ଭୁବନେଶ୍ୱର, ୧୭।୦୩ : ରାଜ୍ୟସ୍ତରୀୟ ସିଙ୍ଗଲ ଓ୍ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକ ଅନୁଷ୍ଠିତ ହୋଇଛି। ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ୧୯ଟି ପ୍ରମୁଖ ପ୍ରକଳ୍ପକୁ ଅନୁମୋଦନ ମିଳିଛି। ରାଜ୍ୟର ଶିଳ୍ପ ଓ ଅର୍ଥନୈତିକ ଅଭିବୃଦ୍ଧିରେ ସହାୟକ ହେବା ସହ ୧୭,୨୮୬ ନିଯୁକ୍ତି ସୁଯୋଗ ସୃଷ୍ଟି କରିବ । ୬,୧୧୭ କୋଟି ଟଙ୍କାର ଉଲ୍ଲେଖନୀୟ ପୁଞ୍ଜିନିବେଶ ହୋଇଥିବା ବୈଠକରେ ଜଣାପଡିଛି। ଯାହା ଏକ ପ୍ରମୁଖ ପୁଞ୍ଜିନିବେଶ ସ୍ଥଳ ଭାବେ ଓଡ଼ିଶାର ସ୍ଥିତିକୁ ଆହୁରି ସୁଦୃଢ଼ କରିଛି
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଓଡ଼ିଶା ଶିଳ୍ପ କ୍ଷେତ୍ରରେ ପୁଞ୍ଜିନିବେଶ ଦିଗରେ ଏକ ଅଗ୍ରଣୀ କେନ୍ଦ୍ର ଭାବେ ଉଭା ହୋଇଛି। ଯେଉଁଥିରେ ଶିଳ୍ପ ପ୍ରକଳ୍ପ ଅନୁମୋଦନକୁ ତ୍ୱରାନ୍ୱିତ କରାଯିବ। ବ୍ୟବସାୟ ଅନୁକୂଳ ପରିବେଶକୁ ପ୍ରୋତ୍ସାହିତ କରିବା ପାଇଁ ଦୃଢ଼ ପ୍ରତିବଦ୍ଧତା ରହିଛି । ଏହି ରାଜ୍ୟସ୍ତରୀୟ ବୈଠକରେ ଜୈବ ଇନ୍ଧନ, ବାୟୋଟେକ୍ନୋଲୋଜି, ଜାହାଜ ନିର୍ମାଣ, ଆଲୁମିନିୟମ, ଖାଦ୍ୟ ପ୍ରକ୍ରିୟାକରଣ, ରସାୟନ, ପୋଷାକ ଏବଂ ସବୁଜ ଶକ୍ତି ଉପକରଣ ସମେତ ୧୦ଟି ଉଚ୍ଚ ପ୍ରଭାବୀ କ୍ଷେତ୍ରର ପ୍ରକଳ୍ପକୁ ଅନୁମୋଦନ ମିଳିଛି । ବଲାଙ୍ଗିର, କଟକ, ଗଞ୍ଜାମ, ଯାଜପୁର, ଜଗତସିଂହପୁର, ଝାରସୁଗୁଡ଼ା, କଳାହାଣ୍ଡି, ଖୋର୍ଦ୍ଧା, କନ୍ଧମାଳ, ରାୟଗଡ଼ା ଓ ସମ୍ବଲପୁର ସମେତ ଓଡ଼ିଶାର ୧୧ଟି ଜିଲ୍ଲାରେ ଏହି ପ୍ରକଳ୍ପ କାର୍ଯ୍ୟକାରୀ ହେବ । ଏହି ପୁଞ୍ଜିନିବେଶ ଫଳରେ ଓଡ଼ିଶା ଦ୍ରୁତ ଶିଳ୍ପ ସମ୍ପ୍ରସାରଣ ଏବଂ ନିଯୁକ୍ତି ସୃଷ୍ଟି ଜାରି ରଖିଛି । ବ୍ୟବସାୟ ପାଇଁ ଏକ ଶୀର୍ଷ ସ୍ଥଳ ଭାବରେ ନିଜକୁ ସ୍ଥାନିତ କରିଛି ।
