ପୁରୀ,୨୭/୦୭: ଦାରୁବ୍ରହ୍ମଙ୍କ ନୀତିକାନ୍ତିରେ ବାରମ୍ବାର ଅବହେଳା । କୋଟି କୋଟି ଜଗନ୍ନାଥ ଭକ୍ତଙ୍କ ଭାବାବେଗକୁ ବି ପଦାଘାତ । ବିଶ୍ୱ ପ୍ରସିଦ୍ଧ ରଥ ଯାତ୍ରାରେ ବେକାବୁ ହେଲା ବିଶୃଙ୍ଖଳା । ଚଳିତ ବର୍ଷ ରଥାରୂଢ଼ ମହାପ୍ରଭୁଙ୍କୁ ସୁନାବେଶରେ ଦେଖିବାକୁ କୋଟି କୋଟି ଭକ୍ତ ପ୍ରତୀକ୍ଷା କରିଥିଲେ । ଲକ୍ଷାଧିକ ଭକ୍ତ ବଡ଼ଦାଣ୍ଡରେ ଦଣ୍ଡାୟମାନ ଥିଲାବେଳେ ଟିଭି ପରଦା ସମ୍ମୁଖରେ କୋଟି କୋଟି ଭକ୍ତ ପ୍ରତୀକ୍ଷା କରୁଥିଲେ । ଏପଟେ ସେବାୟତଙ୍କ ଦ୍ୱନ୍ଦ ନେଇ ଅଟକି ରହିଥିଲା ଠାକୁରଙ୍କ ନୀତି । ବଡ଼ଠାକୁରଙ୍କ ସୁନାବେଶ ଆରମ୍ଭ ପୂର୍ବରୁ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ବିବାଦ ନତୁଟିବାରେ ଶ୍ରୀବିଗ୍ରହଙ୍କ ନୀତି ବିଳମ୍ବ ହେଲା । ବିଶୃଙ୍ଖଳାକାରୀଙ୍କ ପାଇଁ ଶ୍ରୀମନ୍ଦିର ସେବାୟତ ସମାଜ ବଦ୍ନାମ ହେଲା । ବେଶ ବିଳମ୍ବ ହେବାରେ ବେଶ୍ କିଛି ସମୟ ଧରି ନିରାଶ ହେଲେ ଭକ୍ତ ।
ମିଳିଥିବା ସୂଚନା ଅନୁଯାୟୀ ସେଦିନ ନୀତି ସଅଳ ହୋଇ ଠାକୁରଙ୍କ ସୁନାବେଶ ଶୀଘ୍ର କରିବାକୁ ସମସ୍ତ ପ୍ରସ୍ତୁତି ଥିଲା । ଶ୍ରୀବଳଭଦ୍ରଙ୍କ ସୁନାବେଶ ଆରମ୍ଭ ପୂର୍ବରୁ ପ୍ରମୁଖ ଦଇତାପତି ସେବାୟତ ଠାକୁରଙ୍କ ସ୍ୱର୍ଣ୍ଣ ଅଳଙ୍କାର ସଂସ୍କାରକୁ ନେଇ ପ୍ରଶ୍ନ ଉଠାଇଥିଲେ । ଶ୍ରୀମନ୍ଦିର ପରମ୍ପରାକ୍ରମେ ଭିତର ମହାପାତ୍ର ସ୍ୱର୍ଣ୍ଣ ଅଳଙ୍କାର ସଂସ୍କାର ପରେ ଠାକୁରଙ୍କୁ ଲାଗି ହେବା କଥା ସିଂହାରୀ ସେବକ କହିଥିଲେ । ସଂସ୍କାର ଓ ତନଖି ପରେ ସୁନାବେଶ ଆରମ୍ଭ ନିୟମ । ମୁଖ୍ୟ ବାଡ଼ଗ୍ରାହୀ ଓ ପୁଷ୍ପାଳକ ସେବକ ଠାକୁରଙ୍କୁ ବେଶ କରିଥାନ୍ତି । ଏହାକୁ ନେଇ ବୁଝାମଣା ନହେବାରେ ଠାକୁରଙ୍କ ନୀତି