ଭୁବନେଶ୍ୱର,୦୫/୧୦: ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ଏଥର ବୁଲିବେ ଦଶହରା । ଦଶହରା ପୂଜା ମଣ୍ଡପ ବୁଲି ମା’ଙ୍କ ଦର୍ଶନ କରିବା ସହ ସାଧାରଣ ଜନତାଙ୍କ ଉତ୍ସବରେ ସାମିଲ ହେବେ । ବିଜେଡି ସୂତ୍ରରୁ ଖବର ମିଳିଛି, ଏଥର ନବୀନ କଟକ ଓ ଭୁବନେଶ୍ୱରରେ ଦଶହରା ବୁଲି ଯିବାକୁ ଯୋଜନା କରିଛନ୍ତି । ତେବେ ନବୀନ କେଉଁ ସବୁ ମଣ୍ଡପ ବୁଲିବେ, ତାହା ଶୀଘ୍ର ସ୍ଥିର କରିବାକୁ କଟକ ଓ ଭୁବନେଶ୍ୱରର କିଛି ନେତାଙ୍କୁ ଦାୟିତ୍ୱ ଦିଆଯାଇଛି ।
ସୂଚନାଯୋଗ୍ୟ ଯେ, ନିକଟରେ ନବୀନ ରାଜଧାନୀରେ ଗଣେଶ ପୂଜା ଉତ୍ସବ ବୁଲିବାକୁ ଯାଇଥିଲେ । ଏକାମ୍ର ଭୁବନେଶ୍ୱର, ମଧ୍ୟ ଭୁବନେଶ୍ୱର ଓ ଉତ୍ତର ଭୁବନେଶ୍ୱର ନିର୍ବାଚନମଣ୍ଡଳୀର ବିଭିନ୍ନ ପୂଜା ମଣ୍ଡପ ବୁଲି ଦେଖିବା ସହ ଲୋକଙ୍କ ସହ ମିଶିଥିଲେ। ଆଜି ଭୁବନେଶ୍ୱରର ଉତ୍ତର ନିର୍ବାଚନମଣ୍ଡଳୀର ପ୍ରାୟ ୧୫ରୁ ଅଧିକ ପୂଜା କମିଟିର କର୍ମକର୍ତ୍ତା ବିଧାୟକ ତଥା ଭୁବନେଶ୍ୱର ଜିଲ୍ଲା ବିଜେଡି ସଭାପତି ସୁଶାନ୍ତ ରାଉତଙ୍କ ସହ ନବୀନ ନିବାସ ଯାଇଥିଲେ । ପୂଜା କମିଟି କର୍ମକର୍ତ୍ତାମାନେ ନବୀନଙ୍କୁ ଦୁର୍ଗାପୂଜା ପାଇଁ ନିମନ୍ତ୍ରଣ କରିଥିଲେ । ଏକାମ୍ର ନିର୍ବାଚନମଣ୍ଡଳୀର କିଛି ଦୁର୍ଗା ପୂଜା କମିଟି କର୍ମକର୍ତ୍ତା ମଧ୍ୟ ନବୀନଙ୍କୁ ଭେଟି ଦୁର୍ଗାପୂଜା ପାଇଁ ନିମନ୍ତ୍ରଣ କରିଥିଲେ ।