ଖଲ୍ଲିକୋଟ,୦୯/୧୦: ଖଲ୍ଲିକୋଟ ଥାନା ଅନ୍ତର୍ଗତ ଭେଜିପୁଟ ଫାଣ୍ଡି ପୋଲିସକୁ ମିଳିଛି ସଫଳତା । ସୁନା ଚୋରି ହେବାର ୨ ମାସ ପରେ ଜବତ ହେଲା ସୁନା । କିନ୍ତୁ ସୁନା ଉଦ୍ଧାର କରି ମଙ୍ଗଳବାର ଅପରାହ୍ନ ସମୟରେ ଫାଣ୍ଡି ପରିସରରେ ପ୍ରକୃତ ମାଲିକକୁ ହସ୍ତନ୍ତର କରିଛି ପୁଲିସ । ଜବତ ସୁନାର ପ୍ରକୃତ ବିଲ୍ ଦାଖଲ କରିଲେ ସୁନା ଫେରସ୍ତ ପାଇବେ ବୋଲି କହି ଉକ୍ତ ସୁନାର ପ୍ରକୃତ ମାଲିକଙ୍କୁ ହଇରାଣ କରିଛି ପୋଲିସ ।
ସୂଚନା ମୁତାବକ, ଖଲ୍ଲିକୋଟ ଥାନା ଅନ୍ତର୍ଗତ ଉପର ବାଲାନ୍ତର ଗ୍ରାମ ର ସାଗର ମହାରଣାଙ୍କ ଘରୁ ଗତ ଜୁଲାଇ ମାସ ୭ ତାରିଖ ରାତିରେ କୌଣସି ଦୁର୍ବୃତ୍ତ ଦୁଇଟି ସୁନା ଚେନ, ତିନୋଟି ସୁନା ମୁଦି ଓ କିଛି ରୁପା ଅଳଙ୍କାର ଚୋରି ହୋଇଥିବା ନେଇ ଭେଜିପୁଟ ଫାଣ୍ଡିରେ ଅଭିଯୋଗ ହୋଇଥିଲା । ଅଭିଯୋଗ ଭିତ୍ତି କରି ଖଲ୍ଲିକୋଟ ଥାନା ଏକ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଥିଲେ ଫାଣ୍ଡି ଅଧିକାରୀ ଦେବାଶିଷ ମିଶ୍ର। ଇତି ମଧ୍ୟରେ ପଥରା କଣ୍ଡରାପଡା ଗ୍ରାମର ଜଣେ ବ୍ୟକ୍ତିଙ୍କ ଘରୁ ନଗଦ ଟଙ୍କା ଓ ସୁନା, ରୁପା ଅଳଙ୍କାର ଚୋରି କରିଥିବା ଅଭିଯୋଗରେ କହ୍ନେଇପୁର ଛକରେ ଜଳଖିଆ ଦୋକାନ କରିଥିବା ରବି ସାହୁକୁ ଗିରଫ କରି କୋର୍ଟ ଚାଲାଣ କରିଥିଲେ ଫାଣ୍ଡି ଅଧିକାରୀ ଦେବାଶିଷ ମିଶ୍ର । ଗିରଫ ରବି ସାହୁ ବର୍ତ୍ତମାନ ଜେଲରେ ଅଛି । ତେବେ ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହ କରି ଫାଣ୍ଡି ଅଧିକାରୀ ଜେଲ ଭିତରେ ରବି ସାହୁକୁ ଜେରା କରିବା ପରେ ସବୁ କଥା ଜଣାପଡ଼ିଥିଲା।
ତେବେ ଜୁଲାଇ ୭ ତାରିଖ ରାତିରେ ରବି ସାହୁ ସାଗର ମହାରଣାଙ୍କ ଘରେ କେହି ନ ଥିବାର ସୁଯୋଗ ନେଇ ଘରୁ ସୁନା ଓ ରୁପା ଅଳଙ୍କାର ଚୋରି କରିଥିଲା । ତାପର ଦିନ ଅର୍ଥାତ ଜୁଲାଇ ୮ ତାରିଖ ଦିନ ଚୋରି କରିଥିବା ସୁନା ଅଳଙ୍କାର ନେଇ ବାଲୁଗାଁ ସ୍ଥିତ ମନପୁରମ ଫାଇନାନ୍ସ ଲିମିଟେଡ଼ରେ ବନ୍ଧକ ରଖି ୪୦ ହଜାର ୨୬ ଟଙ୍କା ଆଣିଥିଲା । ଗିରଫ ରବି ସାହୁର ଘର ନୟାଗଡ଼ ଜିଲ୍ଲା ଚାନ୍ଦପୁର ରେ ହୋଇଥିବା ବେଳେ ସେ କହ୍ନେଇପୁର ଛକରେ ଏକ ଜଳଖିଆ ଦୋକାନ କରିଥିଲେ । ତା ବିରୁଦ୍ଧରେ ପୂର୍ବରୁ ଚାନ୍ଦପୁର ଥାନାରେ ୨୦୨୧ ମସିହାରେ ଗୋଟିଏ ରବରୀ କେସ ଓ ଗୋଟିଏ ଚୋରି କେସ ରହିଥିବା ଭେଜିପୁଟ ଫାଣ୍ଡି ଅଧିକାରୀ ଦେବାଶିଷ ମିଶ୍ର ସୂଚନା ଦେଇଛନ୍ତି । ତେବେ ଚୋରି ସୁନା ଅଳଙ୍କାରର ଅରିଜିନାଲ ବିଲ ଦାଖଲ କରିବା ପରେ ବନ୍ଧକ ଥିବା ମନପୁରମ ଫାଇନାନ୍ସ ଲିମିଟେଡ଼ରୁ ସୁନା ଅଳଙ୍କାର ଆଣି ପ୍ରକୃତ ମାଲିକକୁ ହନ୍ତସନ୍ତ କରିଛି ପୋଲିସ ।
