ନୂଆଦିଲ୍ଲୀ,୨୯/୧୨: ରୁଷ ବାୟୁସୀମାରେ ଗତ ବୁଧବାର ଆଜରବୈଜାନ ଏୟାର ଲାଇନ୍ସର ଏକ ବିମାନ (ଫ୍ଲାଇଟ ଜେ ୨-୮୨୪୩) ଦୁର୍ଘଟଣାକୁ ନେଇ  ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ତାଙ୍କ ଆଜରବୈଜାନ ପ୍ରତିପକ୍ଷ ଇଲହମ ଆଲିୟେଭଙ୍କୁ କ୍ଷମା ମାଗିଛନ୍ତି । ସେ ଦର୍ଶାଇଛନ୍ତି ଯେ ବିମାନ ଦୁର୍ଘଟଣାରେ ରୁଷର କୌଣସି ଭୂମିକା ନାହିଁ । ଗ୍ରୋଜନି, ମୋଜଡୋକ ଓ ଭ୍ଲାଡିକାଭକାଜ ଅଞ୍ଚଳରେ ସେହି ସମୟରେ ୟୁକ୍ରେନ ଡ୍ରୋନ ଆକ୍ରମଣ କରୁଥିଲା । ଆକ୍ରମଣରୁ ସୁରକ୍ଷା ଲାଗି ରୁଷ ତାର ଏୟାର ଡିଫେନ୍ସକୁ ନିୟୋଜିତ କରିଥିଲା । ଏହି ଆକ୍ରମଣ ଓ ପ୍ରତିଆକ୍ରମଣ ଭିତରକୁ ବିମାନଟି ପଶି ଆସିଥିଲା । ଫଳରେ ତାହା ଦୁର୍ଘଟଣାଗ୍ରସ୍ତ ହୋଇଥିଲା । ରୁଷ ବାୟୁସୀମାରେ ଦୁର୍ଘଟଣା ଘଟିଥିବାରୁ ପୁଟିନ କ୍ଷମା ପ୍ରାର୍ଥନା କରିଛନ୍ତି । ଏହି ଦୁର୍ଘଟଣାରେ ୩୮ ଜଣଙ୍କ ମୃତ୍ୟୁ ହୋଇଥିଲା ବେଳେ ୨୯ ଜଣ ବର୍ତ୍ତି ଯାଇଥିଲେ । ଦୁର୍ଘଟଣା ପାଇଁ ଆଜରବୈଜାନ ରୁଷକୁ ଦାୟୀ କରିଥିଲା । କହିଥିଲା ରୁଷର ମିଶାଇଲ ମାଡ଼ ଯୋଗୁ ବିମାନ ଧ୍ୱଂସ ପାଇଛି । ଏପରିକି ଆଜରବୈଜାନ ରାଷ୍ଟ୍ରପତି ତାଙ୍କ ରୁଷ ଗସ୍ତକୁ ବାତିଲ କରିଥିଲେ ।

ଆଜରବୈଜାନର ବିମାନ J2-8243 ଆଜରବୈଜାନର ରାଜଧାନୀ ବାକୁରୁ ରୁଷର ଗ୍ରୋଜନି ଆଡକୁ ଉଡାଣ ଭରିଥିଲା। ତେବେ ପାଗ ଅନୁକୂଳ ନଥିବାରୁ କାଜାଖସ୍ତାନର ଅକତାଉ ସହର ଆଡ଼କୁ ବୁଲି ଲ୍ୟାଣ୍ଡିଂ କରିବା ସମୟରେ ପ୍ଲେନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ବିମାନରେ ଥିବା ୩୮ ଜଣ ପ୍ରାଣ ହରାଇଥିବାବେଳେ ୨୯ ଜଣ ବଞ୍ଚିଯାଇଥିଲେ।  ତେବେ ଶନିବାର ରୁଷର କ୍ରେମଲିନ ପକ୍ଷରୁ ଏକ ଆଧିକାରୀକ ବିବୃତି ଜାରି କରି କୁହାଯାଇଛି ଯେ, ୟୁକ୍ରେନ ବୁଧବାର କରିଥିବା ଡ୍ରୋନ ଆକ୍ରମଣର ଜବାବ ଦେଉଥିଲା ରୁଷ ସେନା। ଏହି ସମୟରେ ଭୁଲ ବଶତଃ ଆଜରବୈଜାନର ଏହି ବିମାନଟି ଟାର୍ଗେଟକୁ ଆସିଯାଇଥିଲା। ଏଥିପାଇଁ ଆଜି ରାଷ୍ଟ୍ରପତି ପୁଟିନ ଆଜରବୈଜାନ ରାଷ୍ଟ୍ରପତିଙ୍କୁ କ୍ଷମା ମାଗିଛନ୍ତି।