ନୂଆଦିଲ୍ଲୀ, ୨୩/୦୧ : ଜଣେ ସାଧାରଣ ବସ୍ ଡ୍ରାଇଭର୍ଙ୍କ ପୁଅ... ଅଭିନୟ କରିବାକୁ ଛାଡ଼ିଥିଲେ ଘର। ସିନେମାରେ କାମ କରିବେ ବୋଲି ବଳାଇଥିଲେ ମନ। ହେଲେ ବଡ଼ ସହରକୁ ଆସିବା ପରେ ମିଳିଲାନି କାମ। ପକେଟରେ ଥିଲା ୩୦୦ ଟଙ୍କା। କେମିତି ରହିବେ, କଣ ଖାଇବେ ଭାବି ଦିଶୁନଥିଲା ବୁଦ୍ଧିବାଟ। ତଥାପି ସେ ଡରିଲେ ନାହିଁ କି ହାରିଲେ ନାହିଁ। ପରିସ୍ଥିତି ସହ କଲେ ସଙ୍ଘର୍ଷ। ବ୍ୟାକ୍ ଷ୍ଟେଜ୍ରେ ଚା ବିକ୍ରି କରି ଦିନକୁ ରୋଜଗାର କରୁଥିଲେ ୫୦ ଟଙ୍କା। ଏବେ ସେ ଜଣେ ଚର୍ଚ୍ଚିତ ସୁପରଷ୍ଟାର। ଗୋଟିଏ ଫିଲ୍ମ କରିବାକୁ ନେଉଛନ୍ତି ୨୦୦ କୋଟି। ସେ ହେଉଛନ୍ତି ସାଉଥ୍ ସୁପରଷ୍ଟାର ୟଶ।
ସାରା ଦୁନିଆରେ ଅଭିନେତା ୟଶଙ୍କୁ ଲୋକପ୍ରିୟତା ଦେଇଛି ପ୍ୟାନ ଇଣ୍ଡିଆ ଫିଲ୍ମ କେଜିଏଫ୍। ଏହି ଫିଲ୍ମ ତାଙ୍କୁ ପ୍ୟାନ୍ ଇଣ୍ଡିଆ ଷ୍ଟାର ଭାବେ ମଧ୍ୟ ପରିଚୟ ଦେଇଛି। କେଜିଏଫ୍ ଏବଂ କେଜିଏଫ୍-୨ ୧୫୦୦ କୋଟିରୁ ଉର୍ଦ୍ଧ୍ଵ ବ୍ୟବସାୟ କରିଛି। ଯାହାକି ଏବେ ସୁଦ୍ଧା ସବୁଠୁ ଅଧିକ ଆୟ କରିଥିବା କନ୍ନଡ଼ ଫିଲ୍ମ ଭାବେ ରେକର୍ଡ ସୃଷ୍ଟି କରିଛି। ତେବେ ୟଶଙ୍କ ପାଇଁ ସହଜ ନଥିଲା ଏହି ଯାତ୍ରା। ତାଙ୍କ ସଫଳତା ପଛରେ ରହିଛି ଏକ ସଙ୍ଘର୍ଷପୂର୍ଣ୍ଣ କାହାଣୀ।
୧୬ ବର୍ଷ ହୋଇଥିବା ବେଳେ ୟଶ ଘର ଛାଡିଥିଲେ। ହିରୋ ହେବେ ବୋଲି ଆଖିରେ ଆଖିଏ ସ୍ଵପ୍ନ ଧରି ବେଙ୍ଗାଲୁରୁ ଚାଲି ଆସିଥିଲେ। ଏକ କନ୍ନଡ଼ ଫିଲ୍ମରେ ସହାୟକ ନିର୍ଦ୍ଦେଶକ ଭାବେ କାମ କରିବା ଆରମ୍ଭ କରିଥିଲେ। ହେଲେ କାମ କରିବାର ଦୁଇ ଦିନ ପରେ ଏହି ପ୍ରୋଜେକ୍ଟ ବନ୍ଦ ହୋଇଯାଇଥିଲା। ଏତେ ବଡ଼ ସହରରେ କଣ କରିବେ କେଉଁଠି ରହିବେ ଭାବି ମୁଣ୍ଡ କାମ କରିନଥିଲା। ତଥାପି ସେ ହାର୍ ମାନି ନଥିଲେ। ଏକ ଡ୍ରାମା ଗ୍ରୁପ୍ରେ ସାମିଲ ହୋଇଥିଲେ। ବ୍ୟାକ୍ ଷ୍ଟେଜ୍ରେ ଚା ବିସ୍କୁଟ ଦେବା କାମ କରୁଥିଲେ। ଏଥିପାଇଁ ତାଙ୍କୁ ଦିନକୁ ୫୦ ଟଙ୍କା ମିଳୁଥିଲା। ଧୀରେଧୀରେ ସେ ଥିଏଟର କଲେ। ଏହି ଅର୍ଥରୁ କଲେଜରେ ନାମ ଲେଖାଇଲେ।
କିଛି ଦିନ ପରେ ୟଶଙ୍କୁ ଟିଭି ସିରିଜ୍ ନନ୍ଦା ଗୋକୁଲାରେ ଅଭିନୟ କରିବାକୁ ସୁଯୋଗ ମିଳିଲା। ୨୦୦୮ରେ ରକିରେ ସେ ମୁଖ୍ୟ ଭୂମିକାରେ ଅଭିନୟ କରିଥିଲେ। ମୋଡାଲାସାଲାରେ ତାଙ୍କୁ ସଫଳତା ମିଳିଥିଲା। ପରବର୍ତ୍ତୀ ସମୟରେ ସେ ମୋଗିନା ମନାସୁ, ଡ୍ରାମା, ଗୁଗଲି, ମିଷ୍ଟର ଆଣ୍ଡ ମିସେସ୍ ରାମଚାରୀ ଏବଂ ମାଷ୍ଟରପିସ୍ ଭଳି ହିଟ୍ ଫିଲ୍ମ ଦେଇଥିଲେ। ୨୦୧୮ରେ ୟଶ କେଜିଏଫ୍ ଚାପ୍ଟର-୧ରେ ଅଭିନୟ କରିଥିଲେ। ୨୫୦ କୋଟି ବ୍ୟବସାୟ କରି ଏହା ବକ୍ସ ଅଫିସରେ ରେକର୍ଡ କରିଥିଲା। ଏହାପରେ କେଜିଏଫ୍-୨ ୧୨୫୦ କୋଟି ବ୍ୟବସାୟ କରିଥିଲା। ଏହି ଫିଲ୍ମ ଏବେ ସୁଦ୍ଧା ସବୁଠୁ ଅଧିକ ରୋଜଗାର କରିଥିବା ଭାରତୀୟ ଫିଲ୍ମ ଭାବେ ରେକର୍ଡ ଭାଙ୍ଗିଥିଲା।
