ନୂଆଦିଲ୍ଲୀ: ପାକିସ୍ତାନର ଲାହୋରରେ ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାନ୍ଙ୍କ ରାଜନୈତିକ ପରାମର୍ଶଦାତା ଗୁଲାମ ଶବୀରଙ୍କୁ ଅପହରଣ କରାଯାଇଥିବା ଖବର ଏବେ ସାମ୍ନାକୁ ଆସିଛି । ଏହି ଘଟଣାରେ ଲାହୋରର କାହନା ପୋଲିସ ଷ୍ଟେସନରେ ଏକ ମାମଲା ଦାଖଲ ହୋଇଛି ।
ମାମଲାରେ ଉଲ୍ଲେଖ କରାଯାଇଛି ଯେ, ଗୁଲାମ ଶବୀରଙ୍କୁ ଦୁଇ ଦିନ ପୂର୍ବରୁ ଅଜଣା ବ୍ୟକ୍ତି ମାନେ ଅପହରଣ କରିନେଇଛନ୍ତି । ଗୁଲାମ ଶବୀର ଇସଲାମାବାଦ ଗସ୍ତରେ ଥିଲେ । ଗୁଲାମ ଶବୀରଙ୍କ ପୁଅ ବିଲାଲ ଥାନାରେ ଏହି ଅଭିଯୋଗ କରିଛନ୍ତି । ସେ କହିଛନ୍ତି ଯେ, ଶବୀର ବିଳମ୍ବିତ ରାତିରେ ଲାହୋରର ଖୟାବନ-ଏ-ଅମୀନ ସ୍ଥିତ ନିଜ ବାସଭବନରୁ ବାହାରି ଇସଲାମାବାଦ ଅଭିମୁଖେ ଯାତ୍ରା କରିଥିଲେ ।
ସୂଚନାଥାଉକି, ପାକିସ୍ତାନ ତେହରିକ୍-ଏ-ଇନସାଫ୍ (ପିଟିଆଇ) ପାର୍ଟିର ସଂସ୍ଥାପକ ଇମ୍ରାନ ଖାନ୍ ଗତ ବର୍ଷରୁ ଜେଲ୍ରେ ବନ୍ଦୀ ଅଛନ୍ତି । ସେ ପ୍ରାୟ ୨ ଶହ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି । ୨୦୨୨ ମସିହାରେ ଇମ୍ରାନ ଖାନ୍ଙ୍କ ନେତୃତ୍ବରେ ଲାହୋରରୁ ଇସଲାମାବାଦ ପର୍ଯ୍ୟନ୍ତ ବିରୋଧ ଶୋଭାଯାତ୍ରା ଆରମ୍ଭ ହୋଇଥିଲା । ପୂର୍ବତନ କ୍ରିକେଟରରୁ ରାଜନେତା ବନିଥିବା ଇମ୍ରାନଙ୍କୁ ଅବିଶ୍ବାସ ପ୍ରସ୍ତାବ ପରେ ପ୍ରଧାନମନ୍ତ୍ରୀ ପଦରୁ ହଟାଇ ଦିଆଯାଇଥିଲା । ଏହା ପରେ ସେ ଶେହବାଜ ଶରିଫଙ୍କ ମେଣ୍ଟ ସରକାରଙ୍କୁ ଭାଙ୍ଗିବା ପାଇଁ ବିରୋଧ ପ୍ରଦର୍ଶନ ଆରମ୍ଭ ହୋଇଥିଲା ।
