ନୂଆଦିଲ୍ଲୀ,୧୦/୧୧: ଜନସଂଖ୍ୟା ହ୍ରାସ ବିଶ୍ୱର ଅନେକ ଦେଶ ପାଇଁ ଚିନ୍ତାର ବିଷୟ ହୋଇଛି । ରୁଷ୍ ତନ୍ମଧ୍ୟରେ ଅନ୍ୟତମ । ଦେଶରେ ଜନ୍ମହାର ହ୍ରାସର ମୁକାବିଲା ଲାଗି ରୁଷ୍ ସରକାର ଏକ ଭିନ୍ନ ମନ୍ତ୍ରାଳୟ ଗଠନ ଲାଗି ବିଚାର କରୁଛନ୍ତି । ଦେଶରେ ଜନସଂଖ୍ୟା ହ୍ରାସ ସମସ୍ୟାର ସମାଧାନ ଲାଗି ସରକାର ‘ସେକ୍ସ ମିନିଷ୍ଟ୍ରୀ’ ଗଠନ କରିବେ । ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିଶ୍ୱସ୍ତ ଓ ସାଂସଦ ଫ୍ୟାମିଲି ପ୍ରୋଟେକ୍ସନ୍, ପାଟର୍ନିଟି, ମ୍ୟାଟର୍ନିଟି, ଚାଇଲ୍ଡହୁଡ୍ କମିଟିର ଅଧ୍ୟକ୍ଷ ୬୮ ବର୍ଷୀୟା ନୀନା ଓସ୍ତାନିନା ‘ସେକ୍ସ ମିନିଷ୍ଟ୍ରୀ’ ଆବେଦନର ସମୀକ୍ଷା କରୁଛନ୍ତି । ଦେଶର ଜନସଂଖ୍ୟା ହ୍ରାସକୁ ରୋକିବା ଲାଗି ପୁଟିନଙ୍କ ଆହ୍ୱାନର ପାଳନ ଲାଗି ଅଧିକାରୀମାନେ ଅନେକ ନୀତି ପ୍ରସ୍ତୁତ କରୁଥିବାବେଳେ ଏବେ ଏହି ପ୍ରୟାସ ଉପରେ ଆଲୋଚନା ଆରମ୍ଭ ହୋଇଛି । ଗତ ପ୍ରାୟ ୩ ବର୍ଷ ହେଲା ରୁଷ୍-ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି । ଏହା ଫଳରେ ଦୁଇ ଦେଶର ବ୍ୟାପକ କ୍ଷତି ହୋଇଛି ।
ମସ୍କଭିଚ୍ ନାମକ ସ୍ଥାନୀୟ ଏକ ପତ୍ରିକାର ରିପୋର୍ଟ ଅନୁସାରେ, ଗ୍ଲାଭ୍ପିଆର୍ ଏଜେନ୍ସି ‘ସେକ୍ସ ମିନିଷ୍ଟ୍ରୀ’ର ବିଚାର ସାମ୍ନାକୁ ଆଣିଛି, ଯାହା ଜନ୍ମ ହାର ସମ୍ବନ୍ଧୀୟ ପ୍ରୟାସଗୁଡ଼ିକର ନେତୃତ୍ୱ ନେବ । ପୁଟିନଙ୍କ ସମର୍ଥକ ଡେପ୍ୟୁଟି ମେୟର ଆନାସ୍ତାସିଆ ରକୋଭା ରୁଷ୍ର ଲକ୍ଷ୍ୟଗୁଡ଼ିକୁ ପୂରଣ କରିବା ପାଇଁ ତତ୍କାଳ ବ୍ରାଣ୍ଡିଂ ଉପରେ ଜୋର ଦେଇଛନ୍ତି । ସେ କହିଛନ୍ତି, ସମସ୍ତେ ଜାଣନ୍ତି ଯେ ଏକ ସ୍ୱତନ୍ତ୍ର ପରୀକ୍ଷା ଅଛି ଯାହା ଜଣେ ମହିଳାଙ୍କ ପ୍ରଜନନ ସ୍ତର, ଗର୍ଭବତୀ ହେବାର କ୍ଷମତାକୁ ଜାଣିବାରେ ସାହାଯ୍ୟ କରେ । ସେ ମହିଳାଙ୍କୁ ସନ୍ତାନ ଜନ୍ମକୁ ପ୍ରାଥମିକତା ଦେବାକୁ ଅନୁରୋଧ କରିଛନ୍ତି । ଦେଶରେ ପ୍ରଜନନ ହାର ବଢ଼ାଇବା ଲାଗି ଏକ ନିଆରା ପ୍ରସ୍ତାବ ରହିଛି । ଅନ୍ତରଙ୍ଗ କାର୍ଯ୍ୟରେ ସମୟ ବିତାଇବା ପାଇଁ ରାତି ୧୦ଟାରୁ ୨ଟା ପର୍ଯ୍ୟନ୍ତ ଇଣ୍ଟର୍ନେଟ୍, ଏପରିକି ଆଲୋକ ମଧ୍ୟ ବନ୍ଦ କରିବାକୁ ପ୍ରସ୍ତାବ ଦିଆଯାଇଛି । ଆଉ ଏକ ବିଚାରରେ ଘରେ ରହୁଥିବା ମହିଳାଙ୍କୁ ଘର କାର୍ଯ୍ୟ ଲାଗି ଅର୍ଥ ଦେବାକୁ ପ୍ରସ୍ତାବ ଦିଆଯାଇଛି, ଯାହା ସେମାନଙ୍କ ପେନ୍ସନ ରୂପେ ଗଣାଯିବ । ମହିଳା-ପୁରୁଷ ସମ୍ପର୍କକୁ ପ୍ରୋତ୍ସାହନ ଦେବାକୁ ପ୍ରଥମ ଡେଟିଂ ପାଇଁ ସରକାର ୫ ହଜାର ରୁବଲ୍ ଦେବାକୁ ମଧ୍ୟ ପ୍ରସ୍ତାବ ଦେଇଛନ୍ତି । ଆଉ ଏକ ପ୍ରସ୍ତାବରେ ଗର୍ଭଧାରଣର ପ୍ରୋତ୍ସାହନ ଲାଗି ଦମ୍ପତିଙ୍କ ବିବାହ-ରାତ୍ରି ରହଣି ପାଇଁ ୨୬,୩୦୦ ରୁବଲ୍ ପର୍ଯ୍ୟନ୍ତ ଅର୍ଥ ଦେବାକୁ ସରକାର ବିଚାର କରିଛନ୍ତି ।
