ନୂଆଦିଲ୍ଲୀ,୨୩/୧୨: ମହାକାଶରେ ଗଜା ହେବ ମଞ୍ଜି । ମହାକାଶରେ ମଞ୍ଜିକୁ ଗଜା କରିବ ଇସ୍ରୋ । ଖାଲି ସେତିକି ନୁହେଁ ଅନ୍ତରୀକ୍ଷକୁ ପଠାଇବ ଅନ୍ତନଳୀର ଜୀବାଣୁ । କେବଳ ଇନସ୍ପେସ ଡକିଂ ବା ଦୁଇଟି ସ୍ପେସକ୍ରାପ୍ଟକୁ ମହାକାଶରେ ଯୋଡିବା ନୁହେଁ ସ୍ପେଡେକ୍ସ ମିଶନକୁ ନେଇ ଅନେକ ନୂଆ ମାଇଲଖୁଣ୍ଟ ସୃଷ୍ଟି କରିବାକୁ ଯାଉଛି ଇସ୍ରୋ । ଉତକ୍ଷେପଣ ଅପେକ୍ଷାରେ ଥିବା ସ୍ପେଡେକ୍ସ ମିଶନକୁ ନେଇ ଏହି ବଡ ସୂଚନା ଆସିଛି ।

କ୍ରପ୍ ପେଲୋଡରେ ୮ଟି ଝୁଡଙ୍ଗ ମଞ୍ଜିକୁ ମହାକାଶକୁ ପଠାଇବ ଇସ୍ରୋ । ସେହିପରି RVସାଟ -1 ପେଲୋଡରେ ମହାକାଶକୁ ଯିବ ମଣିଷ ପାକସ୍ଥଳୀ ଓ ଅନ୍ତନଳୀରେ ରହୁଥିବା ଜୀବାଣୁ ।ବହୁ ପରୀକ୍ଷଣ ପରେ ଭାରତୀୟ ମହାକାଶ ଗବେଷଣାରେ ପ୍ରଥମ ଥର ଏପରି ହେବାକୁ ଯାଉଛି । ଏହି ମିଶନରେ ବ୍ୟବହୃତ ରକେଟରେ PSLV-60 ରକେଟରେ ଚତୁର୍ଥ ଷ୍ଟେଜରେ ମୋଟ ୨୪ଟି ପେଲୋଡ ବା ଯନ୍ତ୍ର ପଠାଯିବ । ଏହାକୁ PS4 ଅର୍ବିଟାଲ ଏକ୍ସପେରିମେଣ୍ଟ ମଡ୍ୟୁଲ ବା ପିଏମ-୪ ବୋଲି କୁହାଯାଉଛି । ୨୪ଟି ପେଲୋଡରୁ ୧୪ଟି ଇସ୍ରୋ ତିଆରି କରିଥିବା ବେଳେ ୧୦ଟି ବିଭିନ୍ନ ଶିକ୍ଷାନୁଷ୍ଠାନ ଓ ଘରୋଇ ଷ୍ଟାର୍ଟଅପ ତିଆରି କରିଛନ୍ତି । ସେଥିରୁ ୨ଟି ରୋଚକ ପେଲୋଡ ହେଉଛି କ୍ରପ ଓ   RV ସାଟ -1 । ଯେଉଁଥିରେ ମଞ୍ଜି ଓ ଅନ୍ତନଳୀ ପଠାଇବ ଇସ୍ରୋ । 

କ୍ରପ ପେଲୋଡରେ ୮ଟି ମଞ୍ଜିକୁ ମହାକାଶକୁ ପଠାଇବ ଇସ୍ରୋ । ୫ରୁ ୭ ଦିନ ଭିତରେ ଏହାକୁ ଗଜା କରି ସେଥିରୁ ୨ଟି ଲେଖାଏଁ ପତ୍ର ବାହାରିବା ଯାଏ ଅନୁଧ୍ୟାନ କରାଯିବ। ମଞ୍ଜିରୁ କିପରି ଗଛ ବାହାରୁଛି ତାର ଫଟୋ ଉଠାଯିବ । ଅମ୍ଲଜାନ, ଅଙ୍ଗାରକାମ୍ଲ, ଆଦ୍ରତା ଆଦି ମପାଯିବ । ସେହିପରି RV ସାଟ -1 ପେଲୋଡରେ ମହାକାଶକୁ ମଣିଷ ପାକସ୍ଥଳୀ ଓ ଅନ୍ତନଳୀରେ ରହୁଥିବା ଜୀବାଣୁ ପଠାଯିବ । ମହାକାଶରେ ସେଗୁଡିକ କିପରି ବଂଶବୃଦ୍ଧି କରୁଛନ୍ତି ତାର ଅନୁଧ୍ୟାନ କରାଯିବ । ଆଗାମୀ ଦିନରେ ଏହି ସବୁ ମାନବ ମିଶନରେ ଏହିସବୁ ତଥ୍ୟ ସହାୟକ ହେବ ବୋଲି ଆଶା କରାଯାଉଛି ।