ବନ୍ଦ ରହିଲା । ଖବର ପାଇ ଶ୍ରୀମନ୍ଦିର କମାଣ୍ଡର ଓ ପ୍ରଶାସକ ବିଧି ମୁତାବକ ନୀତି ଆଗେଇବାକୁ କହିଲେ । ପୁଣି କିଛି ସମୟ କଥାକଟି ପରେ ଠାକୁରଙ୍କ ବେଶ ଆରମ୍ଭ ହୋଇଥିଲା । ସେତେବେଳକୁ ଠାକୁରଙ୍କ ନୀତି ବେଶ୍ କିଛି ସମୟ ବିଳମ୍ବ ହୋଇଯାଇଥିଲା । ଏହାକୁ ସମସ୍ତେ ମିଳିମିଶି ଚାପି ଦେବାରେ ବିଶୃଙ୍ଖଳା ପ୍ରଘଟ ହୋଇ ନଥିଲା ।
ଦିନକୁ ଦିନ ଲମ୍ବୁଛି ଶ୍ରୀମନ୍ଦିର ନୀତି ବିଭ୍ରାଟ ତାଲିକା । ଚଳିତ ବର୍ଷ ରଥ ଯାତ୍ରାରେ ସୀମାପାର ହୋଇଗଲା ନୀତିକାନ୍ତିରେ ବିଶୃଙ୍ଖଳା । ଅଣସରରେ ହେଲା ମହାପ୍ରଭୁଙ୍କ ସେନାପଟା ଲାଗି । ନେତ୍ରଦାନ ପୂର୍ବରୁ ପହଣ୍ଡି ପାଇଁ ପ୍ରସ୍ତୁତ ହୋଇଗଲେ ଠାକୁରେ । ଅବହେଳାରୁ ରଥାରୂଢ଼ ବଡ଼ଠାକୁରଙ୍କ ମଳିନ ଶ୍ରୀମୁଖ ଦର୍ଶନ କରି କ୍ଷୋଭ ପ୍ରକାଶ କଲେ ଲକ୍ଷ ଲକ୍ଷ ଭକ୍ତ । ଆଡ଼ପ ପହଣ୍ଡି ସମୟରେ ଚାର ଉପରେ ପଛପାଶ୍ୱର୍ର ଭାର ସମ୍ଭାଳିବା ନିମନ୍ତେ ଲାଗିଥିବା ପାଟଡୋର ଖସି ଯିବା ଫଳରେ ବଡ଼ଠାକୁର ଖସି ପଡ଼ିଲେ । ସାରା ବିଶ୍ୱବାସୀ ଠାକୁରଙ୍କ ଏଭଳି ସ୍ଥିତି ଦେଖି କ୍ଷୁବ୍ଧ ହେଲେ । ନୀଳାଦ୍ରି ବିଜେରେ ମହାପ୍ରଭୁଙ୍କ ପହଣ୍ଡି ପୂର୍ବରୁ ବର୍ଷା ହୋଇଥିଲା । ଓଦା ଚାରମାଳରେ ପ୍ରଭୁଙ୍କ ପହଣ୍ଡି ସମୟରେ ପଛ ଡୋରକୁ ରଥର ବିଭିନ୍ନ ଅଂଶରେ ଗୁଡ଼ାଇ ଯେପରି ସାବଧାନତା ଅବଲମ୍ବନ କରାଗଲା ଶ୍ରୀବଳଭଦ୍ରଙ୍କ ଆଡ଼ପ ପହଣ୍ଡି ସମୟରେ ମଧ୍ୟ ସେଭଳି ସତର୍କତା ଅବଲମ୍ବନ କରାଯାଇପାରିଥାନ୍ତା । ଆଡ଼ପମଣ୍ଡପ ପହଣ୍ଡି ବିଜେ ରାତିରେ ଗୁଣ୍ଡିଚା ମନ୍ଦିରରେ ଯାତ୍ରୀଙ୍କ ପ୍ରବେଶ ନେଇ ସେବାୟତଙ୍କ ଭିତରେ ପାଟିତୁଣ୍ଡ ହୋଇଥିଲା । ପୁଣି ମହାପ୍ରଭୁଙ୍କ ସୁନାବେଶ ପୂର୍ବରୁ ଦ୍ୱନ୍ଦ୍ୱ ଉପୁଜିଲା ।