ଜୈବ ଇନ୍ଧନ ଓ ସବୁଜ ଶକ୍ତି କ୍ଷେତ୍ରରେ ଟ୍ରାନ୍ସପେସିଫିକ୍ ଇଞ୍ଜିନିୟରିଂ ପ୍ରାଇଭେଟ୍ ଲିମିଟେଡ୍ ସମ୍ବଲପୁରର ଏକ ବାୟୋକୋଲ କାରଖାନାରେ ୯୦୦ କୋଟି ଟଙ୍କା ବିନିଯୋଗ କରି ୬୩୦ ନିଯୁକ୍ତି ସୃଷ୍ଟି କରିବ । ସାଇ ସୁଧା ମୋଟର୍ସ ପ୍ରାଇଭେଟ୍ ଲିମିଟେଡ୍ ଦ୍ୱାରା ଖୋର୍ଦ୍ଧାରେ ୬୮.୫୮ କୋଟି ଟଙ୍କାର ସୋଲାର ମଡ୍ୟୁଲ୍ ଉତ୍ପାଦନ ୟୁନିଟ୍ ସ୍ଥାପନ ଫଳରେ ୩୫୦ ନିଯୁକ୍ତି ସୃଷ୍ଟି ହେବ । ରାୟଗଡ଼ା, ବଲାଙ୍ଗିର ଓ କଳାହାଣ୍ଡିରେ ହାଇସ୍ପିଡ ଡିଜେଲ ଓ ପେଟ୍ରୋଲ ପାଇପଲାଇନ ପାଇଁ ହିନ୍ଦୁସ୍ତାନ ପେଟ୍ରୋଲିୟମ କର୍ପୋରେସନ ଲିମିଟେଡ ପକ୍ଷରୁ ୮୬୮ କୋଟି ଟଙ୍କା ବିନିଯୋଗ କରାଯିବ । ଏହା ବ୍ୟତୀତ ଜୋହୋ କର୍ପୋରେସନ୍ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାରେ ୩୦୬.୫୦ କୋଟି ଟଙ୍କାର ଡାଟା ସେଣ୍ଟର ସ୍ଥାପନ କରି ୯୦ ନିଯୁକ୍ତି ସୁଯୋଗ ସୃଷ୍ଟି କରିବ । ବାୟୋଟେକ୍ନୋଲୋଜି ଏବଂ କେମିକାଲ କ୍ଷେତ୍ରରେ ଉଲ୍ଲେଖନୀୟ ପୁଞ୍ଜିନିବେଶ ହେବ । ସାପିଜେନ୍ ବାୟୋଲୋଜିକ୍ସ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧା ଅନ୍ତର୍ଗତ ଓଡ଼ିଶା ବାୟୋଟେକ୍ ପାର୍କରେ ୮୫୪.୩୨ କୋଟି ଟଙ୍କାର ଟିକା ଉତ୍ପାଦନ ୟୁନିଟ୍ ସ୍ଥାପନ କରିବ । ୮୫୦ ନିଯୁକ୍ତି ସୃଷ୍ଟି ହେବ । ଏଆରସିଏଲ୍ ଅର୍ଗାନିକ୍ସ ଲିମିଟେଡ୍, ଜଗତସିଂହପୁରରେ ୫୦୦ କୋଟି ଟଙ୍କାର ସ୍ପେଶାଲିଟି କେମିକାଲ୍ ଉତ୍ପାଦନ ୟୁନିଟ୍ ସ୍ଥାପନ କରି ୭୨୫ ନିଯୁକ୍ତି ସୃଷ୍ଟି କରିବ । ଆରସିସି ଲାବୋରେଟୋରିଜ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାର ପ୍ରି-କ୍ଲିନିକାଲ ଟେଷ୍ଟିଂ ଏବଂ ପ୍ରାଣୀ ପ୍ରଜଜନ କେନ୍ଦ୍ରରେ ୫୫.୩୬ କୋଟି ଟଙ୍କା ନିବେଶ କରିବ ।
ଇସ୍ପାତ ଓ ଆଲୁମିନିୟମ କ୍ଷେତ୍ରରେ ବଡ଼ ଧରଣର ସମ୍ପ୍ରସାରଣ ହେବ। ଯେଉଁଥିରେ ନେଜୋନ୍ ଷ୍ଟିଲ୍ସ ଉତ୍କଳ ଏଲ୍ ଏଲ୍ ପି ଯାଜପୁରରେ ୪୭୦ କୋଟି ଟଙ୍କାର କଲର କୋଟିଂ ସିଟ୍ ଉତ୍ପାଦନ ୟୁନିଟ୍ ସ୍ଥାପନ କରିବ । ଏହା ଦ୍ୱାରା ୩୪୦ ନିଯୁକ୍ତି ସୁଯୋଗ ସୃଷ୍ଟି ହେବ । ସେହିପରି ସିଏମ୍ଆର୍ ଆଲୁମିନିୟମ୍ ପ୍ରାଇଭେଟ୍ ଲିମିଟେଡ୍ ସମ୍ବଲପୁରରେ ୨୩୪.