ବଲାଙ୍ଗିର,୨୬/୦୪: ବିଗତ ୪ଦିନର ତଦନ୍ତ ପରେ ଆଜି କ୍ରାଇମବ୍ରାଞ୍ଚ ଫେରିଯାଇଛି । ଡାକ ବିଭାଗରେ ଜାଲ ସାର୍ଟିଫିକେଟ କେଳେଙ୍କାରୀର ଯାଞ୍ଚ ପାଇଁ ଆସିଥିବା ୬ଜଣିଆ ସିବିଆଇର ଟିମ୍ ଶୁକ୍ରବାର ଅପରାହ୍ନରେ ବଲାଙ୍ଗିର ଛାଡ଼ିଛି । ଗତ ୨୨ତାରିଖରୁ ବଲାଙ୍ଗିର ସର୍କିଟ ହାଉସଠାରେ ସିବିଆଇ ଡେରା ପକାଇଥିଲା । ଏଥିରେ ପୁଲିସ ଏବଂ ଡାକ ବିଭାଗର କେତେଜଣ କର୍ମଚାରୀଙ୍କ ଉପସ୍ଥିତିରେ ଏସବୁ ତଦନ୍ତ କରାଯାଉଥିଲା । ସିବିଆଇର ଯାଞ୍ଚ ରେକର୍ଡରେ ମଧ୍ୟ ସେମାନଙ୍କ ଉପସ୍ଥିତିକୁ ଦାଖଲ କରାଯାଇଛି। ଅର୍ଥାତ ସିବିଆଇର ଏସବୁ ଯାଞ୍ଚ, ବୟାନ ରେକର୍ଡ ଏବଂ ପଚରାଉଚୁରାରେ ସେମାନେ ଏକପ୍ରକାର ସାକ୍ଷୀ ହୋଇଥିବା କୁହାଯାଇପାରେ। ଅବଶ୍ୟ ବଲାଙ୍ଗିରର କେଳେଙ୍କାରୀ ଏବଂ ଅଭିଯୁକ୍ତଙ୍କ ସହ ସମ୍ବଲପୁର ଏବଂ କଳାହାଣ୍ଡି ଲିଙ୍କ ଥିବା କିଛି ଖିଅ ସିବିଆଇ ହାତରେ ଲାଗିଛି । ଏହାବାଦ୍ ତଦନ୍ତ ସ୍କାନରରେ ଭଦ୍ରକ, ବାଲେଶ୍ୱର, ନୂଆପଡ଼ା, ରାୟଗଡ଼ା, କନ୍ଧମାଳ ଜିଲ୍ଲାର କେତେଜଣ ବ୍ୟକ୍ତି ଏବଂ ସରକାରୀ କର୍ମଚାରୀ ମଧ୍ୟ ରହିଥିବା କୁହାଯାଉଛି । ହେଲେ ଏନେଇ ସିବିଆଇ ପକ୍ଷରୁ ନାଁ କୌଣସି ଅଧିକାରୀ ପ୍ରତିକ୍ରିୟା ଦେଇଛନ୍ତି ନାଁ କୌଣସି ସୂଚନା ଦିଆଯାଇଛି ।
ସୂଚନାଯୋଗ୍ୟ ଯେ, ପ୍ରଥମକରି ଡାକ ବିଭାଗରେ ନକଲି ସାର୍ଟିଫିକେଟ ମାମଲା ବଲାଙ୍ଗିରରୁ ଆରମ୍ଭ ହୋଇଥିଲା । ୨୦୨୩ ମସିହା ମାର୍ଚ୍ଚ ୨୩ତାରିଖରେ ଏହି ସାର୍ଟିଫିକେଟ ଜାଲିଆତି ଘଟଣା ସାମ୍ନାକୁ ଆସିଥିଲା । ପ୍ରଥମେ ପୁଲିସ, ପରେ କ୍ରାଇମବ୍ରାଞ୍ଚ ଏହାର ତଦନ୍ତ କରିଥିଲା । ଶେଷରେ ୨୦୨୩ ମସିହା ମଇ ୯ତାରିଖରେ ସିବିଆଇ ପକ୍ଷରୁ କେସ ନମ୍ବର ଆରସି-୨୨୧୨୦୨୩ଇ୦୦୧୩ରେ ମାମଲା ରୁଜୁ କରାଗଲା । ଯେଉଁଥିରେ ଧାରା ଆଇପିସିର ୪୨୦, ୪୬୮, ୪୭୧, ୫୧୧, ୭(ଏ) ଏବଂ ୧୨୦(ବି) ଲାଗିଥିଲା । ଏହି ମାମଲା ସମ୍ପର୍କରେ ମୁଖ୍ୟ ଡାକପାଳଙ୍କ କାର୍ଯ୍ୟାଳୟର ତତ୍କାଳୀନ ନିର୍ଦ୍ଦେଶକ ସୁବାଷ ଚନ୍ଦ୍ର ବାରିକ ଲିଖିତ ଭାବରେ ଜଣାଇଥିଲେ ।