ନୂଆଦିଲ୍ଲୀ, ୨୮।୧୦: କ୍ଷତ୍ରିୟ କରଣି ସେନା ମୁଖ୍ୟ ରାଜ ଶେଖାୱତ୍ ପୁଣି ଥରେ ଏକ ବଡ଼ ଘୋଷଣା କରିଛନ୍ତି । ଗୁଜରାଟର ସାବରମତି ଜେଲରେ ଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ବିଷୟରେ ସେ କହିଛନ୍ତି ଯେ, ପୋଲିସ ବଦଳରେ ଯଦି କୌଣସି କଏଦୀ ବି ଲରେନ୍ସ ବିଷ୍ଣୋଇଙ୍କୁ ହତ୍ୟା କରେ, ତେବେ କ୍ଷତ୍ରିୟ କର୍ଣ୍ଣି ସେନା ତରଫରୁ ତାଙ୍କୁ ୧ କୋଟି ଟଙ୍କା ପୁରସ୍କାର ରାଶି ମିଳିବ । ଏଥିପାଇଁ ସେ ୧ କୋଟି ୧୧ ଲକ୍ଷ ୧୧ ହଜାର ୧୧୧ ଟଙ୍କା ପୁରସ୍କାର ରାଶି ଘୋଷଣା କରିଛନ୍ତି । ରାଜ୍ ଶେଖାୱତ କହିଛନ୍ତି, "ମୁଁ ଘୋଷଣା କରିଥିବା ଏହି ପୁରସ୍କାର ନିଶ୍ଚିତ ଭାବେ ଲରେନ୍ସଙ୍କ ଏନକାଉଣ୍ଟରରେ ପୋଲିସ କର୍ମଚାରୀଙ୍କୁ ଦିଆଯିବ । ସେ ଏହା ମଧ୍ୟ କହିଛନ୍ତି ଯେ, କ୍ଷତ୍ରିୟ କର୍ଣ୍ଣି ସେନା ସେହି ପୋଲିସଙ୍କ ପରିବାରର ସମ୍ପୂର୍ଣ୍ଣ ଯତ୍ନ ନେବେ ଏବଂ ସମସ୍ତ ଆବଶ୍ୟକତା ପୂରଣ କରିବେ । କ୍ଷତ୍ରିୟ କର୍ଣ୍ଣି ସେନା ସହ କୋଟି କୋଟି ଲୋକ ଜଡ଼ିତ ଅଛନ୍ତି । ଯଦି ପ୍ରତ୍ୟେକ ସଦସ୍ୟ ୫ଟଙ୍କା ଲେଖାଏଁ ଦେବେ, ତେବେ ପୁରସ୍କାର ରାଶିର ସମ୍ପୂର୍ଣ୍ଣ ଅର୍ଥ ଯୋଗାଡ଼ ହୋଇଯିବ ।
ତେବେ ଗ୍ୟାଙ୍ଗଷ୍ଟାର୍ ଲରେନ୍ସ ବିଷ୍ଣୋଇ ଏକାଧିକ ମାମଲାରେ ସଂଶ୍ଳିଷ୍ଟ ଥିବା ବେଳେ ବର୍ତ୍ତମାନ ସେ ଗୁଜୁରାଟର ସାବରମତି ଜେଲ୍ରେ ଥିବାବେଳେ ଏହା ପୂର୍ବରୁ ତାକୁ ଦିଲ୍ଲୀର ତିହାର ଜେଲ୍ରେ ରଖାଯାଇଥିଲା । ସୁପରଷ୍ଟାର ସଲମାନ ଖାନଙ୍କୁ ମିଳିଥିବା ଧମକ ପୂର୍ଣ୍ଣ ଚିଠି ହେଉ କିମ୍ୱା ସିଦ୍ଧୁ ମୁସେୱାଲାଙ୍କ ହତ୍ୟା ଘଟଣା ଏ ସମସ୍ତ ମାମଲା ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ସହ ସଂଶ୍ଳିଷ୍ଟ । ତେବେ ପଞ୍ଜାବର ପ୍ରସିଦ୍ଧ ଗାୟକ ସିଦ୍ଧୁ ମୁସେୱାଲା ହତ୍ୟାକାଣ୍ଡ ସାରା ଦେଶରେ ଚାଞ୍ଚଲ୍ୟ ସୃଷ୍ଟି କରିଥିଲା । ଏହାପରେ ଦିଲ୍ଲୀ ପୋଲିସ୍ ଲଗାତାର ଆକ୍ଟିଭ ରହି ଅଭିଯୁକ୍ତମାନଙ୍କୁ ଗିରଫ କରିଥିଲା । ଏହିକ୍ରମରେ ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ୍ ଗୁଜୁରାଟର କଚ୍ଛରୁ ତିନିଜଣଙ୍କୁ ହେପାଜତରେ ନେଇଥିଲା । ଏହି ୩ ଅଭିଯୁକ୍ତ ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହିତ ଜଡ଼ିତ ବୋଲି ପୋଲିସ ସୂଚନାରୁ ଜଣାପଡ଼ିଥିଲା ।