ଭୁବନେଶ୍ୱର ୨୭/୦୩: ରାଜଧାନୀରେ କଂଗ୍ରେସର ଗର୍ଜନ। ନାରୀ ସୁରକ୍ଷା, ବିପର୍ଯ୍ୟସ୍ତ ଆଇନ ଶୃଙ୍ଖଳା ପ୍ରସଙ୍ଗରେ ହଲ୍ଲାବୋଲ୍। ରୁପାଲିରୁ ରାଜମହଲ ଜନପଥକୁ ଅଚଳ କରିଦେଲେ ହଜାର ହଜାର କଂଗ୍ରେସ କର୍ମୀ। ଗାନ୍ଧୀମାର୍ଗରେ ପ୍ରଥମ ବ୍ୟାରିକେଡ୍ ଭାଙ୍ଗିବା ପରେ ଧସେଇ ପଶିଥିଲେ। ଅଟକାଇପାରିଲାନି ପୁଲିସ। ବିଧାନସଭା ଅଭିମୁଖେ ଅଗ୍ରସର ବେଳେ ଦ୍ବିତୀୟ ବ୍ୟାରିକେଡ୍ ନିକଟରେ ପୋଲିସ- କଂଗ୍ରେସକର୍ମୀଙ୍କ ମଧ୍ୟରେ ଧସ୍ତାଧସ୍ତି ଓ ଠେଲାପେଲା ସ୍ଥିତି ସୃଷ୍ଟି ହୋଇଥିଲା। ଶେଷରେ ସ୍ଥିତି ନିୟନ୍ତ୍ରଣ ପାଇଁ ଲାଠିଚାର୍ଜ କଲା ପୋଲିସ। ପ୍ଲାଷ୍ଟିକ୍ ଚେୟାର ଫିଙ୍ଗିଥିଲେ କର୍ମୀ। ଆନ୍ଦୋଳନକାରୀଙ୍କୁ ରୋକିବାକୁ ଲୁହବୁହା ଗ୍ୟାସ୍, ପାଣି ମାଡ଼ କରିବା ଆରମ୍ଭ କରିଛି ପୋଲିସ। ଲୋୟର ପିଏମଜି ପାଲଟିଲା ରଣକ୍ଷେତ୍ର।
ସେହିଭଳି ପୋଲିସ ପକ୍ଷରୁ ଅଭିଯୋଗ ହୋଇଛି ଯେ, କଂଗ୍ରେସ କର୍ମୀମାନେ ବ୍ୟାରିକେଡ୍ ଭାଙ୍ଗିବା ସହ ଟେକା ପଥର ମାଡ଼ କରିଥିଲେ। ଚୌକି ମଧ୍ୟ ପିଙ୍ଗି ଥିଲେ। ଯାହାକୁ ନିୟନ୍ତ୍ରଣ କରିବା ପାଇଁ ପ୍ରଥମେ ବିକ୍ଷୋଭକାରୀଙ୍କୁ ବାରଣ କରାଯାଇଥିଲା। ତେବେ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯିବା ଫଳରେ ପ୍ରଥମେ ମୃଦୁ ଲାଠି ଚାଲନା କରିଥିଲା। ପରେ ପାଣିମାଡ଼ ଏବଂ ଲୁହ ବୁହା ଗ୍ୟାସ ମାଡ କରିଛି ପୋଲିସ।
