ଭୁବନେଶ୍ୱର,୦୨/୦୧: ବରଗଡ ରୋଡ୍- ନୂଆପଡା ରୋଡ୍ ନୂଆ ରେଳ ଲାଇନକୁ ଶୀଘ୍ର ସାରିବାକୁ ଯୋଜନା ପ୍ରସ୍ତୁତ କରିଛି ରେଳ ମନ୍ତ୍ରଣାଳୟ । ଯାହାକୁ କାର୍ଯ୍ୟକାରୀ କରିବାକୁ ପୂର୍ବତଟ ରେଳପଥ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି । ତେବେ ଏହି ରେଳ ଲାଇନ୍ ହେବା ଦ୍ୱାରା ସମ୍ୱଲପୁର ଓ ରାୟପୁର ମଧ୍ୟରେ ୮୭ କିମି ଦୂରତା କମିବ । ଏହି ନୂଆ ରେଳ ଲାଇନରେ ମୋଟ ୧୩ଟି ଷ୍ଟେସନ୍ ରହିବ । ଏବେ ଦୁଇଟି ଷ୍ଟେସନ ଥିବାବେଳେ ଆଗାମୀ ଦିନରେ ନିର୍ମାଣ ହେବ ୧୧ ନୂଆ ଷ୍ଟେସନ । ଏହି ନୂଆ ରେଳ ଲାଇନ୍ ନିର୍ମାଣ ପାଇଁ ରେଳ ବୋର୍ଡ ୨୬୨୨ କୋଟି ମଞ୍ଜୁର କରିଛି । ଏହା ସହିତ ରାଜ୍ୟ ସରକାର ମାଗଣା ଜମି ସହ ୩ଶହ କୋଟି ଦେବେ ବୋଲି ସୂଚନା ମିଳିଛି । ଏହି ନୂଆ ରେଳ ଲାଇନ୍ ହେବା ଦ୍ୱାରା ସମ୍ୱଲପୁର-ଝାରସୁଗୁଡା-ରାୟପୁର ମାର୍ଗରେ ୫୩ କିଲୋମିଟର ଏବଂ ସମ୍ୱଲପୁର-ଟିଟିଲାଗଡ-ରାୟପୁର ମାର୍ଗରେ ବର୍ତ୍ତମାନ ତୁଳନାରେ ୮୭ କିଲାମିଟର ଦୂରତା କମିବ । ଯାହା ଦ୍ୱାରା ମାଲ ପରିବହନ ସହ ଯାତ୍ରୀ ପରିବହନ ମଧ୍ୟ ଶୀଘ୍ର ଓ ସୁଗମ ହେବ ।
ଏହି ପ୍ରକଳ୍ପରେ ଏବେ ବରଗଡ ରୋଡ୍ ଓ ନୁଆପଡା ରୋଡ୍ ପୁରୁଣା ଷ୍ଟେସନ ଭାବେ ଥିବା ବେଳେ ନୂଆ ଭାବେ ସରସରା, ଡୁମରପାଲି, ବିଜେପୁର, ବଡ଼ିପାଲି , ଧଉରାମୁଣ୍ଡା, ପଦ୍ମପୁର , ଭଗବତପୁର, ମାଝିପଲି, ପାଇକମାଳ ରୋଡ୍, ବରତୁଣ୍ଡା, ଅଁଳାଜୁବାରେ ଷ୍ଟେସନ ନିର୍ମାଣ କରାଯିବ । ରେଳ ବୋର୍ଡ ଏହି ପ୍ରକଳ୍ପ ବାବଦରେ ୨୦୨୪ ସେପ୍ଟେମ୍ୱର ୧୦ରେ ୨୬୨୧.୯୨ କୋଟି ମଞ୍ଜୁର କରିଥିଲା ପ୍ରକଳ୍ପରେ ସିଭିଲ୍ ଇଞ୍ଜିନିୟରିଂ ବାବଦରେ ୨୧୦୭.୩୦ କୋଟି, ଇଲେକ୍ଟ୍ରିକାଲ୍ ଇଞ୍ଜିନିୟରିଂ ବାବଦରେ ୩୦୫.୫୫ କୋଟି ଏବଂ ସିଗନାଲ ଏବଂ ଟେଲିକମ୍ ଇଞ୍ଜିନିୟରିଂ ବାବଦରେ ୨୦୯.୦୭ କୋଟି ଖର୍ଚ୍ଚ ହେବ । ପ୍ରକଳ୍ପ ପାଇଁ ୯୨୪.୬୪ ହେକ୍ଟର ଜମି ଅଧିଗ୍ରହଣ ଆବଶ୍ୟକ । ଅଧିଗ୍ରହଣ ହେବାକୁ ଥିବା ଜମିରୁ ୭୫୨.୫୨୪ ହେକ୍ଟର ବେସରକାରୀ ଜମି ହୋଇଥିବା ବେଳେ ୧୨୩.୨୩୩ ହେକ୍ଟର ସରକାରୀ ଜମି । ଅବଶିଷ୍ଟ ୪୮.୯୧୩ ହେକ୍ଟର ଜଙ୍ଗଲ ଜମି । ତେବେ ଉଭୟ ବରଗଡ ଏବଂ ନୂଆପଡା ଜିଲ୍ଲାର ଜମି ଅଧିଗ୍ରହଣ ପାଇଁ ଦକ୍ଷ ଅଧିକାରୀମାନଙ୍କୁ ୨୦୨୪ ଅକ୍ଟୋବର ୧୫, ଏବଂ ନଭେମ୍ୱର ୨୯ରେ ନିଯୁକ୍ତି ଦିଆଯାଇଛି । ନୂତନ ରେଳ ଲାଇନ ବରଗଡ ରୋଡରୁ ନୂଆପଡା ରୋଡ ପର୍ଯ୍ୟନ୍ତ ବିଦ୍ୟୁତୀକରଣ ସହ ବ୍ରଡ ଗେଜ (ବିଜି) ମେନ୍ ଲାଇନ ହେବ । ଯାହା ପଦ୍ମପୁର ଦେଇ ଏକ ବିକଳ୍ପ କ୍ଷୁଦ୍ର ମାର୍ଗ ଯୋଗାଇବ ବୋଲି ସୂଚନା ମିଳିଛି ।
