ଶ୍ରୀନଗର,୨୮।୧୦: ଜମ୍ମୁର ଅଖନୁର ଅଞ୍ଚଳରେ ସୁରକ୍ଷାକର୍ମୀଙ୍କ ଆକ୍ରମଣରେ ୩ ଆତଙ୍କୀ ନିହତ। ସୋମବାର ସେନା କାରକେଡ୍ ଉପରକୁ ଆକ୍ରମଣ ପରେ ସୁରକ୍ଷାକର୍ମୀମାନେ ସ୍ଥାନୀୟ ଅଞ୍ଚଳରେ ଆରମ୍ଭ କରିଥିଲେ ସର୍ଚ୍ଚ ଅପରେସନ୍। ଏଥିରେ ୩ ଆତଙ୍କୀ ନିହତ ହୋଇଥିବାର ଜଣାପଡିଛି। ମୃତ ଆତଙ୍କବାଦୀଙ୍କ ନିକଟରୁ ହତିଆର ଓ ଗୋଳାବାରୁଦ ମିଳିଛି। ସେନାର ଅପରେସନ୍ ଏବେ ବି ଜାରି ରହିଛି।
ଏହା ପୂର୍ବରୁ ସୋମବାର ସକାଳୁ ଅଖନୁରରେ ସେନାର ଏକ ଆମ୍ବୁଲାନ୍ସ ଉପରେ ଆତଙ୍କବାଦୀମାନେ ଗୁଳିମାଡ କରିଥିଲେ। ଏହି ଆକ୍ରମଣ ଜୋଗବାନ ଏରିଆରେ ହୋଇଛି। ଫଟୋ ଓ ଭିଡିଓରେ ଗାଡି ଉପରେ ଗୁଳିମାଡର ବହୁ ଚିହ୍ନ ଦେଖିବାକୁ ମିଳୁଛି। ଆକ୍ରମଣ ପରେ ସ୍ଥାନୀୟ ଅଞ୍ଚଳରେ ବଡ଼ ଧରଣର ତଲାସୀ ଅଭିଯାନ ଆରମ୍ଭ ହୋଇଛି। ୩୧ ଫିଲ୍ଡ ରେଜିମେଣ୍ଟ ପୁରା ଅଞ୍ଚଳକୁ ଘେରାଉ କରିନେଇଛି।
ଏହି ଗୁଳିକାଣ୍ଡରେ କେହି ହତାହତ ହୋଇଥିବାର ଖବର ମିଳିନାହିଁ। ଘଟଣା ଆଜି ସକାଳ ପ୍ରାୟ ୭ଟା ବେଳେ ଘଟିଛି, ଯେତେବେଳେ ସେନାର ବାହାନ ଉପରେ ୩ ଆତଙ୍କବାଦୀ ଗୁଳିମାଡ କରିଥିଲେ। ସୁରକ୍ଷା ଅଧିକାରୀଙ୍କ କହିବା ଅନୁସାରେ, ସ୍ଥାନୀୟ ଅଞ୍ଚଳରେ ୩ ଆତଙ୍କବାଦୀ ଥିବାର ସୂଚନା ମିଳିବା ପରେ ପାକିସ୍ତାନ ସୀମା ନିକଟବର୍ତ୍ତୀ ଅଖନୁର ସେକ୍ଟରରେ ସୋମବାର ସକାଳେ ସର୍ଚ୍ଚ ଅପରେସନ୍ ଆରମ୍ଭ କରାଯାଇଥିଲା।
