟ ସରକାରଙ୍କୁ ନିବେଦନ କରିଛନ୍ତି ।  ଜଣେ ଡ଼ାକ୍ତର ୩୬ ଘଣ୍ଟା କାର୍ଯ୍ୟରତ ରହିଥାନ୍ତି । ତେବେ ନିଜେ ସୁରକ୍ଷିତ ନରହିଲେ ରୋଗୀ ସେବା କିଭଳି ହେବ ବୋଲି ପ୍ରଶ୍ନ କରିଛନ୍ତି ଡ଼ାକ୍ତରୀ ଛାତ୍ର ।