ନୂଆଦିଲ୍ଲୀ, ୨୭।୬: ଶେଷ ହେବାକୁ ଯାଉଛି ଜୁନ୍ ମାସ । ଆଉ ମାତ୍ର ୩ ଦିନ ବାକି । ଏହାପରେ ଜୁଲାଇ ୧ରୁ ସାରା ଦେଶରେ ୫ଟି ବଡ଼ ପରିବର୍ତ୍ତନ ଦେଖାଦେବ । ଯାହା ସିଧାସଳଖ ଆପଣଙ୍କ ବ୍ୟାଙ୍କ ଆକାଉଣ୍ଟ ଓ ମୋବାଇଲ ଫୋନ୍ ଉପରେ ପ୍ରଭାବ ପଡ଼ିପାରେ । ଏଥିରେ ଏଲପିଜି ସିଲିଣ୍ଡର ଦରଠୁ ଆରମ୍ଭ କରି କ୍ରେଡିଟ୍ କାର୍ଡ ନିୟମ ସାମିଲ । ଯାହା ସିଧାସଳଖ ସାଧାରଣ ଲୋକଙ୍କ ପକେଟ୍ ଉପରେ ପ୍ରଭାବ ପକାଇବ । ଆସନ୍ତୁ ଜାଣିବା ଏହି ୫ଟି ପରିବର୍ତ୍ତନ ବିଷୟରେ ।
ଏଲପିଜି ସିଲିଣ୍ଡର ଦର :
ତେଲ କମ୍ପାନୀଗୁଡ଼ିକ ମାସ ଆରମ୍ଭରେ ଏଲପିଜି ସିଲିଣ୍ଡର ଦରରେ ସଂଶୋଧନ ଆଣିଥାନ୍ତି । ୧ ଜୁଲାଇ ୨୦୨୪ରେ ସକାଳ ୬ଟାରୁ ଏହି ପରିବର୍ତ୍ତନ ଦେଖାଦେବ । ଗତ କିଛି ଦିନ ମଧ୍ୟରେ ୧୯ କିଗ୍ରା କମର୍ସିଆଲ ଗ୍ୟାସ୍ ସିଲିଣ୍ଡର ଦରରେ ଅନେକ ଥର ପରିବର୍ତ୍ତନ ଦେଖାଦେଇଛି । କିନ୍ତୁ, ଘରୋଇ ଗ୍ୟାସ୍ ସିଲିଣ୍ଡର ଦର ଦୀର୍ଘ ଦିନ ଧରି ସ୍ଥିର ରହିଛି । ତେବେ ଦେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଏନଡିଏ ସରକାର ଗଠନ ହେବା ପରେ ଏଥର ଘରୋଇ ସିଲିଣ୍ଡରର ଦରରେ ସାମାନ୍ୟ ଆଶ୍ୱସ୍ତି ମିଳିବ ବୋଲି ଆଶା ରଖିଛନ୍ତି ଗ୍ରାହକ ।
ଏଟିଏଫ୍ ଓ ସିଏନ୍ଜି-ପିଏନ୍ଜି ଦର :
ପ୍ରତି ମାସ ୧ ତାରିଖରେ କେବଳ ଏଲପିଜି ସିଲିଣ୍ଡରରେ ପରିବର୍ତ୍ତନ ହୁଏନି । ତେଲ କମ୍ପାନୀଗୁଡ଼ିକ ବିମାନ ଇନ୍ଧନ ଅର୍ଥାତ୍ ଏୟାର ଟର୍ବାଇନ ଫୁଏଲ୍ (ଏଟିଏଫ୍), ସିଏନ୍ଜି-ପିଏନ୍ଜି ଦାମ୍ରେ ମଧ୍ୟ ସଂଶୋଧନ କରନ୍ତି । ତେବେ ଏଟିଏଫ୍ ଦର ହ୍ରାସ ହେଲେ ବିମାନ ଯାତ୍ରୀମାନଙ୍କୁ ସାମାନ୍ୟ ଆଶ୍ୱସ୍ତି ମିଳିବା ବେଳେ ସିଏନ୍ଜି ଦର ହ୍ରାସ ହେଲେ ଚାଳକଙ୍କ ଖର୍ଚ୍ଚ ମଧ୍ୟ କମ୍ ହେବ ।
କ୍ରେଡିଟ୍ କାର୍ଡ :
