ଇସଲାମାବାଦ ୦୧/୦୧: ଅନ୍ଲାଇନରେ ପ୍ରେମ ହେବାପରେ ପ୍ରେମିକାଙ୍କୁ ଭେଟିବାକୁ ବେଆଇନ ଭାବେ ପାକିସ୍ତାନ ସୀମା ଅତିକ୍ରମ କରିଥିବା ୟୁପିର ଜଣେ ଯୁବକ ସେଠାରେ ଗିରଫ ହୋଇଛନ୍ତି । ସେ ହେଲେ ୩୦ ବର୍ଷୀୟ ବାଦଲ ବାବୁ । ବାବୁ ଆଲିଗଡ଼ ଜିଲ୍ଲା ନାଗଲା ଖାଟକରି ଗାଁର ବାସିନ୍ଦା ହୋଇଥିବାବେଳେ ପାକିସ୍ତାନର ପଞ୍ଜାବ ପୁଲିସ ତାଙ୍କୁ ମଣ୍ଡି ବହାଉଦ୍ଦିନ୍ ସିଟିରୁ ଗିରଫ କରିଛି । ଜେରା ସମୟରେ ସେ ନିଜର ଅପରାଧ ସ୍ୱୀକାର କରିଥିବା ଜଣାପଡିଛି ।
ରିପୋର୍ଟ ଅନୁସାରେ, ବାବୁ ସୋସିଆଲ ମିଡିଆ ଫେସବୁକ୍ ଜରିଆରେ ଜଣେ ପାକିସ୍ତାନୀ ଯୁବତୀଙ୍କ ପ୍ରେମରେ ପଡ଼ିଥିଲେ । ତାଙ୍କୁ ସାକ୍ଷାତ କରିବାକୁ ସେ ବ୍ୟାକୁଳ ଥିବାବେଳେ ବିନା ବୈଧ ଭିସା କିମ୍ବା ଭ୍ରମଣ ଦସ୍ତାବିଜରେ ପାକିସ୍ତାନ ସୀମା ପାର କରିଥିଲେ । ସହରରେ ତାଙ୍କ ଉପସ୍ଥିତି ସଂପର୍କରେ ସୂଚନା ପାଇବା ପରେ ଡିସେମ୍ବର ୨୭ରେ ତାଙ୍କୁ ଗିରଫ କରିଥିଲା ପାକ୍ ପୁଲିସ । ଏହାପରେ ତାଙ୍କ ବିରୋଧରେ ବିଦେଶୀ ଆଇନ ଅନୁସାରେ ମାମଲା ରୁଜୁ କରାଯିବା ସହିତ ତାଙ୍କୁ କୋର୍ଟରେ ହାଜର କରାଯାଇଥିଲା । ସେଠାରେ କୋର୍ଟ ତାଙ୍କୁ ୧୪ ଦିନ ଲାଗି ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ଜାନୁଆରୀ ୧୦ରେ ତାଙ୍କୁ ପୁଣି କୋର୍ଟରେ ହାଜର କରାଯିବ । ପ୍ରାଥମିକ ତଦନ୍ତରୁ ଜଣାପଡି଼ଛି ଯେ, ବାବୁ ପୂର୍ବରୁ ଦୁଇଥର ପାକିସ୍ତାନ ସୀମା ପାର କରିବାକୁ ଉଦ୍ୟମ କରିଥିଲେ । କିନ୍ତୁ ବିଫଳ ହୋଇଥିଲେ । ତୃତୀୟ ପ୍ରୟାସରେ ସଫଳ ହୋଇ ସେ ମଣ୍ଡି ବହାଉଦ୍ଦିନ୍ରେ ପହଞ୍ଚିଥିଲେ । ସେଠାରେ ନିଜର ପ୍ରେମିକାଙ୍କୁ ସାକ୍ଷାତ ମଧ୍ୟ କରିଥିଲେ । ବାବୁଙ୍କର ଏହି ବେଆଇନ ପ୍ରବେଶ ପଛରେ କେବଳ ରୋମାଣ୍ଟିକ ସଂପର୍କ ନା ଅନ୍ୟ କିଛି ଉଦ୍ଦେଶ୍ୟ ଥିଲା ତାହା ପୁଲିସ ତଦନ୍ତ କରୁଛି ।
