ଅହମ୍ମଦାବାଦ,୧୨/୦୨: ଶୁଭମନ ଗିଲ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଇଂଲଣ୍ଡ ବିପକ୍ଷରେ ଶତକ ହାସଲ କରିଛନ୍ତି। ଏହା ଶୁଭମନ ଗିଲଙ୍କ ଦିନିକିଆ କ୍ୟାରିୟରର ୭ମ ଶତକ। ଭାରତୀୟ ଓପନର ୯୫ ବଲ୍ରେ ତାଙ୍କର ଶତକ ପୂରଣ କରିଥିଲେ। ଏଥି ସହିତ, ଏପର୍ଯ୍ୟନ୍ତ ସେ ତାଙ୍କ ଇନିଂସରେ ୧୪ ଚୌକା ଏବଂ ୨ଟି ଛକା ମାରିଛନ୍ତି।
ପ୍ରଥମେ ଇଂଲଣ୍ଡ ଅଧିନାୟକ ଜୋସ୍ ବଟଲର୍ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରିବାକୁ ଆସିଥିବା ଟିମ୍ ଇଣ୍ଡିଆର ଆରମ୍ଭ ଭଲ ନଥିଲା। ଭାରତୀୟ ଅଧିନାୟକ ରୋହିତ ଶର୍ମା ଶୀଘ୍ର ପାଭିଲିୟନ ଫେରିଯାଇଥିଲେ, କିନ୍ତୁ ଏହା ପରେ ଶୁଭମନ ଗିଲ ଏବଂ ବିରାଟ କୋହଲିଙ୍କ ମଧ୍ୟରେ ୧୧୬ ରନର ଏକ ଚମତ୍କାର ଭାଗୀଦାରି ହୋଇଥିଲା। ବିରାଟ କୋହଲି ୫୫ ବଲ୍ ରୁ ୫୨ ରନ୍ କରି ପାଭିଲିୟନ ଫେରିଥିଲେ, କିନ୍ତୁ ଶୁଭମନ ଗିଲ୍ ତାଙ୍କର ଦୃଢ଼ ବ୍ୟାଟିଂ ଜାରି ରଖିଥିଲେ।
ଏହି ଶତକୀୟ ପାଳି ବ୍ୟତୀତ ଶୁଭମନ ଗିଲଙ୍କ ନାଁ ଏକ ସ୍ୱତନ୍ତ୍ର ତାଲିକାରେ ସାମିଲ ହୋଇଯାଇଛି। କହିରଖୁଛୁ ଯେ, ଶୁଭମନ ଗିଲ ସେହି ବ୍ୟାଟରଙ୍କ ତାଲିକାରେ ସାମିଲ ହୋଇଛନ୍ତି ଯେଉଁମାନେ ଗୋଟିଏ ଗ୍ରାଉଣ୍ଡରେ ତିନୋଟି ଫର୍ମାଟରେ ଶତକ ହାସଲ କରିବାର ସଫଳତା ହାସଲ କରିଛନ୍ତି। ଟେଷ୍ଟ ବ୍ୟତୀତ ଶୁଭମନ ଗିଲ ନରେନ୍ଦ୍ର ମୋଦି ଷ୍ଟାଡିୟମରେ ଦିନିକିଆ ଏବଂ ଟି୨୦ ଫର୍ମାଟରେ ଶତକ ମାରିଛନ୍ତି।
ସେହିପରି ଦକ୍ଷିଣ ଆଫ୍ରିକୀୟ ପୂର୍ବତନ କିମ୍ବଦନ୍ତୀ ଫାଫ୍ ଡୁ ପ୍ଲେସିଙ୍କ ନାଁ ମଧ୍ୟ ଏହି ତାଲିକାରେ ସାମିଲ ହୋଇଛି। ଫାଫ୍ ଡୁ ପ୍ଲେସିସ୍ ଜୋହାନ୍ସବର୍ଗ ଗ୍ରାଉଣ୍ଡରେ ତିନୋଟି ଫର୍ମାଟରେ ଶତକ ହାସଲ କରିଛନ୍ତି। ଡେଭିଡ୍ ୱାର୍ଣ୍ଣର ଆଡିଲେଡ୍ ଓଭାଲ୍ ଗ୍ରାଉଣ୍ଡରେ ଏହି କୃତିତ୍ୱ ହାସଲ କରିଛନ୍ତି। ପୂର୍ବତନ ପାକିସ୍ତାନ ଅଧିନାୟକ ବାବର ଆଜମ କରାଚୀର ନ୍ୟାସନାଲ ଷ୍ଟାଡିୟମରେ ଟେଷ୍ଟ ବ୍ୟତୀତ ଦିନିକିଆ ଏବଂ ଟି ୨୦ ଫର୍ମାଟରେ ଶତକ ମାରିଛନ୍ତି। ଏହା ସହିତ, କ୍ୱିଣ୍ଟନ୍ ଡି କକ୍ ସେଞ୍ଚୁରିଅନରେ ଏହି କୃତିତ୍ୱ ହାସଲ କରିଛନ୍ତି।
