ଭୁବନେଶ୍ୱର,୦୫/୦୪: ଜାତୀୟ ଗ୍ରୀନ୍ ଟ୍ରିବ୍ୟୁନାଲର ତାଗିଦ୍ ଓ ପରାମର୍ଶ ଦେବାର ଏକ ବର୍ଷ ବିତିଯାଇଥିଲେ ସୁଦ୍ଧା କୋରାପୁଟ ଜିଲ୍ଲାର ମାଛକୁଣ୍ଡ ନଦୀ ରାଜ୍ୟର ରାଜସ୍ୱ ମାନଚିତ୍ରକୁ ଫେରିପାରିନି । ବର୍ଷେ ହେବ ପ୍ରକ୍ରିୟା ଚାଲୁଛି କହି ପ୍ରଶାସନ କୌଣସି ଠୋସ୍ ପଦକ୍ଷେପ ନେଉନାହିଁ । ଫଳରେ ରାଜ୍ୟ ମାନଚିତ୍ରରୁ ଏହି ନଦୀ ହଜିଯିବ । ପରବର୍ତ୍ତୀ ସମୟରେ ଆନ୍ଧ୍ରପ୍ରଦେଶ ନିଜ ମାନଚିତ୍ରରେ ଏହାକୁ ସ୍ଥାନିତ କରିବ ଓ ନିଜର ବୋଲି ଦାବି କରିବ ବୋଲି ବୁଦ୍ଧିଜୀବୀମାନେ ଚିନ୍ତାବ୍ୟକ୍ତ କରିଛନ୍ତି ।
ମାଛକୁଣ୍ଡ ନଦୀ ଓଡ଼ିଶା ଓ ଆନ୍ଧ୍ରପ୍ରଦେଶର ସୀମା ନିର୍ଦ୍ଧାରଣ କରୁଛି । କେନ୍ଦ୍ରୀୟ ଅନୁଦାନ ଏବଂ ଓଡ଼ିଶା ଓ ଆନ୍ଧ୍ର ସହଭାଗିତାରେ ନନ୍ଦପୁର ବ୍ଳକ ଜଲାପୁଟଠାରେ ଜଳ ବିଦ୍ୟୁତ ଉତ୍ପାଦନ କରାଯାଉଛି । ଏହି ନଦୀ ଓଡ଼ିଶାରେ ପ୍ରବାହିତ ହେଉଥିବା ବେଳେ ଜଳ ବିଦ୍ୟୁତ ଉତ୍ପାଦନ କେନ୍ଦ୍ର ମଧ୍ୟ ଆମ ରାଜ୍ୟ ମଧ୍ୟରେ ରହିଛି । ତେବେ କିଭଳି ଭାବେ ଏହା ରାଜ୍ୟ ରାଜସ୍ୱ ମାନଚିତ୍ରରୁ ଗାଏବ ହୋଇଯାଇଛି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ସୂଚନା ଅନୁସାରେ ଏହି ନଦୀର ଶୋଭାପୁଟ ଓ ସୁଡୁଗ୍ ଘାଟରୁ ନିୟମିତ ବାଲି ଚୋରି ହେଉଥିବା ନେଇ ଅଭିଯୋଗ ହୋଇଥିଲା । ଆନ୍ଧ୍ର ପଟୁ ବ୍ୟବସାୟୀମାନେ ବହୁ ପରିମାଣରେ ବାଲି ଚୋରି କରି ରାଜ୍ୟର ରାଜସ୍ୱ ହାନି କରୁଥିବା ସମ୍ପର୍କରେ ଜାତୀୟ ଗ୍ରୀନ ଟ୍ରିବ୍ୟୁନାଲଙ୍କ ନିକଟରେ ଅଭିଯୋଗ ହୋଇଥିଲା । ଟ୍ରିବ୍ୟୁନାଲ ଏକ ମାମଲା ରୁଜୁ କରି ଗତ ବର୍ଷ ଏପ୍ରିଲ୍ ୪ ତାରିଖରେ ତଦନ୍ତ ପାଇଁ ଘଟଣାସ୍ଥଳକୁ ଏକ ପ୍ରତିନିଧି ଦଳକୁ ପଠାଇଥିଲା । ଏହି ତଦନ୍ତକାରୀ ଦଳ ଶୋଭାପୁଟ ଓ ସୁଡୁଗ୍ ଘାଟ ସହ ବିଭିନ୍ନ ଘାଟ ପରିଦର୍ଶନ କରିବା ପରେ ବାଲି ଚୋରି ସ୍ଥାନର ମାଲିକାନା ଉପରେ ତଥ୍ୟ ସଂଗ୍ରହ କରିଥିଲେ । ପରେ ଆନ୍ଧ୍ରର ପେଦାବାଇଲୁ ତହସିଲ ଏବଂ ଓଡ଼ିଶାର ନନ୍ଦପୁର ତହସିଲ କର୍ମଚାରୀଙ୍କୁ ନେଇ ଏହାର ମାଲିକାନା ସମ୍ପର୍କରେ ତଥ୍ୟ ସଂଗ୍ରହ କରିଥିଲେ ।
ସେତେବେଳେ ଏହି ସ୍ଥାନ ନା ଓଡ଼ିଶା ନା ଆନ୍ଧ୍ର, କାହାରି ରାଜସ୍ୱ ମାଚିତ୍ରରେ ଆସି ନ ଥିଲା । ତେବେ ପୂର୍ବରୁ ଓ ସେହି ସମୟରେ ଓଡ଼ିଶା ପକ୍ଷରୁ ଏହି ସ୍ଥାନ ଓ ନଦୀ ନିଜର ବୋଲି ଦାବି କରାଯାଇଥିଲା । ସେତେବେଳେ ତୁରନ୍ତ ସର୍ଭେ କରି ନିଜ ରାଜସ୍ୱ ମାନଚିତ୍ରରେ ଏହାକୁ ସ୍ଥାନିତ କରିବା ପାଇଁ ଗ୍ରୀନ ଟ୍ରିବ୍ୟୁନାଲ ପକ୍ଷରୁ ରାଜ୍ୟ ସରକାରଙ୍କୁ ପରାମର୍ଶ ଦିଆଯାଇଥିଲା । ଏହାରି ମଧ୍ୟରେ ଗୋଟାଏ ବର୍ଷ ବିତିଯାଇଛି। ହେଲେ ବର୍ତ୍ତମାନ ଯାଏ ଏହା ରାଜ୍ୟ ରାଜସ୍ୱ ମାନଚିତ୍ରରେ ସ୍ଥାନିତ ହୋଇପାରିନାହିଁ । ଏ ସମ୍ପର୍କରେ କୋରାପୁଟ ଉପଜିଲ୍ଲାପାଳ ପ୍ରେମଲାଲ୍ ହିଆଲଙ୍କୁ କହିଛନ୍ତି ଯେ ବର୍ତ୍ତମାନ ଯାଏ ଏହା ରାଜ୍ୟ ରାଜସ୍ୱ ମାନଚିତ୍ରରେ ସ୍ଥାନିତ ହୋଇପାରିନାହିଁ । ସ୍ଥାନିତ ପାଇଁ ପ୍ରକ୍ରିୟା ଚାଲୁ ରହିଛି।
