ମୁମ୍ବାଇ ୨୩/୦୧: ଆଜିଠୁ ରଣଜୀ ଟ୍ରଫିର ଦ୍ୱିତୀୟ ଭାଗ ଆରମ୍ଭ ହେବ । ଲିଗ୍ ପର୍ଯ୍ୟାୟର ପଞ୍ଚମ ରାଉଣ୍ଡ ଶେଷ ହେବା ପରେ ରଣଜୀ ଟ୍ରଫିକୁ ସ୍ଥଗିତ ରଖାଯାଇ ଦୁଇ ସୀମିତ ଓଭର ଘରୋଇ ଟୁର୍ଣ୍ଣାମେଣ୍ଟ ସୟଦ ମୁସ୍ତାକ ଅଲି ଟି-ଟ୍ୱେଣ୍ଟି ଓ ବିଜୟ ହଜାରେ ଟ୍ରଫି ଆୟୋଜନ କରାଯାଇଥିଲା । ଲିଗ୍ ପର୍ଯ୍ୟାୟର ୨ଟି ରାଉଣ୍ଡ ମୁକାବିଲା ଖେଳାଯିବା ସହ ନକ୍ ଆଉଟ୍ ଚୂଡ଼ାନ୍ତ ହେବ । ପ୍ରଥମ ଭାଗ ତୁଳନାରେ ଦ୍ୱିତୀୟ ଭାଗ ବେଶ୍ ସଂଘର୍ଷପୂର୍ଣ୍ଣ ରହିବ ଓ ଦର୍ଶକଙ୍କୁ ଆକର୍ଷିତ କରିବ । ଏହା ପଛର ଅସଲ କାରଣ ହେଉଛି ଭାରତୀୟ ଟେଷ୍ଟ ଦଳର ଅଧିକାଂଶ ସଦସ୍ୟ ରଣଜୀ ଟ୍ରଫି ଜରିଆରେ ଘରୋଇ କ୍ରିକେଟ୍କୁ ଫେରିବେ । ରୋହିତ ଶର୍ମା, ଯଶସ୍ୱୀ ଜୈସ୍ୱାଲ, ରିଷଭ ପନ୍ତ, ଶୁଭମନ ଗିଲ, ରବିନ୍ଦ୍ର ଜାଡେଜା ପ୍ରମୁଖ ଗ୍ରାଉଣ୍ଡକୁ ଓହ୍ଲାଉଛନ୍ତି । ବିରାଟ କୋହଲି ଅନ୍ତିମ ଲିଗ୍ ମ୍ୟାଚ୍ ଜରିଆରେ ରଣଜୀ ଟ୍ରଫିକୁ ପ୍ରତ୍ୟାବର୍ତ୍ତନ କରିବେ ।
ରୋହିତ ୧୦ବର୍ଷ ପରେ ରଣଜୀ ଟ୍ରଫି ଖେଳିବାକୁ ଯାଉଛନ୍ତି । ଶେଷ ଥର ପାଇଁ ସେ ୨୦୧୫ରେ ଏହି ପ୍ରିମିୟର ଘରୋଇ ଟୁର୍ଣ୍ଣାମେଣ୍ଟ ଖେଳିଥିଲେ । ଡିଫେଣ୍ଡିଂ ଚାମ୍ପିଅନ୍ ମୁମ୍ବାଇ ଷଷ୍ଠ ରାଉଣ୍ଡ୍ରେ ଜମ୍ମୁ ଓ କାଶ୍ମୀରକୁ ଭେଟିବ । ଗୁରୁବାରଠୁ ଷ୍ଟାର ସ୍ପୋର୍ଟ୍ସରେ ଏହି ମ୍ୟାଚର ସିଧା ପ୍ରସାରଣ ହେବ । ଅଜିଙ୍କ୍ୟ ରାହାଣେ ମୁମ୍ବାଇ ଦଳର ନେତୃତ୍ୱ ନେବେ । ରୋହିତ ଓ ଜୈସ୍ୱାଲ ଓପନ କରିବେ । ଶ୍ରେୟାସ ଆୟର, ସର୍ଦୁଲ ଠାକୁର, ଶିବମ ଦୁବେ ମଧ୍ୟ ଏହି ମ୍ୟାଚ୍ ଖେଳୁଛନ୍ତି । ମୁମ୍ବାଇ ପକ୍ଷରୁ ଖେଳୁଥିବା ଟେଷ୍ଟ ଦଳର ସଦସ୍ୟ ସର୍ଫରାଜ ଖାନ୍ ସମ୍ପ୍ରତି ଆହତ ଥିବାରୁ ଏହି ମ୍ୟାଚ୍ ଖେଳୁ ନାହାନ୍ତି । ତାଙ୍କ ସାନ ଭାଇ ମୁସିର ଖାନ୍ ମଧ୍ୟ ଫିଟ୍ ନାହାନ୍ତି । ଗତ ବର୍ଷ ଏକ ସଡ଼କ ଦୁର୍ଘଟଣାରେ ମୁସିର ଆହତ ହୋଇଥିଲେ ।
