ଚନ୍ଦନେଶ୍ୱର,୨୬/୦୭: ଆଜି କାରଗିଲ ବିଜୟ ଦିବସ । କାରଗିଲ ବୀର ଯୋଦ୍ଧାଙ୍କୁ ସମସ୍ତେ ମନେ ପକାଇ ପ୍ରଶଂସା କରୁଛନ୍ତି । ଭୋଗରାଇର ବୀର ପୁଅଙ୍କୁ ସମସ୍ତେ ଝୁରି ହେଉଛନ୍ତି । ଯୁଦ୍ଧର ୨୫ ବର୍ଷ ପରେ ବି କାରଗିଲ ସହିଦ୍ଙ୍କ ପ୍ରତି ଜିଲ୍ଲା ପ୍ରଶାସନର ପ୍ରତିଶ୍ରୁତି ପୂରଣ ହୋଇପାରିନାହିଁ । ଏଭଳି ଜଣେ ଅମର ଯବାନ ବାଲେଶ୍ୱର ଜିଲ୍ଲା ଭୋଗରାଇର କୁଶୁଡ଼ା ପଂଚାୟତ ଅଧୀନ ସେହି ଗାଁର ବାପା ଶ୍ୟାମସୁନ୍ଦର ଦାସ ଓ ମାଆ ଶାନ୍ତିଲତାଙ୍କ ବଡ଼ ପୁଅ ଗଙ୍ଗାରାମ ଦାସ ।
୧୯୯୯ ମଇ ୩ ତାରିଖରୁ କାରଗିଲ ଯୁଦ୍ଧ ଆରମ୍ଭ ହୋଇ ଜୁଲାଇ ୨୬ ତାରିଖରେ ଶେଷ ହୋଇଥିଲା । ଦୀର୍ଘ ୭୩ ଦିନର ଯୁଦ୍ଧ ପରେ ଏହା ସମାପ୍ତ ହୋଇଥିଲା । ଏଥିରେ ଦେଶର ୫୨୭ଜଣ ବୀର ସୈନ୍ୟ ସହିଦ ହୋଇଥିଲେ। ଓଡ଼ିଶାର ୧୩ଜଣଙ୍କ ମଧ୍ୟରୁ ଭୋଗରାଇର ଗଙ୍ଗାରାମ ଦାସ ଅନ୍ୟତମ । ତାଙ୍କ ସ୍ମୃତି ପାଇଁ ଏବେ ବି ପ୍ରତିମୂର୍ତ୍ତିଟିଏ ହୋଇପାରିଲା ନାହିଁ କି କୌଣସି ରାସ୍ତାକୁ ତାଙ୍କ ନାମରେ ନାମିତ କରାଯାଇନାହିଁ ।
୧୯ ବର୍ଷ ବୟସରେ ଗଙ୍ଗାରାମ ଭାରତୀୟ ସେନା ବାହିନୀରେ ମେକାନିକାଲ ଇଏମ୍ଇ ଭାବେ ଯୋଗଦାନ କରିଥିଲେ । ୧୬ ବର୍ଷର ଚାକିରି କାଳ ଭିତରେ ପଦୋନ୍ନତି ପାଇ ହାବିଲଦାର ହୋଇଥିଲେ । ଆଉ ୯ ବର୍ଷ ପରେ ଚାକିରି ଜୀବନ ଶେଷ ହୋଇଥାନ୍ତା । ଅହମ୍ମଦାବାଦରେ ତାଙ୍କ ଡ୍ୟୁଟି ଥିଲା । କାରଗିଲ ଯୁଦ୍ଧ ପାଇଁ ଡାକରା ପାଇ ସେ ସେଥିରେ ସାମିଲ ହୋଇଥିଲେ । ମାତ୍ର ଶତ୍ରୁ ପକ୍ଷର ଆକ୍ରମଣରେ ୧୯୯୯ ଜୁଲାଇ ୧୧ ତାରିଖରେ ସହିଦ ହୋଇଗଲେ । ଗଙ୍ଗାରାମଙ୍କ ମୃତ୍ୟୁ ପରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ନିକଟରୁ ସମସ୍ତ ପ୍ରକାର ସହାୟତା ମିଳିଲା । ତତ୍ସହିତ ସର୍ବସାଧାରଣ ସ୍ଥାନରେ ଏକ ପ୍ରତିମୂର୍ତ୍ତି ଓ ଏକ ରାସ୍ତାକୁ ତାଙ୍କ ନାମରେ ନାମକରଣ କରିବା ଜିଲ୍ଲା ପ୍ରଶାସନ ପ୍ରତିଶ୍ରୁତି ଦେଇଥିଲେ । ମାତ୍ର ଜିଲ୍ଲା ପ୍ରଶାସନ ତାହା ଭୁଲି ଯାଇଛନ୍ତି ।
ସୂଚନା ଯୋଗ୍ୟ, ବାଲେଶ୍ୱର ଜିଲ୍ଲାରେ କାଳିକା ପ୍ରସାଦ ଅତିରିକ୍ତ ଜିଲ୍ଲାପାଳ ଥିବାବେଳେ ସଦର ଥାନା ନିକଟସ୍ଥ ରାସ୍ତା ପାଶ୍ୱର୍ରେ ଏହି ସହିଦ୍ଙ୍କ ପ୍ରତିମୂର୍ତ୍ତି ନିର୍ମାଣ ପାଇଁ ଉଦ୍ୟମ ଆରମ୍ଭ ହୋଇଥିଲା । ଏପରିକି କେନ୍ଦ୍ର ସରକାର ଏବଂ ଗଙ୍ଗାରାମଙ୍କ ବାପା ଶ୍ୟାମସୁନ୍ଦର ଟଙ୍କା ମଧ୍ୟ ଖର୍ଚ୍ଚ କରି ଫାଉଣ୍ଡେସନ କାର୍ଯ୍ୟ ସରିଥିଲା । ମାତ୍ର ରାସ୍ତା ପ୍ରଶସ୍ତୀକରଣ ଆଳରେ ତାହାକୁ ଭାଙ୍ଗି ଦିଆଗଲା । ସେବେଠୁ ପ୍ରଶାସନ ତାଙ୍କ ପ୍ରତିମୂର୍ତ୍ତି ନିର୍ମାଣ କରିବାରେ ସଫଳ ହୋଇପାରିନାହିଁ ା ଗଙ୍ଗାରାମଙ୍କ ସ୍ମୃତିକୁ ଉଜ୍ଜୀବିତ ରଖିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ନେବାକୁ ଭୋଗରାଇବାସୀ ଦାବି ଉଠାଉଛନ୍ତି ।