ନୂଆଦିଲ୍ଲୀ: ଗୁରୁବାର ନେଦରଲାଣ୍ଡସ୍ରେ ଆୟୋଜିତ ଟାଟା ଷ୍ଟିଲ୍ ଚେସ୍ ଟୁର୍ଣ୍ଣାମେଣ୍ଟରେ ଜର୍ମାନୀର ଭିନସେଣ୍ଟ କାଇମରଙ୍କୁ ପରାସ୍ତ କରି ବଡ଼ ରେକର୍ଡ କରିଛନ୍ତି ବିଶ୍ବ ଚାମ୍ପିଅନ୍ ଡି. ଗୁକେଶ । ଭିନସେଣ୍ଟଙ୍କୁ ହରାଇବା ପରେ ଗୁକେଶ ‘ହାଏଷ୍ଟ-ରାଙ୍କଡ୍’ ଭାରତୀୟ ଚେସ୍ ଖେଳାଳି ହୋଇପାରିଛନ୍ତି । ୩.୫ ଅଙ୍କ ହାସଲ କରିବା ସହ ଭାରତର ଅର୍ଜୁନ ଏରିଗାଇସିଙ୍କୁ ପଛରେ ପକାଇଛନ୍ତି ଗୁକେଶ । ସେହିଭଳି ଆର ପ୍ରଜ୍ଞାନନ୍ଦ ପୂର୍ବତନ ବିଶ୍ବ ଚାମ୍ପିଅନ ବିଶ୍ବନାଥନ ଆନନ୍ଦଙ୍କୁ ପଛରେ ପକାଇ ତୃତୀୟ ସ୍ଥାନ ଅଧିକାର କରିଛନ୍ତି । ତେବେ ଗୁକେଶ ଲାଇଭ୍ ରେଟିଂସ ଅନୁସାରେ ବିଶ୍ବ ରାଙ୍କିଂରେ ଚତୁର୍ଥ ସ୍ଥାନରେ ପହଞ୍ଚିଛନ୍ତି ।
ଗୁକେଶ ସାତୋଟି ଇଏଲଓ ପଏଣ୍ଟ ହାସଲ କରିବା ପରେ ତାଙ୍କର ଲାଇଭ୍ ରେଟିଂ ପଏଣ୍ଟ ୨୭୮୪ ହୋଇଥିଲା । ଅନ୍ୟପଟେ ଭାରତର ଏକ ନମ୍ୱର ଚେସ୍ ଖେଳାଳି ଥିବା ଏରିଗାଇସି ୨୧.୫ ପଏଣ୍ଟ ହରାଇବା ପରେ ତାଙ୍କର ଲାଇଭ୍ ରେଟିଂ ୨୭୭୯ ପଏଣ୍ଟ ହୋଇଛି । ଏହା ପୂର୍ବରୁ ଏରିଗାଇସି ୨୮୦୦ କ୍ଲବରେ ସାମିଲ ଥିବା ଏକମାତ୍ର ଭାରତୀୟ ଖେଳାଳି ଥିଲେ । ଟାଟା ଷ୍ଟିଲ୍ ଚେସ୍ ଟୁର୍ଣ୍ଣାମେଣ୍ଟରେ ଖରାପ ଫର୍ମ ଯୋଗୁ ଏରିଗାଇସି ବର୍ତ୍ତମାନ ସୁଦ୍ଧା ୱିଜ୍ ଆନ୍ ଜୀରେ ତିନୋଟି ଗେମ୍ ହାରିଛନ୍ତି ଏବଂ ଦୁଇଟି ଡ୍ର' କରିଛନ୍ତି । ଟୁର୍ଣ୍ଣାମେଣ୍ଟରେ ସେ ଲିଓନ୍ ଲୁକ୍ ମେଣ୍ଡୋଙ୍କାଙ୍କ ସହ ମିଳିତ ଭାବେ ଶେଷ ସ୍ଥାନରେ ରହିଛନ୍ତି ।
ଅନ୍ୟପଟେ, ଗୁକେଶ ଟୁର୍ଣ୍ଣାମେଣ୍ଟରେ ଅପରାଜିତ ରହି ଦୁଇଟି ବିଜୟ ଏବଂ ତିନୋଟି ଡ୍ର’ ଖେଳିଛନ୍ତି । ଭ୍ଲାଡିମିର୍ ଫେଡୋସିଭ୍ ଏବଂ ଆଲେକ୍ସୀ ସାରାନାଙ୍କ ବିପକ୍ଷରେ ଡ୍ର’ କରିଥିଲେ । ଅନିଷ ଗିରି ଏବଂ ଭିନସେଣ୍ଟ କାଇମରଙ୍କ ବିପକ୍ଷରେ ମ୍ୟାଚ୍ ଜିତିଥିଲେ । ସେପଟେ ଯଦି ଲାଇଭ୍ ରେଟିଂ ବଦଳେ ତେବେ ଏରିଗାଇସି ପୁନର୍ବାର ଗୁକେଶଙ୍କ ସ୍ଥାନ ନେଇପାରନ୍ତି । ଟୁର୍ଣ୍ଣାମେଣ୍ଟରେ ଆହୁରି ୮ଟି ସ୍ୱିସ୍ ରାଉଣ୍ଡ ଏବଂ ପ୍ଲେ ଅଫ୍ ଖେଳାଯିବ ।ଟୁର୍ଣ୍ଣାମେଣ୍ଟରେ ଅଂଶଗ୍ରହଣ ନକରିବା ସତ୍ତ୍ୱେ ମାଗନସ୍ କାର୍ଲସେନ୍ ୨୮୩୨.୫ ଲାଇଭ୍ ରେଟିଂ ପଏଣ୍ଟ ସହ ପ୍ରଥମ ସ୍ଥାନରେ ଅଛନ୍ତି । ଦ୍ୱିତୀୟ ଆମେରିକୀୟ ଜିଏମ୍ ହିକାରୁ ନାକାମୁରା (୨୮୦୨) ଏବଂ ତୃତୀୟ ସ୍ଥାନରେ ଫାବିଆନୋ କରୁଆନା (୨୭୮୯) ଅଛନ୍ତି ।