କ୍ରେଡିଟ୍ କାର୍ଡର ବ୍ୟବହାର କରୁଛନ୍ତି କି ? ତେବେ ଜାଣି ରଖନ୍ତୁ, ୨୦୨୪ ଜୁଲାଇ ୧ ମାସ ଆରମ୍ଭରୁ କ୍ରେଡିଟ୍ କାର୍ଡରେ ପେମେଣ୍ଟ ସହ ଜଡ଼ିତ ବଡ଼ ପରିବର୍ତ୍ତନ ଲାଗୁ ହେବାକୁ ଯାଉଛି । ପେମେଣ୍ଟ ପ୍ଲାଟଫର୍ମରେ ବିଲ୍ ପେମେଣ୍ଟରେ କିଛି ଚିନ୍ତା ଦେଖାଦେଇପାରେ । ଏହି ପ୍ଲାଟଫର୍ମରେ କ୍ରେଡ୍, ଫୋନ୍ ପେ, ବିଲ୍ ଡେସ୍କ ଭଳି ଫୋନେଟିକ୍ ସାମିଲ । ଆର୍ବିଆଇର ନୂଆ ନିୟମ ଅନୁଯାୟୀ, ଜୁଲାଇ ୧ରୁ ସମସ୍ତ କ୍ରେଡିଟ୍ କାର୍ଡ ପେମେଣ୍ଟ ଭାରତ ବିଲ୍ ପେମେଣ୍ଟ ସିଷ୍ଟମ ଅର୍ଥାତ୍, ବିବିପିଏସ୍ ମାଧ୍ୟମରେ କରାଯିବ । ଏହା ପରେ ସମସ୍ତଙ୍କୁ ଭାରତ ବିଲ୍ ପେମେଣ୍ଟ ସିଷ୍ଟମ୍ ମାଧ୍ୟମରେ ବିଲିଂ କରିବାକୁ ହେବ ।
ସିମ୍ କାର୍ଡ ନିୟମ :
ଟ୍ରାଇ ପକ୍ଷରୁ ସୁରକ୍ଷାକୁ ଧ୍ୟାନରେ ରଖି ନିୟମରେ ପରିବର୍ତ୍ତନ କରାଯାଇଛି । ଯାହା ୧ ଜୁଲାଇ ୨୦୨୪ରେ ଲାଗୁ କରାଯିବ । ଟ୍ରାଇ ମୋବାଇଲ ନମ୍ୱର ପୋର୍ଟେବିଲିଟି ନିୟମରେ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛି । ସିମ୍ ସ୍ୱାପ୍ ଫ୍ରଡ୍ରୁ ରକ୍ଷା ପାଇବା ଲାଗି ଟ୍ରାଇ ପକ୍ଷରୁ ଏହି ନିୟମ ଲାଗୁ କରାଯାଇଛି । ପୂର୍ବରୁ ସିମ୍କାର୍ଡ ଚୋରି ହେଲେ କିମ୍ୱା ନଷ୍ଟ ହୋଇଗଲେ ଷ୍ଟୋରରୁ ଗ୍ରାହକଙ୍କୁ ତୁରନ୍ତ ସିମ୍ କାର୍ଡ ମିଳିଯାଏ । କିନ୍ତୁ, ନୂଆ ନିୟମ ଲାଗି ଆପଣଙ୍କୁ କିଛି ଦିନ ଅପେକ୍ଷା କରିବାକୁ ହେବ । ନୂଆ ସିମ୍ କାର୍ଡ ପାଇବାକୁ ହେଲେ ଗ୍ରାହକଙ୍କୁ ୭ ଦିନ ଅପେକ୍ଷା କରିବାକୁ ହେବ ।
ପଞ୍ଜାବ ନ୍ୟାସନାଲ ବ୍ୟାଙ୍କ (PNB) :
ପଞ୍ଜାବ ନ୍ୟାସନାଲ ବ୍ୟାଙ୍କର ଗ୍ରାହକଙ୍କ ପାଇଁ ମଧ୍ୟ ଆସିଛି ବଡ଼ ପରିବର୍ତ୍ତନ । ଯଦି ଆପଣଙ୍କର ପିଏନ୍ବି ଆକାଉଣ୍ଟ ରହିଛି, ଆପଣ ଏହାକୁ ବର୍ଷ ବର୍ଷ ଧରି ବ୍ୟବହାର କରିନାହାନ୍ତି, ତେବେ ଏହା ୧ ଜୁଲାଇ ୨୦୨୪ରୁ ବନ୍ଦ ହୋଇଯିବ । ଯେଉଁ ପିଏନ୍ବି ଆକାଉଣ୍ଟରେ ଗତ ୩ ବର୍ଷ ଧରି କୌଣସି ଟ୍ରାନଜାକସନ୍ ହୋଇନାହିଁ ଏବଂ ଏହି ଆକାଉଣ୍ଟ ବାଲାନ୍ସ ଶୂନ ଥିବ, ଏହି ଆକାଉଣ୍ଡଗୁଡ଼ିକୁ ଜୁନ୍ ୩୦ ମଧ୍ୟରେ ବ୍ୟାଙ୍କ ଶାଖାକୁ ଯାଇ କେୱାସି କରିନିଅନ୍ତୁ ବୋଲି ବ୍ୟାଙ୍କ ଦ୍ୱାରା ସୋସିଆଲ ମିଡିଆରେ ଏନେଇ ବାରମ୍ୱାର ସତର୍କ କରାଯାଉଛି । ନଚେତ୍ ୧ ଜୁଲାଇରୁ ଏହି ଆକାଉଣ୍ଟ ବନ୍ଦ ହୋଇଯାଇପାରେ ।