ନୂଆଦିଲ୍ଲୀ ୧୦/୦୩ : ଆଜି, ରାଜ୍ୟସଭାରେ ଭାରତୀୟ ରେଳର ପରିଚାଳନାକୁ ଆଧୁନିକ ଏବଂ ସୁସଂଗଠିତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ବିଧେୟକ ପାରିତ କରାଗଲା । ଏହି ବିଧେୟକ ଉପରେ ଆଲୋଚନା କରି ରେଳ, ସୂଚନା ପ୍ରସାରଣ ଓ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଲେ ଯେ, ଏହି ବିଧେୟକ ରେଳ କ୍ଷେତ୍ରରେ ଶକ୍ତିଶାଳୀକରଣ, କାର୍ଯ୍ୟକ୍ଷମତା ବୃଦ୍ଧି ଏବଂ ସହଯୋଗୀ ସଂଘବାଦକୁ ସୁଦୃଢ଼ କରିବ।

ଆଲୋଚନାରେ ଭାଗନେଇଥିବା ୨୫ ଜଣ ସାଂସଦଙ୍କୁ ରେଳମନ୍ତ୍ରୀ ଧନ୍ୟବାଦ ଦେବାସହ କହିଛନ୍ତି ଯେ ବର୍ତ୍ତମାନର ନିୟମକୁ ସରଳିକରଣ କରିବା ପାଇଁ ପଦକ୍ଷେପ ନିଆଯାଇଅଛି ଯେଉଁଥିରେ ରାଜ୍ୟସରକାରଙ୍କ କ୍ଷମତା କମ ନହୋଇ ବିକେନ୍ଦ୍ରିକରଣକୁ ପ୍ରୋତ୍ସାହିତ କରାଯାଉଛି l ସେ କହିଛନ୍ତି ଯେ କ୍ଷେତ୍ରୀୟ ରେଳବାଇ ମହାପ୍ରବନ୍ଧକ ମାନଙ୍କୁ ୧୦୦୦ କୋଟି ଟଙ୍କା ପ୍ରକଳ୍ପ ଗୁଡିକୁ ସ୍ୱୀକୃତି ଦେବାପାଇଁ ପୂର୍ଣ୍ଣ କ୍ଷମତା ଦିଆଯାଉଅଛି l ଶ୍ରୀ ବୈଷ୍ଣବ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ଯେଉଁ ରାଜ୍ୟରେ ଦଳ କ୍ଷମତାରେ ନାହିଁ, ସେଠାରେ ମଧ୍ୟ ସରକାରଙ୍କ ଦ୍ୱାରା ରେଳବାଇ ପାଇଁ ପର୍ଯ୍ୟାପ୍ତ ବଜେଟ୍ ଆବଣ୍ଟନ କରାଯାଇଛି। କେରଳ, ତାମିଲନାଡୁ, ଓଡ଼ିଶା ଏବଂ ପଶ୍ଚିମବଙ୍ଗ ଭଳି ରାଜ୍ୟଗୁଡ଼ିକ ପୂର୍ବ ସରକାରଙ୍କ ତୁଳନାରେ ବହୁ ଗୁଣ ଅଧିକ ବଜେଟ୍ ପାଇଛନ୍ତି।

ରେଳ ଷ୍ଟେସନରେ ଭିଡ଼ ପରିଚାଳନା ସମ୍ପର୍କରେ ଉଠାଯାଇଥିବା ଚିନ୍ତା ବିଷୟରେ ମଧ୍ୟ ଶ୍ରୀ ବୈଷ୍ଣବ ଆଲୋଚନା କରିଥିଲେ। ସେ ଘୋଷଣା କରିଛନ୍ତି ଯେ ୬୦ଟି ପ୍ରମୁଖ ରେଳ ଷ୍ଟେସନରେ ସମ୍ପୂର୍ଣ୍ଣ ପ୍ରବେଶ ନିୟନ୍ତ୍ରଣ କାର୍ଯ୍ୟକାରୀ କରାଯିବ, କେବଳ ସୁନିଶ୍ଚିତ ଟିକେଟ୍ ଥିବା ଯାତ୍ରୀମାନଙ୍କୁ ପ୍ଲାଟଫର୍ମରେ ପ୍ରବେଶ କରିବାକୁ ଅନୁମତି ଦିଆଯିବ। ଏହା ସହିତ, ଅତ୍ୟଧିକ ଭିଡ଼ ଥିବା ଷ୍ଟେସନଗୁଡ଼ିକରେ ଆଶାତୀତ ସଂଖ୍ୟାରେ ଯାତ୍ରୀଙ୍କୁ ସ୍ଥାନ ଦେବା ପାଇଁ ସ୍ୱତନ୍ତ୍ର ଟ୍ରେନ୍ ନିୟୋଜିତ କରାଯିବ।