ଏଥିରେ ବିଭାଗ ପକ୍ଷରୁ ୬୪ଜଣ ଅଭିଯୁକ୍ତ/ସନ୍ଦିଗ୍ଧଙ୍କ ତାଲିକା ସହ ଅତିରିକ୍ତ ୮୩ଜଣିଆ ଆଉ ଏକ ତାଲିକା ଦିଆଯାଇଥିଲା । ଯେଉଁମାନଙ୍କ ବିରୋଧରେ ପୁଲିସ ମାମଲା କରିଥିବା କୁହାଯାଇଥିଲା । ଏହି ମାମଲାରେ ସିବିଆଇକୁ ଆହୁରି କିଛି ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିବାରୁ ପୁଣିଥରେ ତଦନ୍ତ ଆଗେଇଥିବା କୁହାଯାଉଛି ।
ପ୍ରକାଶ ଯେ, ବଲାଙ୍ଗିର ଡାକ ବିଭାଗରେ ଗ୍ରାମୀଣ ଡାକ ସେବକ ନିଯୁକ୍ତିରେ କେତେକ ଆଶାୟୀ ସାର୍ଟିଫିକେଟ ଜାଲିଆତି କରି ମାର୍କ ହାତେଇଥିବା ସନ୍ଦେହ ଉପୁଜିବାରୁ ତତ୍କାଳୀନ ବଲାଙ୍ଗିର ଡାକ ଅଧିକ୍ଷକ ରାଜେନ୍ଦ୍ର ପଟ୍ଟନାୟକ ଟାଉନଥାନାରେ ଲିଖିତ ଅଭିଯୋଗ କରିଥିଲେ । ଏନେଇ ଗଣମାଧ୍ୟମରେ ଖବର ପ୍ରକାଶନ ପରେ ପୁଲିସ ତଦନ୍ତ ଜୋରଦାର କରିଥିଲା । କେତେଜଣ ଅଭିଯୁକ୍ତଙ୍କ ସୂଚନାଆଧାରରେ ପଚରାଉଚୁରା କରି ସମୁଦାୟ ୧୯ଜଣଙ୍କୁ ଗିରଫ କରିଥିଲା । ମାମଲାର ଅଧିକ ତଦନ୍ତ ପାଇଁ ପୁଲିସର ଏକ ଟିମ୍ ରାଜ୍ୟବାହାରକୁ ଯିବା ପାଇଁ ପ୍ରସ୍ତୁତ ହେଉଥିବା ବେଳେ ରାଜ୍ୟସରକାର ଏହି ମାମଲା କ୍ରାଇମବ୍ରାଞ୍ଚକୁ ହସ୍ତାନ୍ତର କରିଥିଲେ । ପରେ କ୍ରାଇମବ୍ରାଞ୍ଚ ବଲାଙ୍ଗିର ଆସି ତଦନ୍ତ ଆରମ୍ଭକରି ବିଭିନ୍ନ ସ୍ଥାନରେ ଚଢ଼ଉ କରିବା ସହ ସାକ୍ଷ୍ୟ ଗ୍ରହଣ କରିଥିଲା । ହେଲେ ତାରି ଭିତରେ ଭୁବନେଶ୍ୱର, ସମ୍ବଲପୁର, କେନ୍ଦୁଝର, କଳାହାଣ୍ଡିରୁ ମଧ୍ୟ ସମାନ ଅଭିଯୋଗ ଆସିବାରୁ ଡାକ ବିଭାଗ ପକ୍ଷରୁ ଏହାର ସିବିଆଇ ତଦନ୍ତ ପାଇଁ ନିବେଦନ କରାଯାଇଥିଲା ।