ଏଠାରେ ସୂଚନାଯୋଗ୍ୟ, ଗତବର୍ଷ ରଥ ଯାତ୍ରାରେ ପରଦିନ ଭୋର୍ରୁ ହୋଇଥିଲା ହେରାପଞ୍ଚମୀ ନୀତି । ମହାପ୍ରଭୁଙ୍କ ନୀତି ବିଭ୍ରାଟକୁ ଗୁରୁତର ସହ ନିଆ ଯାଉ ନ ଥିବାରୁ ଶ୍ରୀମନ୍ଦିରରେ ବିଶୃଙ୍ଖଳା ଆହୁରି ବଢ଼ୁଛି । ତର୍ଜମା କି ସମୀକ୍ଷା ନହେବାରେ ବିଶୃଙ୍ଖଳିତଙ୍କୁ ଦଣ୍ଡ ମିଳୁନି ନାହିଁ କି ନିଷ୍ଠାପରଙ୍କୁ ପ୍ରଶଂସା । ଶ୍ରୀମନ୍ଦିର ସେବାୟତ ବିଶୃଙ୍ଖଳିତ! ପ୍ରଶାସକ ହୁଗୁଳା । ବିଶୃଙ୍ଖଳାକାରୀଙ୍କୁ ପ୍ରଶାସନ ଡରୁଥିବା ନେଇ ଆଲୋଚନା ହେଉଛି । ଏହାଦ୍ୱାରା ବଡ଼ଦେଉଳ ପ୍ରତି ଭକ୍ତର ଭାବାବେଗ ହ୍ରାସ ପାଉଛି । କିଛି ବିଶୃଙ୍ଖଳାକାରୀଙ୍କ ପାଇଁ ଶ୍ରୀମନ୍ଦିର ସେବକ ସମାଜ ବଦ୍ନାମ୍ ହେଉଛନ୍ତି । ଏନେଇ ଜଣେ ବରିଷ୍ଠ ସେବାୟତ ଉଦ୍ବେଗ ପ୍ରକାଶ କରି କୁହନ୍ତି ମହାପ୍ରଭୁଙ୍କ ନୀତି ଯାହା ସବୁ ଶାସ୍ତ୍ର ସମ୍ମତ । ଯଦି କେଉଁଠି କିଛି କାହା ପକ୍ଷରୁ ବିଭ୍ରାଟ ହୁଏ ତୁରନ୍ତ ଏହାର ସମୀକ୍ଷା ତଥା ପୁଙ୍ଖାନୁପୁଙ୍ଖ ଆଲୋଚନା ହେବା କଥା । ଆଗକୁ ସମସ୍ୟା ନହେବା ପାଇଁ ବିଶୃଙ୍ଖଳାକାରୀଙ୍କୁ ନିୟମ ଅନୁସାରେ ତାଗିଦ୍ କରାଯିବା କଥା । ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମାଧବ ମହାପାତ୍ର କୁହନ୍ତି ବିଭ୍ରାଟ ପରେ କାହା ପ୍ରତି କଣ କାର୍ଯ୍ୟାନୁଷ୍ଠାନ ହେଉଛି କି ନାହିଁ ଅଲଗା କଥା । ଗତ ଥର ରଥ ଯାତ୍ରା ପରେ ଆଲୋଚନାରେ ସବୁ କିଛି ସମୀକ୍ଷା ହୋଇଥିଲା । ପ୍ରଥମେ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଆଲୋଚନା ହେବ । ପରେ ଛତିଶା ନିଯୋଗରେ ଆଲୋଚନା ହୁଏ । ଏବେ ରଥ ଯାତ୍ରା ସରିଲା । ଶୀଘ୍ର ସମୀକ୍ଷା ବୈଠକ କରାଯିବା ଦରକାର ବୋଲି ସେ କହିଛନ୍ତି ।
