କଟକ, ୫/୪ : ରାମନବମୀ ପାଇଁ ଆଜି କଟକ ସହରରେ ପୋଲିସ ଫ୍ଲାଗ ମାର୍ଚ୍ଚ କରିଛି । ଡିସିପିଙ୍କ ନେତୃତ୍ବରେ ଦୁଇଟି ଆଇଆରବି ବାଟାଲିୟନ ଜବାନ ଓ ଓଏସ୍ଏପି ଷଷ୍ଠ ବାଟାଲିୟନ ଯବାନଙ୍କ ସହ ଅତିରିକ୍ତ ଡିସିପି, ସବୁ ଜୋନର ଏସିପି ଓ ସବୁ ଥାନାର ଆଇଆଇସିମାନେ ଏହି ଫ୍ଲାଗ ମାର୍ଚ୍ଚରେ ସାମିଲ ହୋଇଥିଲେ।
ଫ୍ଲାଗ ମାର୍ଚ୍ଚ ସିଏମସି ବିଜୁ ଭବନ ନିକଟ ମାରୁତି ମଣ୍ଡପରୁ ଆରମ୍ଭ ହୋଇ ଝୋଲାସାହି, ପୀଠାପୁର, ଦୋଳମୁଣ୍ଡାଇ, ବଜ୍ରକଵାଟି ଛକ, ନିମସାହି ଆଦି ଅଞ୍ଚଳ ଗୁଡିକ ଦେଇ ଚୌଧୁରୀ ଵଜାର ପର୍ଯ୍ୟନ୍ତ ଆସିଥିଲା । ରାମନବମୀ ସମୟରେ ଲୋକଙ୍କ ମନରେ ସୁରକ୍ଷାର ଭାବ ନିଶ୍ଚିତ କରାଇବା ପାଇଁ ଏଭଳି ଫ୍ଲାଗ ମାର୍ଚ୍ଚ କରାଯାଇଥିବା ଡିସିପି କହିଛନ୍ତି। ଆସନ୍ତାକାଲି ରାମନବମୀ ଅବସରରେ କଟକ ସହରରେ ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ୨୫ପ୍ଲାଟୁନ ପୋଲିସ ଫୋର୍ସ ମୁତୟନ ରହିବେ ବୋଲି ସୂଚନା ଦେଇଛନ୍ତି ଡିସିପି । ଏହା ସହ ବିଭିନ୍ନ ସ୍ଥାନରୁ ବାହାରୁଥିବା ଶୋଭାଯାତ୍ରା ସହ ମଧ୍ୟ ସ୍ବତନ୍ତ୍ର ପୋଲିସ ଫୋର୍ସ ରହିବେ।
