ଚମ୍ପୁଆ , ୧୩/୯ : ଚମ୍ପୁଆ ନିକଟସ୍ଥ ଝାଡଖଣ୍ଡର ଜୟନ୍ତୀଗଡରେ ଗୁଳିକାଣ୍ଡ ଘଟିଛି । ଏହି ଗୁଳିକାଣ୍ଡରେ ଜଣେ ଯୁବକ ଅଳ୍ପକେ ମୃତ୍ୟୁ ମୁଖରୁ ବର୍ତ୍ତି ଯାଇଛନ୍ତି । ତାଙ୍କୁ ଉଦ୍ଧାର କରାଯାଇ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି । ଯୁବକ ଜଣଙ୍କ ହେଲେ ବାବୁ ସାହି ବାସିନ୍ଦା ସତ୍ୟଜିତ୍ କର ( ଡାକ ନାମ ପିଣ୍ଟୁ , ୪୦ ବର୍ଷ) ।
ଆଜି ସନ୍ଧ୍ୟା ପ୍ରାୟ ୯ ଟା ସମୟରେ ସେ ଜୟନ୍ତୀଗଡ ମୁଖ୍ୟ ବଜାରରେ ଥିବା ନିଜର ଦୋକାନ ବନ୍ଦ କରି ଘରକୁ ଫେରୁଥିବାବେଳେ ୨୦ ନଂ ଜାତୀୟ ରାଜପଥ ବାବୁ ସାହି ନିକଟରେ ପୂର୍ବରୁ ଛକି ବସିଥିବା ଦୁଇ ଜଣ ଦୁର୍ବୃତ୍ତ ତାଙ୍କ ଉପରେ ମରଣାନ୍ତଙ୍କ ଗୁଳି ଚାଳନା କରିଥିଲେ । ଗୋଟିଏ ଗୁଳି ତାଙ୍କ ବାମ ହାତରେ ବାଜିଥିବାବେଳେ ଆଉ ଏକ ଗୁଳି କାନ୍ଧରେ ବାଜି ଥିବା ଜଣାପଡିଛି ।
ଗୁଳିଚାଳନା ପରେ ଦୁଇ ଦୁର୍ବୃତ୍ତ ପଲସର ବାଇକ ଯୋଗେ ଚମ୍ପୁଆ ଆଡକୁ ଫେରାର ହୋଇଯାଇଥିବା କୁହାଯାଉଛି । ତାଙ୍କୁ ସଙ୍ଗେ ସଙ୍ଗେ ସେଠାରୁ ଉଦ୍ଧାର କରାଯାଇ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ପ୍ରାଥମିକ ଚିକିତ୍ସା କରାଯାଇଛି । ଖବରପାଇ ପରେ ଝାଡଖଣ୍ଡ ଜଗନ୍ନାଥପୁର ଥାନାଧିକାରୀ ଶିବ ନାରାୟଣ ତିୱାରୀ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ପହଞ୍ଚି ଆହତ ପିଣ୍ଟୁଙ୍କୁ ପଚରାଉଚରା କରିବା ସହ ତଦନ୍ତ ଆରମ୍ଭ କରିଛନ୍ତି।