ମସ୍କୋ: ଆମେରିକା ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଇବା ନେଇ ପୁନଃ ଘୋଷଣା କରିବ ପରେ ଚିନ୍ତାରେ ଋଷ। ଏହାରି ମଧ୍ୟରେ ଆମେରିକା ଶତ୍ରୁ ରାଷ୍ଟ୍ରକୁ କେଉଁ ପ୍ରକାରର ଅସ୍ତ୍ରଶସ୍ତ୍ର ଯୋଗାଇ ଦେବ, ତାହା ସ୍ପଷ୍ଟ କରିବାକୁ କିଛି ସମୟ ଲାଗିବ ବୋଲି କ୍ରେମଲିନ୍ ମଙ୍ଗଳବାର ଘୋଷଣା କରିଛି। ଏହି ବୟାନ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦେଇଥିବା ମନ୍ତବ୍ୟ ପରେ ଆସିଛି, ଯେଉଁଥିରେ ସେ କହିଥିଲେ ଯେ ଆମେରିକା ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଇ ଦେବାକୁ ପ୍ରସ୍ତୁତ ଅଛି।
ସୂଚନା ମୁତାବକ, ଟ୍ରମ୍ପ ସୋମବାର ଘୋଷଣା କରିଥିଲେ ଯେ ଆମେରିକା ତରଫରୁ ୟୁକ୍ରେନକୁ ରୁଷିଆର ଆକ୍ରମଣରୁ ରକ୍ଷା ପାଇବା ପାଇଁ ପ୍ୟାଟ୍ରିଅଟ୍ ମିସାଇଲ ଭଳି ଅସ୍ତ୍ର ଯୋଗାଇ ଦିଆଯିବ। ଏହାର ପ୍ରତିକ୍ରିୟାରେ କ୍ରେମଲିନ୍ ମୁଖପାତ୍ର ଦିମିତ୍ରୀ ପେସକୋଭ କହିଛନ୍ତି ଯେ, " ଏହା ସ୍ପଷ୍ଟ ଯେ ଦୁଇ ଦେଶ ମଧ୍ୟରେ ଅସ୍ତ୍ର ଯୋଗାଣ ଜାରି ରହିଛି। ୟୁରୋପୀୟ ଦେଶମାନେ ମଧ୍ୟ ୟୁକ୍ରେନକୁ ଅସ୍ତ୍ର ଯୋଗାଇ ଦେଉଛନ୍ତି। କିନ୍ତୁ ଆମେରିକାରୁ କେଉଁ ଅସ୍ତ୍ର ଓ କେତେ ପରିମାଣରେ ଯୋଗାଇ ଦିଆଯିବ, ତାହା ସ୍ପଷ୍ଟ ହେବାକୁ ଅଧିକ ସମୟ ଲାଗିବ।"
ପେସକୋଭ ଆହୁରି ମଧ୍ୟ କହିଛନ୍ତି ଯେ ରୁଷିଆ ଟ୍ରମ୍ପଙ୍କ ଦୁଇ ଦେଶ ମଧ୍ୟରେ ସିଧାସଳଖ ଆଲୋଚନା ଆରମ୍ଭ କରିବାର ପ୍ରୟାସକୁ ସ୍ୱାଗତ କରୁଛି। ସେ ଆମେରିକା ଓ ରୁଷିଆ ମଧ୍ୟରେ ବାଣିଜ୍ୟ ଏବଂ ଅର୍ଥନୈତିକ ସମ୍ପର୍କ ପୁନଃସ୍ଥାପନର ସମ୍ଭାବନା ନେଇ ମଧ୍ୟ ଉଲ୍ଲେଖ କରିଛନ୍ତି। ତେବେ ସେ ଆମେରିକାର ନିଷେଧାଜ୍ଞା ଓ ପାଲଟା ଶୁଳ୍କକୁ ଅବୈଧ ବୋଲି ବର୍ଣ୍ଣନା କରିଛନ୍ତି। ଆମେରିକାର ଏହି ନିୟମ ଉଭୟ ଦେଶର ବ୍ୟବସାୟୀମାନଙ୍କୁ କ୍ଷତି ପହଞ୍ଚାଉଛି ବୋଲି ସେ ନିଜ ବିବୃତ୍ତିରେ କହିଛନ୍ତି।
ଏହା ପୂର୍ବରୁ ୟୁକ୍ରେନ ଆମେରିକାକୁ ଅସ୍ତ୍ର ଯୋଗାଣକୁ ଜାରି ରଖିବାକୁ ଅନୁରୋଧ କରିଥିଲା। କାରଣ ଟ୍ରମ୍ପ ନିର୍ବାଚନ ଜିତିବା ପରେ ୟୁକ୍ରେନକୁ ଅସ୍ତ୍ର ଯୋଗାଣ ଉପରେ ନିଷେଧାଦେଶ ଲଗାଇଥିଲେ। ଯାହା ଦ୍ୱାରା ୟୁକ୍ରେନ ଋଷ ବିରୁଦ୍ଧରେ ଯୁଦ୍ଧ ଜାରି ରଖିବାକୁ ଇଉରୋପିୟ ଦେଶମାନଙ୍କ ଉପରେ ନିର୍ଭର କରିଥିଲା। ତେବେ ଟ୍ରମ୍ପଙ୍କ ନୂଆ ଘୋଷଣା ଅନୁଯାୟୀ, ଆମେରିକା ୟୁକ୍ରେନକୁ ରକ୍ଷାକାରୀ ଅସ୍ତ୍ର ଯୋଗାଇ ଦେବା ଜାରି ରଖିବ। ଯାହା ଯୁଦ୍ଧବିଧ୍ଵସ୍ତ ୟୁକ୍ରେନକୁ ରୁଷିଆର ଆକ୍ରମଣରୁ ସୁରକ୍ଷା ଦେବାରେ ସାହାଯ୍ୟ କରିବ।