୧୪ କୋଟି ଟଙ୍କାର ଲିକ୍ୱିଡ୍ ଆଲୁମିନିୟମ୍ ମିଶ୍ରଧାତୁ ପ୍ଲାଣ୍ଟ ସ୍ଥାପନ କରିବ। ଯାହା ୨୦୦ ନିଯୁକ୍ତି ସୁଯୋଗ ସୃଷ୍ଟି କରିବ । ଏହା ବ୍ୟତୀତ କୋରୱାୟାର ସର୍ଫେସ୍ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍ ଯାଜପୁରରେ ୫୦.୧୦ କୋଟି ଟଙ୍କାର ଷ୍ଟିଲ୍ ରୋଲ୍ସ ମାନୁଫାକ୍ଚରିଂ ଏବଂ ରିବିଲ୍ଡିଂ ୟୁନିଟ୍ ସ୍ଥାପନ କରିବ। ଜଗତସିଂହପୁରର ଏକ ଜାହାଜ ନିର୍ମାଣ ଏବଂ ମରାମତି ୟାର୍ଡ ନିମନ୍ତେ ଚୌଗୁଲେ ଲାଭଗନ୍ ଶିପ୍ ମରାମତି ପ୍ରାଇଭେଟ୍ ଲିମିଟେଡ୍ କୁ ସୁଯୋଗ ମିଳିଛି । ଏହା ଦ୍ୱାରା ୫୫୦ କୋଟି ଟଙ୍କା ବିନିଯୋଗରେ ୧ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ। ଏଥି ସହ ସିପ୍ ବିଲ୍ଡିଂ ଓ ମରାମତି କ୍ଷେତ୍ରକୁ ପ୍ରୋତ୍ସାହନ ମିଳିଛି ।
ଖୋର୍ଦ୍ଧାରେ ଖାଦ୍ୟ ପ୍ରକ୍ରିୟାକରଣ ୟୁନିଟ୍ ର ସମ୍ପ୍ରସାରଣ ପାଇଁ ହିନ୍ଦୁସ୍ତାନ କୋକା-କୋଲା ବିଭରେଜ୍ ପ୍ରାଇଭେଟ୍ ଲିମିଟେଡ୍ ୫୧୫.୩୨ କୋଟି ଟଙ୍କା ବିନିଯୋଗ କରିବ । ଏହା ଦ୍ୱାରା ୪୪୧ ନିଯୁକ୍ତି ସୃଷ୍ଟି ହେବ । ଏହାବ୍ୟତୀତ ଜିଓଫାଷ୍ଟ ଇଣ୍ଡଷ୍ଟ୍ରିଜ୍ (ଇଣ୍ଡିଆ) ଲିମିଟେଡ୍ ଖୋର୍ଦ୍ଧାରେ ୧୦୮ କୋଟି ଟଙ୍କାର ଏକ ୟୁନିଟ୍ ସ୍ଥାପନ କରି ରେଡି-ଟୁ-ଡ୍ରିଙ୍କ୍ ବିଭରେଜ୍, ପର୍ସନାଲ୍ କେୟାର ପ୍ରଡକ୍ଟସ୍, କଣ୍ଡିମେଣ୍ଟସ୍ ଏବଂ ସସ୍ ଉତ୍ପାଦନ ପୂର୍ବକ ୪୦୦ ନିଯୁକ୍ତି ସୃଷ୍ଟି କରିବ । କଟକରେ ମହାବୀର ଫେରୋ ଆଲଏଜ୍ ପ୍ରାଇଭେଟ୍ ଲିମିଟେଡ୍ ୧୧୫ କୋଟି ଟଙ୍କା ବିନିଯୋଗ କରି ୧୨୦୦ ମେଟ୍ରିକ୍ ଟନ୍ ଫେବ୍ରିକ୍, ୩୦ ଲକ୍ଷ ଟି-ସାର୍ଟ ଏବଂ ୨୨ ଲକ୍ଷ କାଜୁଆଲ୍ ୱିୟର ପ୍ୟାଣ୍ଟ ଉତ୍ପାଦନ କରିଛି। ୧୦ ହଜାର ନିଯୁକ୍ତି ସୃଷ୍ଟି କରିଥିବାରୁ ଟେକ୍ସଟାଇଲ୍ ଓ ପୋଷାକ କ୍ଷେତ୍ର କ୍ରମାଗତ ବୃଦ୍ଧି ପାଇବାରେ ଲାଗିଛି । ସେହିପରି ଆଇରନ୍ ଟ୍ରାଏଙ୍ଗଲ ଲିମିଟେଡ୍ ବଲାଙ୍ଗିରରେ ୧୧୩.୫୦ କୋଟି ଟଙ୍କା ବିନିଯୋଗ କରି ୧୦ ଲକ୍ଷ ଟାୱେଲ ଏବଂ ୨୦ ଲକ୍ଷ ଏଥନିକ୍ ୱିୟର ପୋଷାକ ଉତ୍ପାଦନ କରି ୧୧୫୦ ନିଯୁକ୍ତି ସୃଷ୍ଟି କରିବ ।
