ଚନ୍ଦ୍ରଶେଖରପୁର, ୦୫/୦୫ : ସୈନିକ ସ୍କୁଲ ନିକଟରେ ଥିବା ଅସ୍ଥାୟୀ ଡମ୍ପିଂୟାର୍ଡ ହଟାଇବା ସହିତ ସୈନିକ ସ୍କୁଲ ସ୍ଥାନାନ୍ତରଣ ନିଷ୍ପତ୍ତି ପ୍ରତ୍ୟାହାର ଦାବିରେ ସୈନିକ ସ୍କୁଲ ବଞ୍ଚାଅ ଅଭିଯାନ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ସୈନିକ ସ୍କୁଲ ମୁଖ୍ୟ ପ୍ରବେଶ ଦ୍ୱାର ଠାରେ ଶତାଧିକ ସ୍ଥାନୀୟ ବାସିନ୍ଦାଙ୍କୁ ନେଇ ଜନ ପ୍ରତିବାଦ ପ୍ରଦର୍ଶନ ହୋଇଛି । ପ୍ଲାକାର୍ଡ ଧରିବା ସହିତ ମାନବ ଶୃଙ୍ଖଳ ମାଧ୍ୟମରେ ସୈନିକ ସ୍କୁଲ ଫାଟକ ବନ୍ଦ କରି ଧାରଣାରେ ବସି ପ୍ରତିବାଦ କରାଯାଇଥିଲା । ଯଦି ସାତ ଦିନ ଭିତରେ ନିଷ୍ପତ୍ତି ନିଆ ନ ଯାଏ ତେବେ ନଗର ଉନ୍ନୟନ ମନ୍ତ୍ରୀ, ସଚିବ, ଭୁବନେଶ୍ୱର ମେୟର ଓ କମିଶନରଙ୍କ ସରକାରୀ ବାସଭବନ ଆଗରେ ପ୍ରତୀକାତ୍ମକ ଭାବେ ଅଳିଆ ଫିଙ୍ଗାଯିବ ବୋଲି ଅଭିଯାନ ପକ୍ଷରୁ ନିଷ୍ପତ୍ତି ନିଆଯାଇଛି । ତେବେ ଯାଇ ସେମାନେ ଅନୁଭବ କରିପାରିବେ ବୋଲି ଧାରଣରତ ସ୍ଥାନୀୟ ବାସିନ୍ଦା କହିଛନ୍ତି ।