ପୁରୀ,୧୧/୦୭: ପତ୍ନୀଙ୍କୁ ବଡ଼ଦେଉଳରେ ଛାଡ଼ି ଭାଇଭଉଣୀଙ୍କୁ ସାଙ୍ଗରେ ନେଇ ମହାପ୍ରଭୁ ରଥ ଯାତ୍ରାରେ ଆସିଛନ୍ତି । ମହାପ୍ରଭୁଙ୍କ ଏଭଳି କାର୍ଯ୍ୟ ପାଇଁ ପ୍ରଚଣ୍ଡ ଅଭିମାନ କରିଛନ୍ତି ମହାଲକ୍ଷ୍ମୀ । ଏଣୁ ଗୁଣ୍ଡିଚାଘର ସମ୍ମୁଖରେ ଲକ୍ଷ୍ମୀ ଠାକୁରାଣୀ ବିଜେ ହେବେ । ରୋଷ କରି ମହାପ୍ରଭୁଙ୍କୁ ନେଇ ଆସିଥିବା ନନ୍ଦିଘୋଷ ରଥ ଭାଙ୍ଗିବେ । ଜଗମୋହନରେ  ଠାକୁରାଣୀ ବିଜେ ହୋଇ ଠାକୁରଙ୍କ ଆଜ୍ଞାମାଳ ଲାଗି ହେବେ ।  ପରେ ହେରାଗୌରୀ ସାହି ହୋଇ ଠାକୁରାଣୀ ଶ୍ରୀମନ୍ଦିରକୁ  ଫେରିବେ । 

ଗୁରୁବାର ରାତିରେ ହେରାପଞ୍ଚମୀ ନୀତି ପାଳନ ଅବସରରେ ସେବକ ଓ ଦାସୀଙ୍କ ଗହଣରେ ମହାଲକ୍ଷ୍ମୀଙ୍କ  ଏହି ମାନବୀୟ ଲୀଳା ଅନୁଷ୍ଠିତ ହେବ । ଏହି ନୀତିବହୁଳ  ଦିନପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ପ୍ରସ୍ତୁତ  ହୋଇଛି । ରାତି ସାଢ଼େ ୯ଟାରେ ମା'ଲକ୍ଷ୍ମୀଠାକୁରାଣୀ ରଥ ନିକଟରେ ପାରମ୍ପରିକ ନୀତି ସାରି ଜଗମୋହନକୁ  ବିଜେ କରିବେ । ପରେ ମହାଲକ୍ଷ୍ମୀଙ୍କୁ ଆଜ୍ଞାମାଳ ଲାଗି  ହୋଇ ୯ଟା ୩୫ରେ ସନ୍ଧ୍ୟାଧୂପ ଟେରା ପଡ଼ିବ ।  ଶ୍ରୀମନ୍ଦିରରୁ ବଡ଼ଦାଣ୍ଡ ଆଧ୍ୟାତ୍ମିକ ପରିବେଶ ସୃଷ୍ଟି ହେବ ।