ନୂଆଦିଲ୍ଲୀ, ୨୪/୦୧ : ହିନ୍ଦୀ ଫିଲ୍ମ ଇଣ୍ଡଷ୍ଟ୍ରୀର ଲୋକପ୍ରିୟ ଅଭିନେତ୍ରୀ ରିୟା ସେନଙ୍କର ଜନ୍ମଦିନ। ସେ ୪୪ ବର୍ଷରେ ପାଦ ଥାପିଛନ୍ତି। ୧୯୮୧ ମସିହା ଜାନୁଆରୀ ୨୪ରେ କୋଲକାତାରେ ଏକ ରାଜ ପରିବାରରେ ସେ ଜନ୍ମଗ୍ରହଣ କରଥିଲେ। ତାଙ୍କ ପିତା ଭରତ ଦେବ ବର୍ମା ତ୍ରିପୁରାର ରାଜ ପରିବାରର ଥିଲେ। ସେହିପରି ରିୟାଙ୍କ ଜେଜେମା ଇଲା ଦେବୀ କୁଚବିହାରର ରାଜକୁମାରୀ ଥିଲେ। ରିୟାଙ୍କ ମା ମୁନମୁନ ସେନ ଏବଂ ଆଇ ସୁଚିତ୍ରା ସେନ ଦୁହେଁ ଲୋକପ୍ରିୟ ଅଭିନେତ୍ରୀ ଥିଲେ।
ପିଲାଦିନରୁ ଫିଲ୍ମ କ୍ୟାରିଅର ଆରମ୍ଭ କରିଥିଲେ ରିୟା ସେନ। ମାତ୍ର ୫ ବର୍ଷ ବୟସରେ ସେ ଅଭିନୟ କରିବା ଆରମ୍ଭ କରିଥିଲେ। ୧୯୯୧ରେ ଫିଲ୍ମ ବିଷକନ୍ୟାରେ ସେ ଶିଶୁ କଳାକାର ଭାବେ ଅଭିନୟ କରିଥିଲେ। ୨୦୦୧ରେ ଫିଲ୍ମ ଷ୍ଟାଇଲ୍ରେ ତାଙ୍କୁ ସଫଳତା ମିଳିଥିଲା। ଏହା ଏକ କମ୍ ବଜେଟ୍ର ଫିଲ୍ମ ହୋଇଥିଲେ ମଧ୍ୟ ହିଟ୍ ହୋଇଥିଲା। ଏହାପରେ ତାଙ୍କ ପାଇଁ ଫିଲ୍ମ ଇଣ୍ଡଷ୍ଟ୍ରୀର ଦ୍ଵାର ଖୋଲିଥିଲା।
ବହୁ ଫିଲ୍ମରେ ଅଭିନୟ କରି ରିୟା ଜଲୱା ଦେଖାଇଛନ୍ତି। ଜଣେ ମଡେଲ ରୂପରେ ମଧ୍ୟ ତାଙ୍କୁ ଲୋକପ୍ରିୟତା ମିଳିଛି। ୧୯୯୮ରେ ଫାଲ୍ଗୁନି ପାଠକଙ୍କ 'ୟାଦ ପିୟା କି ଆନେ ଲଗି'ରେ ଅଭିନୟ କରିଛନ୍ତି। ଏତଦ୍ ବ୍ୟତୀତ ସେ ବହୁ ମ୍ୟୁଜିକ୍ ଭିଡିଓ, ଫ୍ୟାସନ ସୋ ଏବଂ ବିଜ୍ଞାପନରେ ନଜର ଆସିଛନ୍ତି। ୨୦୦୬ରେ ଏକ କୋଲ୍ଡ ଡ୍ରିଙ୍କ୍ସ୍ ବ୍ରାଣ୍ଡ ବିଜ୍ଞାପନରେ ସେ ଦୀପିକା ପାଦୁକୋନଙ୍କୁ ରିପ୍ଲେସ୍ କରିଛନ୍ତି। ରିୟା ସେନ ବଲିଉଡ ବ୍ୟତୀତ ବଙ୍ଗାଳୀ, ତେଲୁଗୁ, ତାମିଲ ଏବଂ ମାଲାୟଲମ ଫିଲ୍ମରେ ଅଭିନୟ କରିଛନ୍ତି।
ରିୟା ସେନ କୋଲକାତାର ଲୋରେଟୋ ହାଉସ୍ରେ ତାଙ୍କ ସ୍କୁଲ ଶିକ୍ଷା ସମାପ୍ତ କରିଛନ୍ତି। ନିଫ୍ଟ ମୁମ୍ଵାଇରେ ସେ ଫ୍ୟାସନ ଡିଜାଇନିଂ ଏବଂ ଇନଫରମେସନ ଟେକ୍ନୋଲୋଜିରେ ଡିଗ୍ରୀ ହାସଲ କରିଛନ୍ତି। ସେ ଅଭିନୟ ପାଇଁ ମଧ୍ୟ ଟ୍ରେନିଂ ନେଇଛନ୍ତି। ଏତଦ୍ ବ୍ୟତୀତ ପ୍ୟାରିସ୍ ଇନଷ୍ଟିଚ୍ୟୁଟ୍ ମାରଙ୍ଗୋନୀରେ ସେ ଫ୍ୟାସନ ଏବଂ ଇମେଜ ଷ୍ଟାଇଲିଂର କୋର୍ସ କରିଛନ୍ତି। ୨୦୧୭ରେ ରିୟା ତାଙ୍କ ବୟଫ୍ରେଣ୍ଡ୍ ଶିବମ ତିୱାରୀଙ୍କୁ ବଙ୍ଗାଳୀ ରୀତିନୀତିରେ ବିବାହ କରିଛନ୍ତି। ୨୦୨୩ରେ ବଡ଼ ପରଦାରେ ଡେଥ୍ ଟେଲ୍ରେ ନଜର ଆସିଥିଲେ। ଏବେ ରିୟା ଓଟିଟି ପ୍ଲାଟଫର୍ମରେ ଅଧିକ ଆକ୍ଟିଭ୍ ଅଛନ୍ତି।
