ମୁମ୍ବାଇ, ୦୮/୦୬ : ଲଗାତର ତୃତୀୟ ଦିନ କାରବାର ଦିବସରେ ବଜାରରେ ଦେଖାଦେଇଛି ଉତ୍ସାହ । ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସେନ୍ସେକ୍ସ ସର୍ବକାଳୀନ ରେକର୍ଡ ସ୍ତର ଛୁଇଁଥିବାବେଳେ ରକେଟ୍ ବେଗରେ ଦୌଡ଼ିଛି ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି । ଶୁକ୍ରବାର କାରବାର ଶେଷରେ ସେନ୍ସେକ୍ସରେ ୧୬୧୮.୮୫ ପଏଣ୍ଟ ବୃଦ୍ଧି ଘଟିଛି । ଫଳରେ ଏହା ୭୬,୬୯୩.୩୬ ପଏଣ୍ଟରେ ବନ୍ଦ ହୋଇଛି । ସେହିଭଳି ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟିରେ ୪୬୮.୭୫ ପଏଣ୍ଟ ବୃଦ୍ଧି ଘଟିଛି । ଏହା ୨୩,୨୯୦.୧୫ ପଏଣ୍ଟର ନୂଆ ରେକର୍ଡ ସ୍ତରରେ ବନ୍ଦ ହୋଇଛି । ଏଥିସହିତ ଜୁନ୍ ୩ର ରେକର୍ଡ ଭାଙ୍ଗିଛି ପୁଞ୍ଜି ବଜାର । ଗତ ୩ଟି କାରବାର ଦିବସରେ ନିବେଶକଙ୍କ ସମ୍ପତ୍ତିରେ ପ୍ରାୟ ୨୮ ଲକ୍ଷ କୋଟି ଟଙ୍କା ବୃଦ୍ଧି ଘଟିଛି ।
ବିଏସ୍ଇରେ ତାଲିକାଭୁକ୍ତ କମ୍ପାନିଗୁଡ଼ିକର ମୋଟ ବଜାର ପୁଞ୍ଜୀକରଣ ୪୨୩.୨ ଲକ୍ଷ କୋଟି ଟଙ୍କାରେ ପହଞ୍ଚିଛି । ଶୁକ୍ରବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସେନ୍ସେକ୍ସ ନିର୍ବାଚନ ଫଳାଫଳ ଘୋଷଣା ଦିନର ସମସ୍ତ କ୍ଷତିକୁ କେବଳ ଭରଣା କରିନାହିଁ, ଏହାସହିତ ନୂଆ ରେକର୍ଡ ସ୍ତରରେ ବି ପହଞ୍ଚିଯାଇଛି ।
