ଭୁବନେଶ୍ଵର, ୧୧/୧୧ : ବିଜେଡି ବରିଷ୍ଠ ନେତା ଅତନୁ ସବ୍ୟସାଚୀଙ୍କ ଦଳବଦଳ ବୟାନ ପରେ ଜୋର୍ ଧରିଲା ରାଜନୀତି। ବିଜେପି ବିଧାୟକ ସରୋଜ ପାଢିଙ୍କ ବିସ୍ଫୋରକ ବୟାନ। ସେ କହିଛନ୍ତି ଯେ, ୨୭ ବିଜେଡି ବିଧାୟକ ବିଜେପିର ଶୀର୍ଷ ନେତୃତ୍ଵଙ୍କ ସହିତ ଯୋଗାଯୋଗରେ ଅଛନ୍ତି। କଥାବାର୍ତ୍ତା ଚାଲିଛି। ୩ ଦିନ ତଳେ ୨୭ ଜଣ ବିଜେଡି ବିଧାୟକ ଏକାଠି ହୋଇଥିଲେ। ବିଜେପି ଆସିବା ପାଇଁ ଶୀର୍ଷ ନେତୃତ୍ଵଙ୍କ ସହ ଯୋଗାଯୋଗ କରିଥିଲେ। 

ପ୍ରକାଶ ଥାଉକି, ବିଜେଡି ବରିଷ୍ଠ ନେତା ଅତନୁ ସବ୍ୟସାଚୀ ରବିବାର ମହାକାଳପଡା ବ୍ଲକ ବିଜେଡି ପଦଯାତ୍ରା ସଭାରେ ଯୋଗଦେଇ କହିଥିଲେ ଯେ, ବିଜେଡି ପୁଣି ସରକାରକୁ ଫେରିବ। ଏଥିପାଇଁ ଯୋଜନା ଚାଲିଛି। କଂଗ୍ରେସକୁ ସାଥିରେ ନେଇ ବିଜେଡି ସରକାର ଗଢ଼ିବ ଏବଂ ସ୍ଵାଧୀନ ବିଧାୟକ ସମର୍ଥନ କରିବେ। କେବଳ ସେତିକି ନୁହେଁ ରାଜନୀତି ଗଣିତ ବି ବୁଝାଇ ଦେଇଛନ୍ତି ଅତନୁ। ସେ କହିଛନ୍ତି ଯେ, ବିଜେଡିର ସଂଖ୍ୟା ୫୧, କଂଗ୍ରେସର ୧୪, ୩ ସ୍ଵାଧୀନ ଓ ଅବଶିଷ୍ଟ ୧୦ ବିଧାୟକ ଯୋଗାଡ଼ ହୋଇଯିବେ। ତେବେ ଅତନୁଙ୍କ ଏଭଳି ମନ୍ତବ୍ୟ ପରେ ଏବେ ପ୍ରଶ୍ନ ଉଠୁଛି ଯେ, କଂଗ୍ରେସ ଓ ବିଜେଡି ଭିତରେ କଣ ମେଣ୍ଟ ନେଇ ଚର୍ଚ୍ଚା ଚାଲିଛି ? ଅଣ କଂଗ୍ରେସ ରାଜନୀତିରୁ ଆରମ୍ଭ ହୋଇଥିବା ବିଜେଡି କଣ କ୍ଷମତାକୁ ଫେରିବାକୁ କଂଗ୍ରେସର ହାତ ଧରିବ । 

ତେବେ ରାଜ୍ୟରେ ସଂଖ୍ୟା ଗରିଷ୍ଠତା ପାଇଁ କଂଗ୍ରେସ ବିଜେଡି ଏକ ହେଲେବି ସଂଖ୍ୟା ଅଣ୍ଟୁନି। ଏଥିପାଇଁ ୧୦ ବିଜେପି ବିଧାୟକଙ୍କ ସମର୍ଥନ ଦରକାର। ଏବେ ପ୍ରଶ୍ନ ଉଠୁଛି କଣ ବିଜେପିରୁ ୧୦ ବିଧାୟକଙ୍କୁ ନିଜ ପକ୍ଷକୁ ନେବାରେ ସକ୍ଷମ ହେବ ବିଜେଡି ? ଏମିତି ଅସମାହିତ ପ୍ରଶ୍ନକୁ ନେଇ ରାଜ୍ୟ ରାଜନୀତି ଏବେ ସରଗରମ।