ନୂଆଦିଲ୍ଲୀ: ମିଆଁମାରର ସାମରିକ ସରକାର ଦେଶର ସ୍ୱାଧୀନତା ଦିବସ ପାଳନ ଅବସରରେ ୧୮୦ ଜଣ ବିଦେଶୀଙ୍କ ସମେତ ୫,୮୬୪ ଜଣ ବନ୍ଦୀଙ୍କୁ ମୁକ୍ତ କରିବେ ବୋଲି ରାଜ୍ୟ ଗଣମାଧ୍ୟମ ଶନିବାର ଦିନ ଘୋଷଣା କରିଛି।
୨୦୨୧ ମସିହାର ଆରମ୍ଭରେ ମିଆଁମାର ଦେଶ ଅଶାନ୍ତ ହୋଇପଡିଥିଲା। ମିଆଁମାରର ସାମରିକ ବାହିନି ଗଣତନ୍ତ୍ର ପ୍ରକ୍ରିୟାରେ ଦେଶରେ ନିର୍ବାଚିତ ହୋଇଥିବା ସରକାରକୁ ହଟାଇ ଶାସନଭାର ନିଜ ହାତକୁ ନେଇଥିଲା। ଏହି ଗଣତନ୍ତ୍ର ବିରୋଧୀ ଶାସନକୁ ଦମନ କରି ଦେଶରେ ଗଣତନ୍ତ୍ର ପ୍ରତିଷ୍ଟା କରିବା ପାଇଁ ଦେଶବ୍ୟାପି ହେଉଥିବା ବିରୋଧ ପ୍ରଦର୍ଶନକୁ ସାମରିକ ବାହିନି ବନ୍ଧୁକ ମୁନରେ ବନ୍ଦ କରିଥିଲେ। ଏଣୁ ଦେଶବ୍ୟାପୀ ସଶସ୍ତ୍ର ବିଦ୍ରୋହ ଆରମ୍ଭ ହୋଇଯାଇଥିଲା।
ଚଳିତ ବର୍ଷ ସମଗ୍ର ଦେଶରେ ନିର୍ବାଚନ ହେବ ବୋଲି ସାମରିକ ବାହିନି ବା ଜୁନ୍ତା ଘୋଷଣା କରିଛି। ତେବେ ଏଯାଏ ଦେଶର ପୂର୍ବତନ ଶାସକ ତଥା ନୋବେଲ ପୁରସ୍କାର ପ୍ରାପ୍ତ ଅଙ୍ଗ ସାନ ସୁ କିଙ୍କୁ ଜେଲରୁ ମୁକ୍ତ କରିନାହିଁ ଜୁନ୍ତା। ଅନ୍ୟପଟେ ଏହି ଘୋଷଣା ପଛରେ ଜୁନ୍ତାର ଅନ୍ୟକିଛି ଉଦ୍ଦେଶ୍ୟ ଥିବା କଥା କହି ବିରୋଧି ମାନେ ଏହାର ତିବ୍ର ନିନ୍ଦା କରିବା ସହ ଏଥିରେ ବିରୋଧ ପ୍ରଦର୍ଶନ କରିଛନ୍ତି।
୭୯ ବର୍ଷ ବୟଷ୍କ ସୁ କିଙ୍କୁ ଭ୍ରାନ୍ତାତ୍ମକ ଭାଷଣ ଓ ନିର୍ବାଚନରେ ଠକେଇ ଅଭିଯୋଗରେ ୧୪ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି। ସୁ କିଙ୍କ ଉପରେ ଲାଗିଥିବା ଏହି ଆରୋପ ଗୁଡିକୁ ଭୁଲ ଓ ତାଙ୍କୁ ମିଛରେ ଫସାଇ ଦିଆଯାଇଛି ବୋଲି ତାଙ୍କ ଓକିଲ ଦାବି କରିଛନ୍ତି।