ତାଙ୍କ ଅଭିଭାଷଣ ଶେଷ କରି, ରେଳ ମନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ 'ବିକଶିତ ଭାରତ' ଦୃଷ୍ଟିକୋଣକୁ ଦୋହରାଇଲେ ଏବଂ ଗତ ଦଶନ୍ଧିରେ ପଡ଼ିଥିବା ଦୃଢ଼ ମୂଳଦୁଆ ଉପରେ ନିର୍ମାଣ କରିବା ପାଇଁ ରେଳ କର୍ମଚାରୀ ଏବଂ ସମସ୍ତ ଅଂଶୀଦାରମାନଙ୍କୁ ତିନି ଗୁଣ ଅଧିକ କଠିନ ପରିଶ୍ରମ କରିବାକୁ ଅନୁରୋଧ କରିଛନ୍ତି । ଏହି ବିଲ୍ ପାସ୍ ହେବା ଭାରତୀୟ ରେଳବାଇର ଆଧୁନିକୀକରଣ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ, ଯାହା ଯାତ୍ରୀମାନଙ୍କ ପାଇଁ ଅଧିକ ସୁରକ୍ଷିତ, ଦକ୍ଷ ଏବଂ ସୁବିଧାଜନକ ସେବା ସୁନିଶ୍ଚିତ କରିବ।

ରେଳବାଇ ବୋର୍ଡର ତତ୍ତ୍ୱାବଧାନରେ ରେଳବାଇ ଏହାର ଜୋନ୍, ଡିଭିଜନ ଏବଂ ଉତ୍ପାଦନ ୟୁନିଟ୍ ଇତ୍ୟାଦି ମାଧ୍ୟମରେ କାର୍ଯ୍ୟ କରେ। ରେଳବାଇ ବୋର୍ଡ ରେଳ ପରିଚାଳନା ପାଇଁ ସମସ୍ତ ନୀତିଗତ ନିଷ୍ପତ୍ତି ମଧ୍ୟ ନେଇଥାଏ। ଏବେ ରେଳ ସଂଶୋଧନ ଆଇନ ୨୦୨୫ ବିଲ୍ ଉପନିବେଶବାଦୀ ଯୁଗର ବ୍ୟବସ୍ଥାକୁ ବଦଳାଇବ। ଏବେ ରେଳବାଇ ବୋର୍ଡର ବ୍ୟବସ୍ଥାଗୁଡ଼ିକୁ ରେଳବାଇ ଆଇନ, ୧୯୮୯ରେ ସାମିଲ କରାଯାଇଛି। ନୂତନ ଆଇନ ବିଲ୍ ଦୁଇଟି ଆଇନର ଉଲ୍ଲେଖକୁ ହ୍ରାସ କରିବ। ଏବେ କେବଳ ଗୋଟିଏ ଆଇନକୁ ଉଲ୍ଲେଖ କରିବାକୁ ପଡିବ। ରେଳ ବୋର୍ଡ, ଜୋନ୍, ଡିଭିଜନ, ଉତ୍ପାଦନ ୟୁନିଟ୍ ଇତ୍ୟାଦିର ପ୍ରକୃତି, ପରିସର ଏବଂ କାର୍ଯ୍ୟକାରିତା ସମାନ ରହିବ।