କୁଚିଣ୍ଡା, ୧୨।୯: ଘରୋଇ ବସ୍ ଚଳାଚଳକୁ ନେଇ କୁଚିଣ୍ଡା-ଝାରସୁଗୁଡ଼ା ଘରୋଇ ବସ୍ ମାଲିକ ସଂଘର ବିବାଦ ଦିନକୁ ଦିନ ଘନେଇବାରେ ଲାଗିଛି । ବସ୍ ଯାତାୟତ ସମୟକୁ ନେଇ ବିବାଦ ଲାଗି ରହିଥିବା ବେଳେ ଗୁରୁବାର ଝାରସୁଗୁଡ଼ା ଘରୋଇ ମାଲିକ ସଂଘ କୁଚିଣ୍ଡାର ଏକ ବସ୍‌କୁ ଅଟକାଇ ଦେଇଥିଲେ । ଏହାକୁ ବିରୋଧ କରି କୁଚିଣ୍ଡା ଘରୋଇ ମାଲିକ ସଙ୍ଘ ମଧ୍ୟ ଝାରସୁଗୁଡ଼ାର ଏକ ବସ୍କୁ ଅଟକ ରଖିଥିଲେ । ମାତ୍ର ଏହି ବିବାଦ ମଧ୍ୟରେ କୁଚିଣ୍ଡା ଥାନାର ଜନୈକ ଏଏସଆଇ ହସ୍ତକ୍ଷେପ କରି ଝାରସୁଗୁଡ଼ା ବସକୁ ଯିବାକୁ ଦେଇଥିଲେ । 

ପୋଲିସର ଏଭଳି କାର୍ଯ୍ୟ ତଥା ଝାରସୁଗୁଡ଼ା ଘରୋଇ ବସ୍ ମାଲିକ ସଙ୍ଘର ମନମାନିକୁ ବିରୋଧ କରି ଆଜିଠାରୁ କୁଚିଣ୍ଡା ଘରୋଇ ବସ୍ ଚଳାଚଳକୁ ବନ୍ଦ କରିଛି କୁଚିଣ୍ଡା ଘରୋଇ ବସ୍ ମାଲିକ ସଂଘ । ବସ୍ ଚଳାଚଳ ବନ୍ଦ ହୋଇଥିବାରୁ ଯାତ୍ରାମାନେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି । କୁଚିଣ୍ଡାଠାରୁ ଘରୋଇ ବସ୍ ଚଳାଚଳ ବନ୍ଦ ହେଲେ, କୁଚିଣ୍ଡା-ଝାରସୁଗୁଡ଼ା, କୁଚିଣ୍ଡା-ସମ୍ବଲପୁର, କୁଚିଣ୍ଡା-ଦେବଗଡ଼, କୁଚିଣ୍ଡା-ସୁନ୍ଦରଗଡ଼ ଏବଂ କୁଚିଣ୍ଡା-ରାଉରକେଲା ଯାତାୟାତ ପ୍ରଭାବିତ ହେବ ।