ପୁରୀ,୧୧/୦୪: ଶ୍ରୀକ୍ଷେତ୍ର ସାହିଯାତ ପରମ୍ପରାରେ ଆଜି ରାମଳୀଳାରେ ଅନୁଷ୍ଠିତ ହେବ ମାୟା ରାବଣ ଓ ସୀତାଚୋରି ପ୍ରସ୍ତାବ । କୁଣ୍ଢେଇବେଣ୍ଟ ସାହି ପକ୍ଷରୁ ମହାପ୍ରଭୁଙ୍କ ଶ୍ରୀରାମଲୀଳା ନୀତି ସମ୍ପନ୍ନ ହେବ । ଏଥିସହ କୁଣ୍ଢେଇବେଣ୍ଟ ସାହିର ମେଳ ବନ୍ଧୁସାହି ଦୋଳମଣ୍ଡପ ସାହି ଭ୍ରମଣ କରିବ । ଜଗନ୍ନାଥବଲ୍ଲଭରେ ପାଳନ ହେବ ଠାକୁରଙ୍କ ନୀତି ।
ତ୍ରେତୟା ଯୁଗର କଥାବସ୍ତୁ ଶ୍ରୀମନ୍ଦିର ପରମ୍ପରାରେ ମଧ୍ୟ ପାଳନ ହୋଇଥାଏ । ପିତୃସତ୍ୟ ପାଳନ କରି ୧୪ ବର୍ଷ ବନବାସରେ ଥିଲେ ଶ୍ରୀରାମ ଚନ୍ଦ୍ର । ଜଙ୍ଗଲରେ ନାନା ବାଧାବିଘ୍ନର ସମ୍ମୁଖୀନ ହୋଇଥିଲେ ଶ୍ରୀରାମ, ସୀତାଦେବୀ ଓ ଲକ୍ଷ୍ମଣ । ଲଙ୍କାର ରାଜା ରାବଣ ମାରିଚକୁ ସୁନାହରିଣ(ମାୟାମୃଗ) ରୂପରେ ପଠାଇଥିଲା । ସୀତାଦେବୀ ସୁନାହରିଣକୁ ଧରିଆଣିବାକୁ ଶ୍ରୀରାମଙ୍କ ନିକଟରେ ଅଳି କରିଥିଲେ । ଏହା ରାକ୍ଷସର ମାୟା ଜାଣି ପାରି ସୀତାଦେବୀଙ୍କୁ ବୁଝାଇଥିଲେ ରାମଚନ୍ଦ୍ର । ତଥାପି ସୀତାଦେବୀ ବାଧ୍ୟ କରିବାରେ ସୁନାହରିଣ ପଛରେ ଯାଇଥିଲେ ଶ୍ରୀରାମ । ସୀତାଦେବୀଙ୍କ ସୁରକ୍ଷା ଦାୟିତ୍ୱ ଲକ୍ଷ୍ମଣଙ୍କ ଉପରେ ନ୍ୟସ୍ତ ଥିଲା । କୁଟୀର ଚତୁଃପାଶ୍ୱର୍ରେ ଲକ୍ଷ୍ମଣ ରେଖା ଟାଣି ଥିଲେ । ପରେ ଶ୍ରୀରାମ ବିପଦରେ ପଡ଼ିଥିବା ଜାଣି ସୀତାଦେବୀ ପୁଣି ବାଧ୍ୟ କରି ଲକ୍ଷ୍ମଣଙ୍କୁ ପଠାଇଥିଲେ । ଏହାର ସୁଯୋଗ ନେଇ ଲଙ୍କା ନରେଶ ରାବଣ ମାୟାରେ ଋଷି ବେଶ ଧାରଣ କରି ସୀତାଦେବୀଙ୍କୁ ଚୋରି କରି ନେଇଥିଲେ । ଏଣୁ କୁଣ୍ଢେଇବେଣ୍ଟ ସାହି ଆଖଡ଼ା ପକ୍ଷରୁ ମାୟା ରାବଣ ବାହାରିଥାଏ ।
