ନୂଆଦିଲ୍ଲୀ,୦୨/୦୧:ପୂର୍ବ ଇସ୍କନ ପୂଜାରୀ ତଥା ବାଂଲାଦେଶରେ ଗିରଫ ହିନ୍ଦୁସନ୍ଥ ଚିନ୍ମୟ କୃଷ୍ଣଦାସଙ୍କ ଆଜି ଜାମିନ ଶୁଣାଣି। ଚଟଗାଓଁ ମେଟ୍ରୋପଲିଟାନ କୋର୍ଟରେ ଆଜି ଜାମିନର ଶୁଣାଣି ହେବାକୁ ଥିବା ବେଳେ ଏଥିରେ ସାମିଲ ହେବେ ସିପ୍ରିମକୋର୍ଟର ୧୧ ଜଣ ଓକିଲ । ଡେଲି ଷ୍ଟାରର ରିପୋର୍ଟରେ ଏହି ସୂଚନା ଦିଆଯାଇଛି।ବାଂଲାଦେଶ ଅଦାଲତରୁ ନ୍ୟାୟ ପାଇବାକୁ ଆଶା ରଖିଛନ୍ତି ଇସକନ କର୍ତ୍ତୃପକ୍ଷ।
ତେବେ ଏହାପୂର୍ବରୁ ଡିସେମ୍ବର ୩ ରେ ଚଟଗାଓଁ କୋର୍ଟ ଜାମିନ ଶୁଣାଣି ପାଇଁ ଜାନୁୟାରୀ ୨ ସ୍ଥିର କରିଥିଲା । କିନ୍ତୁ ସେହି ସମୟରେ ଚିନ୍ମୟଙ୍କ ପ୍ରତିନିଧିତ୍ୱ କରିବାକୁ କୌଣସି ଓକିଲ ନଥିଲେ। ତେବେ ଅକ୍ଟୋବର ୨୫ ରେ ବାଂଲାଦେଶର ଚଟଗାଓଁରେ ଜାତୀୟ ପତାକାକୁ ଅପମାନ କରିବାକୁ ନେଇ ଅଶାନ୍ତି ସୃଷ୍ଟି ହୋଇଛି । ଏନେଇ ଗତ ୨୫ ନଭେମ୍ବରରେ ବାଂଲାଦେଶ ପୋଲିସ ଇସକନ ସନ୍ଥ ଚିନ୍ମୟ କୃଷ୍ଣଦାସଙ୍କୁ ଗିରଫ କରିଥିଲେ। ଏହାର ପରଦିନ ଚଟଗାଓଁ କୋର୍ଟରେ ମାମଲାର ଶୁଣାଣି ନେଇ ଅଦାଲତ ପରିସରରେ ଜୋରଦାର ହଙ୍ଗାମା ହୋଇଥିଲା। ଏହି ସମୟରେ ସୈଫୁଲ ଇସଲାମ ଅଲିଫ ନାମକ ଜଣେ ଆଇନଜୀବୀଙ୍କ ମୃତ୍ଯୁ ଘଟିଥିଲା। ଏହା ପୂର୍ବରୁ ଚିନ୍ମୟ କୃଷ୍ଣଦାସଙ୍କ ଓକିଲଙ୍କୁ କୋର୍ଟରେ ହାଜର ହେବାକୁ ଦିଆଯାଇନଥିଲା। କୋଲକାତା ଇସ୍କନ ଅନୁଯାୟୀ, ଦୁଇଜଣ ସାଧୁ, ଆଦିପୁରୁଶ ଶ୍ୟାମ ଦାସ ଏବଂ ରଙ୍ଗନାଥ ଦାସ ବ୍ରହ୍ମଚାରିଙ୍କୁ ୨୯ ନଭେମ୍ବରରେ ଚିନ୍ମୟ କୃଷ୍ଣ ଦାସଙ୍କୁ ଭେଟିବାକୁ ଯାଇଥିବାବେଳେ ଗିରଫ କରାଯାଇଥିଲା। ସଂଗଠନର ଉପାଧ୍ୟକ୍ଷ ରାଧା ରମଣ ମଧ୍ୟ ଦାବି କରିଛନ୍ତି ଯେ, ଅଶାନ୍ତି ସମୟରେ ବାଂଲାଦେଶର ଇସ୍କନକେନ୍ଦ୍ରକୁ ଦଙ୍ଗାକାରୀମାନେ ଭଙ୍ଗାରୁଜା କରିଛନ୍ତି।ବାଂଲାଦେଶରେ ବଢୁଥିବା ହିଂସା ଏବଂ ଉଗ୍ରବାଦୀ ଭାଷଣକୁ ନେଇ ବୈଦେଶିକ ବ୍ୟାପାର ମନ୍ତ୍ରଣାଳୟ ମଧ୍ୟ ଉଦ୍ବେଗ ପ୍ରକାଶ କରିଛି ।
