ପୁରୀ,୨୧/୦୬: ନିଷ୍ଠାରେ ଚାଲିଛି ଠାକୁରଙ୍କ ରଥ ନିର୍ମାଣ । ଗୁରୁବାର ରଥତ୍ରୟର ଦ୍ୱିତୀୟ ଭୂଇଁର ଫ୍ରେମ୍‌ ପଡ଼ିଛି । ପୂର୍ବରୁ ପ୍ରସ୍ତୁତ କାଠ ସବୁକୁ ସଜାଇ ବିଶ୍ୱକର୍ମାମାନେ ଦ୍ୱିତୀୟ ଭୂଇଁର ଫ୍ରେମ୍‌ ଗଢିଛନ୍ତି । ଏଥିସହ ତିନି ରଥରେ ଗୟଳ ପଡ଼ିବା ଓ ଯୋକା ସ୍ଥାପନ କାର୍ଯ୍ୟ ଶେଷ ହୋଇଯାଇଛି । ଗୁରୁବାର କଞ୍ଚା କାଠ ରଥଖଳାକୁ ଯୋଗା ଯିବାରେ ଗାରେଡ଼ି ଓ  ଅଂଳା କାର୍ଯ୍ୟ ଆରମ୍ଭ ହୋଇଥିବା ସୂଚନା ରହିଛି । ଏପଟେ ରଥରେ ଛଅ କାଠ ଉଠାଇବାକୁ ବିଶ୍ୱର୍କମା ଓ ଭୋଇ ସେବକ ଅପେକ୍ଷା କରିଛନ୍ତି । କରତ କଳରୁ ଫାଳି ଆସିଲେ ଚଣାକ ବାଡ଼ିଆ ହୋଇ ରଥରେ ଛଅ କାଠ ଉଠିବ ।  

ପ୍ରଥମ ଭୂଇଁ ଭଳି ଦ୍ୱିତୀୟ ଭୂଇଁର ମୂଳଦୁଆ ରଥଖଳାରେ ପଡ଼ିଛି । ପ୍ରଥମେ ଚଉତା କାଠ ପଡ଼ିଥିଲା । ଖାପ ହୋଇ ୨ଗୋଟି କାଠ ଉପରେ ଆଉ୨ଟି  କାଠ ରହିଥିଲା । ତା’ପରେ ରହିଥିଲା  ୨ଟି ଓରାକାଠ । ଓରା କାଠ ଉପରେ  ଖଞ୍ଜାହେବ ୪ ଖମ୍ୱି । ଖମ୍ୱିରେ ଥିବା  ସାଲକୁ ଓରାର ବିନ୍ଧରେ ଭୁଞ୍ଜାଯିବ ।  ପୁଣି ସେହି ଖମ୍ୱି ଉପରେ ଥୁଆ  ହେବ ତୃତୀୟ ଭୂଇଁ । ଦ୍ୱିତୀୟ ଭୂଇଁ  ଭଳି ତୃତୀୟ ଭୂଇଁ ଉଠିବ । ଭୂଇଁରେ  ଥିବା କାଠମାନଙ୍କରେ ବିନ୍ଧ ହୋଇ  ପାଖୁଡା ଲାଗିବ । ଗୋଟିଏ ଭୂଇଁରେ  ୧୬ଟି ପାଖୁଡା ଲାଗିବ । ପାଖୁଡାଗୁଡ଼ିକ  ଦେହରେ ପଡ଼ିବ ମାଛପାତିଆ ।  ପ୍ରଥମ ଭୂଇଁ ଭଳି ଏହା ଖୋଲା  ଯାଇ ରଥରେ ଲାଗିବ । ଚାଳିକୁ  କଞ୍ଚା କାଠ ଯୋଗାଯିବାରେ ରଥର  ଗାରେଡ଼ି କାମ ଆରମ୍ଭ ହୋଇଛି ।  ପ୍ରତି ରଥରେ ୮ଟି ଲେଖାଏଁ ଗାରେଡ଼ି  ଲାଗିଥାଏ । ନାଟଗୋଡ଼ରେ ଗାରେଡ଼ି  ସଂଯୁକ୍ତ ହୁଏ । ଏସବୁ ଦୁଆରଘଡ଼ାର ଲାଗିବ । ପ୍ରତି ରଥରେ ଚାରିପାଶ୍ୱର୍  ଦୁଆରଘଡ଼ା ଲାଗିବ ।   

ରଥରେ ଗୟଳ ପଡ଼ିବା କାର୍ଯ୍ୟ  ଶେଷ ହୋଇଛି । ଏଥିସହ ତାଳଧ୍ୱଜ  ଓ ନନ୍ଦିଘୋଷ ରଥର ଯୋକା ସ୍ଥାପନ  ଶେଷ ହୋଇଛି । ପୂର୍ବରୁ ଦର୍ପଦଳନର  ଯୋକା ବୁଲି ସାରିଥିଲା । ଏଣୁ ତିନି  ରଥରେ ମୋଟ ୪୪ ଯୋକା ବୁଲିଗଲା ।  ଆଗକୁ ଛଅ କାଠ ଉଠାଇବାକୁ ଭୋଇ ସେବକମାନେ ଚଣାକ ପ୍ରସ୍ତୁତ କରିଛନ୍ତି । ଚଣାକରେ ବିନ୍ଧ ହୋଇଛି । ଚାରି  ନାହାକାରେ ଚଣାକ ବାଡି଼ଆ ହେବ ।  ପ୍ରତି ରଥରେ ୮ ଗୋଟି ଚଣାକ ବାଡ଼ିଆ  ହେବ । ଗୋଟିଏ ପାଶ୍ୱର୍ରେ ଦୁଇଟି କରି  ଲାଗିବ । ଏହା ଛଅ କାଠ ଉଠିବାର  ପୂର୍ବ ପ୍ରସ୍ତୁତି । ଦୋଳବେଦି ଶାଳରେ କମାର ସେବକମାନେ ପୋଟଳ  ପଡ଼ିବା ପାଇଁ ଗୋଡ଼ି ଛାଲ କଣ୍ଟା ଓ  ଅଗ ଭୂଇଁ ପାଇଁ ବିଡ଼ିଆ କଣ୍ଟା ପ୍ରସ୍ତୁତ  କରୁଛନ୍ତି । ରୂପକାର ସେବକ ରଥର ନାଟଗୋଡ଼ରେ ରାହୁ ରୂପ ଖୋଦେଇ  କରୁଛନ୍ତି । ଚିତ୍ରକରମାନେ କାର୍ଯ୍ୟରେ  ଯୋଗଦେବା ପୂର୍ବରୁ ପାଶ୍ୱର୍ ଦେବତାଙ୍କୁ  ପ୍ରସ୍ତୁତ କରାଯାଉଛି।