ପ୍ଲାଷ୍ଟିକ୍ କ୍ଷେତ୍ରରେ ସନ୍ୟାମ ଟାଇ ଅପ୍ ପ୍ରାଇଭେଟ୍ ଲିମିଟେଡ୍ ଭଳି ଏକ ନୂତନ ପ୍ରବେଶ ଦେଖିବାକୁ ମିଳିଛି। ଯାହା ଝାରସୁଗୁଡ଼ାରେ ସର୍ଫେସ୍ ପ୍ରୋଟେକ୍ସନ ଫିଲ୍ମସ୍, ଏଲଡିପିଇ ଫିଲ୍ମସ୍, ପିଇ ଲାଇନର୍ସ, ତାର୍ପୋଲିନ୍ ଏବଂ ରିସାଇକ୍ଲିଂ ପାଇଁ ୧୭୫ ନିଯୁକ୍ତି ସହିତ ୧୦୭.୫୦ କୋଟି ଟଙ୍କାର ଏକ ସୁବିଧା କେନ୍ଦ୍ର ସ୍ଥାପନ କରିବ । ଖୋର୍ଦ୍ଧାର ଏକ ପଞ୍ଚ ତାରକା ହୋଟେଲରେ ଆଶୀର୍ବାଦ ଇଞ୍ଜିନିୟରିଂ ଆଣ୍ଡ କନଷ୍ଟ୍ରକସନ୍ ପ୍ରାଇଭେଟ୍ ଲିମିଟେଡ୍ ୧୩୯ କୋଟି ଟଙ୍କା ବିନିଯୋଗ କରିଛି। ୨୫୪ ନିଯୁକ୍ତି ସୁଯୋଗ ସୃଷ୍ଟି କରିଥିବାରୁ ପର୍ୟ୍ୟଟନ ଓ ଆତିଥେୟତା କ୍ଷେତ୍ରକୁ ପ୍ରୋତ୍ସାହନ ମିଳିଛି । ସୋମାଲୋ ଇକୋ ରିସୋର୍ଟ ପ୍ରାଇଭେଟ୍ ଲିମିଟେଡ୍ ଗଞ୍ଜାମରେ ୧୧୦ କୋଟି ଟଙ୍କାର ବିଳାସପୂର୍ଣ୍ଣ ଇକୋ-ରିସୋର୍ଟ ବିକଶିତ କରି ୨୧୯ ନିଯୁକ୍ତି ସୃଷ୍ଟି କରିବ । ତବସ୍ୟା ହସ୍ପିଟାଲିଟି ପ୍ରାଇଭେଟ୍ ଲିମିଟେଡ୍ କନ୍ଧମାଳର ଏକ ଇକୋ ରିସୋର୍ଟରେ ୫୨.୨୦ କୋଟି ଟଙ୍କା ନିବେଶ କରି ୨୫୦ ନିଯୁକ୍ତି ସୃଷ୍ଟି କରିବ ବୋଲି ଜଣାଯାଇଛି ।
ଓଡ଼ିଶାର ଦୃଢ଼ ଶିଳ୍ପ ନୀତି ଏବଂ ନିବେଶକ ଅନୁକୂଳ ପଦକ୍ଷେପ ରାଜ୍ୟକୁ ବ୍ୟବସାୟ ପାଇଁ ସବୁଠାରୁ ଆକର୍ଷଣୀୟ ଲକ୍ଷ୍ୟସ୍ଥଳରେ ରଖିଛି । ଉତ୍କର୍ଷ ଓଡ଼ିଶା ୨୦୨୫ର ସଫଳତା ନିବେଶକଙ୍କ ଆତ୍ମବିଶ୍ୱାସକୁ ଆହୁରି ଦୃଢ଼ କରିଛ। ଯାହା ଫଳରେ ବିପୁଳ ପରିମାଣର ପୁଞ୍ଜିନିବେଶ ହେଉଥିବା ସହ ଉଲ୍ଲେଖନୀୟ ନିଯୁକ୍ତି ସୁଯୋଗର ପ୍ରତିଶ୍ରୁତି ଦେଇଛି । ଏହି ଅଗ୍ରଗତି ସହିତ ଓଡ଼ିଶା, ଭାରତର ସାମଗ୍ରିକ ଅର୍ଥନୈତିକ ପ୍ରଗତିରେ ଯୋଗଦାନ କରି ନିରନ୍ତର ଶିଳ୍ପ ବିକାଶ ହାସଲ କରିବାକୁ ଯାଉଛି ।
