ନୂଆଦିଲ୍ଲୀ: ଶ୍ରୀଲଙ୍କା ରାଷ୍ଟ୍ରପତି ରନିଲ ବିକ୍ରମସିଙ୍ଘେ ସେପ୍ଟେମ୍ବରରେ ଅନୁଷ୍ଠିତ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ଜଣେ ସ୍ବାଧୀନ ପ୍ରାର୍ଥୀ ଭାବେ ଲଢିବାକୁ ଆଜି (ଶୁକ୍ରବାର) ଘୋଷଣା କରିଛନ୍ତି । ଏହାପୂର୍ବରୁ ସେପ୍ଟେମ୍ବର ୨୧ ରେ ରାଷ୍ଟ୍ରପତି ନିର୍ବାଚନ ହେବ ବୋଲି ଦ୍ୱୀପରାଷ୍ଟ୍ରର ନିର୍ବାଚନ ଆୟୋଗ ଘୋଷଣା କରିଥିଲେ । ତେବେ ଏହି ଘୋଷଣା ପରେ ମାସ ମାସ ଧରି ଚାଲିଥିବା କଳ୍ପନାଜଳ୍ପନାର ଅନ୍ତ ଘଟିଛି। ଏହି ନିର୍ବାଚନ ଦେଶରେ ଅର୍ଥନୈତିକ ସଂସ୍କାରର ଭବିଷ୍ୟତ ସ୍ଥିର କରିବ ।

୨୦୨୨ ରେ ଶ୍ରୀଲଙ୍କା ଆର୍ଥିକ ଦେବାଳିଆ ହେବା ପରେ ଏହା ପ୍ରଥମ ନିର୍ବାଚନ ହେବ । 'ଡେଲି ନ୍ୟୁଜ୍' ଖବରକାଗଜ ଅନୁଯାୟୀ, ରାଷ୍ଟ୍ରପତିଙ୍କ ଓକିଲ ରୋନାଲ୍ଡ ପେରେରା ରାଷ୍ଟ୍ରପତି ନିର୍ବାଚନ ପାଇଁ ୭୫ ବର୍ଷିୟ ବିକ୍ରମସିଙ୍ଘେଙ୍କ ତରଫରୁ ରାଶି ଜମା କରିଛନ୍ତି । ଏହା ପରେ ଗଣମାଧ୍ୟମ ସହ କଥାବାର୍ତ୍ତା ବେଳେ ପେରେରା କହିଛନ୍ତି ଯେ ରାଷ୍ଟ୍ରପତି ଜଣେ ସ୍ୱାଧୀନ ପ୍ରାର୍ଥୀ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ।

ଯେତେବେଳେ ଦେଶ ସବୁଠାରୁ ଖରାପ ଅର୍ଥନୈତିକ ସଙ୍କଟ ଦେଇ ଗତି କରୁଥିଲା ସେତେବେଳେ ବିକ୍ରମସିଙ୍ଘେ ଦ୍ୱୀପ ରାଷ୍ଟ୍ରର ଦାୟିତ୍ୱ ଗ୍ରହଣ କରିଥିଲେ । କିଛି ସପ୍ତାହ ପୂର୍ବରୁ ସେ ଏକ ରାଜନୈତିକ କାର୍ଯ୍ୟାଳୟ ମଧ୍ୟ ଖୋଲିଥିଲେ । ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ପାଣ୍ଠି ସଂଗ୍ରହ ହେବା ସହିତ ସେ ରାଷ୍ଟ୍ରପତି ଦୌଡ଼ରୁ ଓହରିଯିବାର ଅନୁମାନ ମଧ୍ୟ ଶେଷ ହୋଇଛି । ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ନିର୍ବାଚନ ଆୟୋଗ ଘୋଷଣା କରିଛନ୍ତି ଯେ, ରାଷ୍ଟ୍ରପତି ନିର୍ବାଚନ ପାଇଁ ଜମା ଶୁକ୍ରବାର ୮ଟାରୁ ଅଗଷ୍ଟ ୧୪ତାରିଖ ମଧ୍ୟାହ୍ନ ପର୍ଯ୍ୟନ୍ତ କରାଯାଇ ପାରିବ ।

ନିର୍ବାଚନରେ ପ୍ରତିଦ୍ୱନ୍ଦ୍ୱିତା ପାଇଁ ନାମାଙ୍କନ ଅଗଷ୍ଟ ୧୫ ରେ ହେବ । ବିକ୍ରମସିଙ୍ଘେଙ୍କ ପ୍ରାର୍ଥୀତ୍ୱକୁ ନେଇ ଅନେକ କଳ୍ପନାଜଳ୍ପନା କରାଯାଇଥିଲା । ବାସ୍ତବରେ ତାଙ୍କର କୌଣସି ପାର୍ଟୀ ନଥିଲା । ବିଭାଜନ ହେତୁ ତାଙ୍କ ୟୁନାଇଟେଡ୍ ନ୍ୟାସନାଲ ପାର୍ଟି ୨୦୨୦ ରେ ବିଲୋପ ହୋଇଯାଇଥିଲା।