ବର୍ଲିନ: ଲୋହିତ ସାଗରରେ ଚୀନୀ ଯୁଦ୍ଧଜାହାଜ ଦ୍ୱାରା ଜର୍ମାନର ଏକ ନିରୀକ୍ଷଣ ବିମାନ ଉପରେ ଲେଜର ଆକ୍ରମଣ ଘଟଣା ପରେ ଜର୍ମାନୀ ଚାଇନା ରାଜଦୂତଙ୍କୁ ତଲବ କରି ତୀବ୍ର ପ୍ରତିବାଦ ଜଣାଇଛି। ଏହି ଘଟଣା ଇଉରୋପୀୟ ସଂଘ (ଇଇଉ)ର ଆସ୍ପିଡେସ ମିଶନ ଅଧୀନରେ ଜର୍ମାନ ବିମାନ ଲୋହିତ ସାଗରରେ ନିରୀକ୍ଷଣ କାର୍ଯ୍ୟ କରୁଥିବା ସମୟରେ ଘଟିଥିଲା।
ଜର୍ମାନ ବୈଦେଶିକ ମନ୍ତ୍ରଣାଳୟ ଏହି ଆକ୍ରମଣକୁ “ସମ୍ପୂର୍ଣ୍ଣ ଅଗ୍ରହଣୀୟ” ବୋଲି ଅଭିହିତ କରିଛି। ଏବଂ ଚୀନୀ ଯୁଦ୍ଧଜାହାଜର ଲେଜର ବ୍ୟବହାର ଜର୍ମାନ କର୍ମଚାରୀ ଓ ସାମଗ୍ରୀକୁ ବିପଦରେ ପକାଇଥିବା ଅଭିଯୋଗ କରିଛି। ଜର୍ମାନ ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ, ଚୀନୀ ଯୁଦ୍ଧଜାହାଜ ଚଳିତ ମାସର ଆରମ୍ଭରେ ବିନା କାରଣ ଓ ପୂର୍ବ ସୂଚନା ବିନା ଏହି ଲେଜର ଆକ୍ରମଣ କରିଥିଲା। ଏହି ଜାହାଜ ପୂର୍ବରୁ ମଧ୍ୟ ଏହି ଅଞ୍ଚଳରେ ଦେଖାଯାଇଥିଲା।
ଆସ୍ପିଡେସ ମିଶନ, ୨୦୨୪ ଫେବୃଆରୀରେ ୟୁଉ ଦ୍ୱାରା ଆରମ୍ଭ ହୋଇଥିଲା। ଲୋହିତ ସାଗରରେ ହୁତି ବିଦ୍ରୋହୀଙ୍କ ଆକ୍ରମଣରୁ ବେସାମରିକ ଜାହାଜମାନଙ୍କୁ ସୁରକ୍ଷା ଦେବା ଏହାର ପ୍ରାଥମିକ ଲକ୍ଷ୍ୟ ରହିଛି। ଆକ୍ରମଣର ଶିକାର ହୋଇଥିବା ଜର୍ମାନ ବିମାନଟି ଏକ ମଲ୍ଟି-ସେନ୍ସର ପ୍ଲାଟଫର୍ମ (ଏମଏସପି) ଥିଲା। ଯାହା ବେସାମରିକ ସେବା ପ୍ରଦାନକାରୀ ଦ୍ୱାରା ପରିଚାଳିତ ହେଉଥିଲା, କିନ୍ତୁ ଏଥିରେ ଜର୍ମାନ ସୈନ୍ୟ କର୍ମଚାରୀ ଉପସ୍ଥିତ ଥିଲେ। ଲେଜର ଆକ୍ରମଣ ପରେ ବିମାନଟି ମିଶନ ବାତିଲ କରି ଜିବୁଟିରେ ନିରାପଦ ଅବତରଣ କରିଥିଲା। ତେବେ ବିମାନରେ ଉପସ୍ଥିତ ଥିବା ସମସ୍ତ କ୍ରୁ ସଦସ୍ୟମାନେ ସୁସ୍ଥ ଅଛନ୍ତି ଏବଂ ବିମାନଟି ବର୍ତ୍ତମାନ ମିଶନରେ ପୁନର୍ବାର ଯୋଗ ଦେଇଛି।
ଜର୍ମାନ ବୈଦେଶିକ ମନ୍ତ୍ରଣାଳୟ ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟ ଜାରି କରି କହିଛି ଯେ, “ଜର୍ମାନ କର୍ମଚାରୀଙ୍କୁ ବିପଦରେ ପକାଇବା ଏବଂ ମିଶନରେ ବାଧା ସୃଷ୍ଟି କରିବା ସମ୍ପୂର୍ଣ୍ଣ ଅଗ୍ରହଣୀୟ।” ଚୀନର ବୈଦେଶିକ ମନ୍ତ୍ରଣାଳୟ କିମ୍ବା ବର୍ଲିନରେ ଥିବା ଚାଇନା ଦୂତାବାସ ଏ ବିଷୟରେ ଏନେଇ ଆଧିକାରିକ ସ୍ତରରେ କୌଣସି ମନ୍ତବ୍ୟ ଦେଇ ନାହିଁ।
ଏହି ଘଟଣା ଲୋହିତ ସାଗରରେ ଚୀନର ବୃଦ୍ଧି ପାଉଥିବା ସାମରିକ ଉପସ୍ଥିତି ଏବଂ ଏହାର ଆଞ୍ଚଳିକ ସୁରକ୍ଷା ଉପରେ ପ୍ରଭାବ ନେଇ ଚିନ୍ତା ସୃଷ୍ଟି କରିଛି। ପୂର୍ବରୁ ୨୦୨୦ ମସିହାରେ ଯୁକ୍ତରାଷ୍ଟ୍ର ମଧ୍ୟ ଚାଇନା ଯୁଦ୍ଧଜାହାଜ ଦ୍ୱାରା ଆମେରିକୀୟ ବିମାନ ଉପରେ ଲେଜର ଆକ୍ରମଣ ହୋଇଥିବା ଅଭିଯୋଗ କରିଥିଲା। ତେବେ ଆମେରିକାର ଏହି ଅଭିଯୋଗକୁ ଚୀନ ଅସ୍ୱୀକାର କରିଥିଲା।
ଏହି ଘଟଣା ଚୀନ ଓ ଜର୍ମାନୀ ମଧ୍ୟରେ କୂଟନୈତିକ ଉତ୍ତେଜନା ବଢ଼ାଇଛି ଏବଂ ଲୋହିତ ସାଗରରେ ଆନ୍ତର୍ଜାତୀୟ ସୁରକ୍ଷା ପରିସ୍ଥିତିକୁ ଆହୁରି ଜଟିଳ କରିଛି।