ପନ୍ତ, ଜାଡେଜା, ପୂଜାରା ମୁଖ୍ୟ ଆକର୍ଷଣ ଗ୍ରୁପ୍ ଡି’ରେ ଦିଲ୍ଲୀ ଷଷ୍ଠ ରାଉଣ୍ଡ୍ରେ ସୌରାଷ୍ଟ୍ରକୁ ଭେଟିବେ । ଏହି ମ୍ୟାଚ ଜରିଆରେ ପନ୍ତ ଓ ଜାଡ଼ୋଜା ଗ୍ରାଉଣ୍ଡକୁ ଓହ୍ଲାଇବେ । କିନ୍ତୁ ସମସ୍ତଙ୍କ ନଜର ଚେତେଶ୍ୱର ପୂଜାରାଙ୍କ ଉପରେ ରହିବ । ବେକରେ ଯନ୍ତ୍ରଣା ଯୋଗୁଁ କୋହଲି ଏହି ମ୍ୟାଚ୍ ଖେଳୁ ନାହାନ୍ତି । ୩୦ତାରିଖରୁ ଆରମ୍ଭ ହବାକୁ ଥିବା ରେଳବାଇ ବିପକ୍ଷ ମୁକାବିଲାରେ କୋହଲି ଖେଳିବେ ବୋଲି ଦିଲ୍ଲୀ କ୍ରିକେଟ୍ ଆସୋସିଏସନ୍(ଡିଡିସିଏ)କୁ ଜଣାଇ ସାରିଛନ୍ତି । କୋହଲି ଶେଷ ଥର ୨୦୧୨ରେ ରଣଜୀ ଟ୍ରଫି ଖେଳିଥିଲେ । ସେହିପରି ୨୦୧୭ ପରେ ପନ୍ତ ପ୍ରଥମ କରି ରଣଜୀ ଟ୍ରଫି ଖେଳିବାକୁ ଯାଉଛନ୍ତି ।
ଖେଳିବେ ଗିଲ୍, ପାଡ଼ିକଲ, ପ୍ରସିଦ୍ଧ
ଏଲିଟ୍ ଗ୍ରୁପ୍-ସି’ର ଅନ୍ୟ ଏକ ମ୍ୟାଚ୍ରେ କର୍ଣ୍ଣାଟକ ଓ ପଞ୍ଜାବ ପରସ୍ପରକୁ ଭେଟିବେ । ଏହି ମ୍ୟାଚ୍ ଜରିଆ ଶୁଭମନ ଗିଲ ଗ୍ରାଉଣ୍ଡକୁ ଓହ୍ଲାଇବେ । କର୍ଣ୍ଣାଟକ ପକ୍ଷରୁ କେଏଲ ରାହୁଲ ଅନୁପସ୍ଥିତ ରହିବେ । କିନ୍ତୁ ବର୍ଡର-ଗାଭାସ୍କର ଟ୍ରଫି ଖେଳି ଫେରିଥିବା ଦେବଦତ୍ତ ପାଡ଼ିକଲ ଓ ପ୍ରସିଦ୍ଧ କ୍ରିଷ୍ଣା ଏହି ମ୍ୟାଚ୍ ଖେଳୁଛନ୍ତି । ରାହୁଲ ସମ୍ପ୍ରତି ଆହତ ଅଛନ୍ତି । ବର୍ଡର-ଗାଭାସ୍କର ଟ୍ରଫି ସମୟରେ ତାଙ୍କ କହୁଣୀରେ ଆଘାତ ଲାଗିଥିଲା ।
ଖେଳିବେନି ଈଶ୍ୱରନ୍, ଆକାଶ ଦୀପ
ଗ୍ରୁପ୍-ସିରେ ବେଙ୍ଗଲ୍ ଗୁରୁବାର ହରିଆନାକୁ ଭେଟିବ । ବେଙ୍ଗଲର ଦୁଇ ଷ୍ଟାର ଖେଳାଳି ଅଭିମନ୍ୟୁ ଈଶ୍ୱରନ୍ ଓ ଆକାଶ ଦୀପ ମଧ୍ୟ ଏହି ମ୍ୟାଚ୍ ଖେଳୁ ନାହାନ୍ତି । ବର୍ଡର-ଗାଭାସ୍କର ଟ୍ରଫିର ବକ୍ସିଂ ଡେ’ ଟେଷ୍ଟରେ ଆକାଶ ଦୀପ ଆହତ ହୋଇଥିଲେ । ଈଶ୍ୱରନ ଭାରତ ଫେରିବା ପରେ ଏକ କ୍ଲବ୍ ସ୍ତରୀୟ ମ୍ୟାଚ୍ ଖେଳୁଥିବା ବେଳେ ଆହତ ହୋଇଛନ୍ତି । ତାଙ୍କ ଡାହାଣ ହାତ ମଝି ଆଙ୍ଗୁଳି ଭାଙ୍ଗି ଯାଇଛି । ଫିଟ୍ ହେବା ପାଇଁ ତାଙ୍କୁ ୩ସପ୍ତାହ ସମୟ ଲାଗିବ ।
ସିରାଜଙ୍କୁ ବିଶ୍ରାମ
ଗ୍ରୁପ୍ରେ ହାଇଦ୍ରାବାଦ ଗୁରୁବାର ହିମାଚଳକୁ ଭେଟିବ । ସିରାଜ ଏହି ମ୍ୟାଚ୍ ଖେଳୁ ନଥିଲେ ହେଁ ହାଇଦ୍ରାବାଦ ଦଳ ସହ ଅଭ୍ୟାସ କରୁଛନ୍ତି । ସେ ୩୦ତାରିଖରୁ ଆରମ୍ଭ ହେବାକୁ ଯାଉଥିବା ବିଦର୍ଭ ବିପକ୍ଷ ମୁକାବିଲା ଖେଳିବେ । ବର୍ଡର-ଗାଭାସ୍କର ଟ୍ରଫିରେ ସେ ୫ଟି ଯାକ ଟେଷ୍ଟ ଖେଳଥିଲେ । ଫିଟ୍ ଥିଲେ ହେଁ ତାଙ୍କୁ ହିମାଚଳ ବିପକ୍ଷ ମ୍ୟାଚ୍ରୁ ବିଶ୍ରାମ ଦିଆଯାଇଛ
