ପୁରୀ, ୦୬/୦୭ : ନବଗଠିତ ରତ୍ନଭଣ୍ଡାର ଯାଞ୍ଚ୍ କମିଟିର ପ୍ରଥମ ବୈଠକ ଆରମ୍ଭ। ଶ୍ରୀମନ୍ଦିର କାର୍ଯ୍ୟାଳୟରେ ରତ୍ନଭଣ୍ଡାର ଯାଞ୍ଚ୍ କମିଟିର ବୈଠକ ଆରମ୍ଭ ହୋଇଛି। ଜଷ୍ଟିସ୍ ବିଶ୍ବନାଥ ରଥଙ୍କ ଅଧ୍ୟକ୍ଷତାରେ ବୈଠକ ବସିଛି। ଆଜିର ବୈଠକରେ ରଥଯାତ୍ରା ପରେ କେବେ ରତ୍ନଭଣ୍ଡାର ଖୋଲାଯିବ ସେ ସଂପର୍କରେ ଚୂଡ଼ାନ୍ତ ନିଷ୍ପତ୍ତି ଆସିପାରେ ବୋଲି ଅନୁମାନ କରାଯାଉଛି। 

ସୂଚନାନୁଯାୟୀ, ରତ୍ନଭଣ୍ଡାର ଗଣତିମଣତି ପାଇଁ ସରକାର ନୂଆ ଯାଞ୍ଚ୍ କମିଟି ଗଠନ କରିଛନ୍ତି। ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ୍‌ ବିଶ୍ୱନାଥ ରଥଙ୍କ ଅଧ୍ୟକ୍ଷତାରେ ୧୬ ଜଣିଆ କମିଟି ଗଠନ କରାଯାଇଛି। ଏହି କମିଟିରେ ଡ. ସି ବି କେ ମହାନ୍ତି, ଚାଟାର୍ଡ ଆକାଉଣ୍ଟାଣ୍ଟ ରାଜୀବ ସାହୁ, ଅବସରପ୍ରାପ୍ତ ଆଇଏଏସ୍‌ ଜଗଦୀଶ ମହାନ୍ତି, ଅବସରପ୍ରାପ୍ତ ଆଇପିଏସ୍‌ ପ୍ରକାଶ ମିଶ୍ର, ସ୍ୱାମୀ ପ୍ରଜ୍ଞାନନ୍ଦ ଜୀ, ହରିହର ହୋତା, ପଦ୍ମଶ୍ରୀ ସୁଦର୍ଶନ ପଟ୍ଟନାୟକ, ମଧୁସୂଦନ ସିଂହାରୀ, ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର, ଜଗନ୍ନାଥ ଦାସ ମହାପାତ୍ର, ସୌମେନ୍ଦ୍ର ମୁଦୁଲି, ଗଜପତି ମହାରାଜା ଓ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥାର ପ୍ରତିନିଧି, ପୁରୀ ଜିଲ୍ଲାପାଳ ଓ ଶ୍ରୀମନ୍ଦିର ମୁଖ୍ୟ ପ୍ରଶାସକ ସଦସ୍ୟ ଅଛନ୍ତି। ଏହି କମିଟି ହିଁ ରତ୍ନଭଣ୍ଡାର ସଂପର୍କରେ ଚୂଡ଼ାନ୍ତ ନିଷ୍ପତ୍ତି ନେବ। 

ଆଜିର ବୈଠକରେ ରଥଯାତ୍ରାରେ ମହାପ୍ରଭୁ ବଡ଼ ଦେଉଳରୁ ବାହାରିବା ପରେ କେବେ ରତ୍ନଭଣ୍ଡାର ଖୋଲିବ? କେଉଁ ପ୍ରକ୍ରିୟାରେ ରତ୍ନଭଣ୍ଡାର ଗଣତି କରାଯିବ? ଏଥିରେ କୌଣସି ପେସାଦାରୀ ଏଜେନ୍ସି ନିୟୋଜିତ ହେବ ନା ନାହିଁ ସେ ସଂପର୍କରେ କମିଟି ନିଷ୍ପତ୍ତି ନେବ। ରତ୍ନଭଣ୍ଡାର ଗଣତି ମଣତି ସହ ମରାମତି ନେଇ କମିଟି ଯାହା ସୁପାରିଶ କରିବେ ସରକାର ତାକୁ କାର୍ଯ୍ୟକାରୀ କରିବେ ବୋଲି ସୂଚନା ମିଳିଛି।