ନୂଆଦିଲ୍ଲୀ, ୨୩/୧୨ : ସଂସଦ ଭବନରେ ଠେଲାପେଲା ଘଟଣା। ରାମ ମନୋହର ଲୋହିଆ ହସ୍ପିଟାଲରୁ ଡିସଚାର୍ଜ ହେଲେ ଆହତ ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଏବଂ ମୁକେଶ ରାଜପୁତ। ସେ ଏବେ ସୁସ୍ଥ ଅଛନ୍ତି। ତାଙ୍କର ସ୍ଵାସ୍ଥ୍ୟାବସ୍ଥା ସ୍ଥିର ରହିଛି।
ସୂଚନାନୁଯାୟୀ, ଗୁରୁବାର ସଂସଦ ଭବନ ପରିସରରେ ହାଇଡ୍ରାମା ଦେଖିବାକୁ ମିଳିଥିଲା। ଆମ୍ଵେଦକରଙ୍କୁ ଅପମାନ ପ୍ରସଙ୍ଗରେ କଂଗ୍ରେସ ସମେତ ଅନ୍ୟ ବରୋଧୀ ଦଳ ସାଂସଦ ବିରୋଧ ପ୍ରଦର୍ଶନ କରୁଥିଲେ। ବିଜେପି ସାଂସଦମାନେ ଏହାକୁ ବିରୋଧ କରିବାରୁ ଉଭୟ ପକ୍ଷ ଆମ୍ନାସାମ୍ନା ହୋଇଯାଇଥିଲେ। ରାହୁଲ ଗାନ୍ଧୀଙ୍କୁ ବିଜେପି ସାଂସଦମାନେ ସଂସଦ ଭବନ ଭିତରକୁ ପ୍ରବେଶ କରିବାକୁ ଦେଉନଥିଲେ। ଠେଲାପେଲା ମଧ୍ୟରେ ସାଂସଦ ପ୍ରତାପ ଷଡ଼ଙ୍ଗୀ ଏବଂ ମୁକେଶ ରାଜପୁତ ତଳେ ପଡି ଆହତ ହୋଇଥିଲେ। ଦୁହିଁଙ୍କୁ ରାମମନୋହର ଲୋହିଆ ହସ୍ପିଟାଲରେ ଭର୍ତ୍ତି କରାଯାଇଥିଲା।
ରାହୁଲ ଗାନ୍ଧୀ ଧକ୍କା ମାରିବା ଯୋଗୁଁ ତଳେ ପଡି ଆହତ ହୋଇଥିବା ପ୍ରତାପ ଷଡ଼ଙ୍ଗୀ ଅଭିଯୋଗ କରିଥିଲେ। ଏନେଇ ସଂସଦ ମାର୍ଗ ଥାନାରେ ବିଜେପି ଅଭିଯୋଗ କରିଥିଲା। ସେପଟେ କଂଗ୍ରେସ ପ୍ରମୁଖ ମଲ୍ଲିକାର୍ଜୁନ ଖଡଗେ ମଧ୍ୟ ପାଲଟା ଅଭିଯୋଗ କରିଥିଲେ। ବିଜେପି ସାଂସଦଙ୍କ ଆକ୍ରମଣରେ ତାଙ୍କ ଆଣ୍ଠୁରେ ଆଘାତ ଲାଗିଥିବା କହିଥିଲେ।
