ସମ୍ବଲପୁର,୦୫/୦୫: ରାତ ପାହିଲେ ପରେ ରାମ ନବମୀ ଓ ୧୪ ତାରିଖରେ ହନୁମାନ ଜୟନ୍ତୀ ପାଳିତ ହେବ । ଉଭୟ ପର୍ବରେ ବିଶାଳ ଶୋଭାଯାତ୍ରା ସହର ପରିକ୍ରମା କରିବ । ଏଥିପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ପୁଲିସ୍ ଓ ପ୍ରଶାସନ ପକ୍ଷରୁ ମଧ୍ୟ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଏହା ସହ ଡଗ ସ୍କ୍ବାର୍ଡ, ବମ୍ ସ୍କ୍ବାଡ ନେଇ ସମ୍ବେଦନଶୀଳ ଅଞ୍ଚଳରେ ଚେକିଂ ଜାରି ରହିଛି। ଡ୍ରୋନ୍ ସାହାର୍ଯ୍ୟରେ ସନ୍ଦିଗ୍ଧଙ୍କ ଉପରେ ନଜର ରଖିଛି ପୋଲିସ।
ଶୁକ୍ରବାର ପୁଲିସ୍ ପକ୍ଷରୁ ସହରରେ ଫ୍ଲାଗମାର୍ଚ୍ଚ କରାଯାଇଥିଲା । ବରିଷ୍ଠ ପୁଲିସ୍ ଅଧିକାରୀଙ୍କ ନେତୃତ୍ୱରେ କେନ୍ଦ୍ରୀୟ ଅର୍ଦ୍ଧସାମରିକ ବଳ ଓ ରାଜ୍ୟ ସଶସ୍ତ୍ର ପୁଲିସ୍ ବଳ ସହ ରାପିଡ୍ ଆକ୍ସନ ଫୋର୍ସ ସହର ପରିକ୍ରମା କରିଥିଲେ । ଶୁକ୍ରବାର ଅପରାହ୍ନରେ ଅତିରିକ୍ତ ଏସପି ଅଜୟ କୁମାର ମିଶ୍ରଙ୍କ ନେତୃତ୍ୱରେ ପୁଲିସ ରିଜର୍ଭ ଗ୍ରାଉଣ୍ଡରୁ ଏହି ଫ୍ଲାଗମାର୍ଚ୍ଚ ବାହାରି ମୁଦିପଡା, କୁଞ୍ଜେଲପଡା, ମ୍ୟୁନିସିପାଲିଟି ଛକ, ପୀରବାବା ଛକ, ଗୋଲବାଜର, ଗେଟି ରୋଡ୍, ଲକ୍ଷ୍ମୀ ଟକିଜ ଛକ, କୁମ୍ଭାରପଡା, ପେନ୍ସନ୍ପଡା, ଜିଲ୍ଲା ସ୍କୁଲ, ଭୂତାପଡ଼ା, ମୋତିଝରନ୍, ସୁନାପାଲି ପରିକ୍ରମା କରି ଧନକଉଡ଼ାରେ ଶେଷ ହୋଇଥିଲା । ଏଥିରେ କେନ୍ଦ୍ରୀୟ ଓ ରାଜ୍ୟ ସଶସ୍ତ୍ର ପୁଲିସ ବଳର ମୋଟ୍ ୧୫ ପ୍ଲାଟୁନ୍ ଫୋର୍ସ ସାମିଲ ହୋଇଥିଲେ । ସମ୍ବଲପୁର ସହରର ସମସ୍ତ ଥାନାର ଥାନାଧିକାରୀ ଓ ଅନ୍ୟ ପୁଲିସ ଅଧିକାରୀମାନେ ଫ୍ଲାଗମାର୍ଚ୍ଚରେ ସାମିଲ ଥିଲେ । କେନ୍ଦ୍ରୀୟ ଫୋର୍ସ ସୀମା ସୁରକ୍ଷା ବଳ (ବିଏସଏଫ), କେନ୍ଦ୍ରୀୟ ରିଜର୍ଭ ପୁଲିସ ବଳ (ସିଆରପିଏଫ)ର ବିଶେଷ ଭାବେ ଦଙ୍ଗା ଓ ହିଂସା ପ୍ରଶମିତ ପାଇଁ ସ୍ୱତନ୍ତ୍ର ପ୍ରଶିକ୍ଷିତ ‘ରାପିଡ୍ ଆକ୍ସନ ଫୋର୍ସ’, ରାଜ୍ୟ ସଶସ୍ତ୍ର ପୁଲିସ ବଳ ଯବାନମାନେ ଫ୍ଲାଗମାର୍ଚ୍ଚ କରିଥିଲେ । ଦଙ୍ଗା ନିରୋଧୀ ବାହନ ‘ବଜ୍ର’ ମଧ୍ୟ ସମ୍ବଲପୁର ରାସ୍ତାରେ ନଜର ଆସିଥିଲା ।
ଅତିରିକ୍ତ ଏସପି ଶ୍ରୀ ମିଶ୍ର କହିଛନ୍ତି, ସମଗ୍ର ସହର କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ରହିଛି । ସମ୍ବେଦନଶୀଳ ସ୍ଥାନଗୁଡିକରେ ତ୍ରୁଟିଶୂନ୍ୟ ସୁରକ୍ଷା ବ୍ୟବସ୍ଥା ପାଇଁ ସମସ୍ତ ପଦକ୍ଷେପ ଗ୍ରହଣ କରାଯାଇଛି । ଅସାମାଜିକ ତତ୍ତ୍ୱ କୌଣସି ଉତ୍ତେଜନାମୂଳକ ସ୍ଥିତି ସୃଷ୍ଟି କରିବାକୁ ପ୍ରୟାସ କଲେ, ତୁରନ୍ତ ସେମାନଙ୍କ ବିରୋଧରେ ‘ବିଏନଏସଏସ’ ଧାରା ୧୨୬ ଓ ୧୨୯ ରେ ତତ୍କାଳ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି । ଶାନ୍ତି ଶୃଙ୍ଖଳାର ସହ ଉଭୟ ପର୍ବ ପାଳନ କରିବା ଓ ପୁଲିସ ପ୍ରଶାସନକୁ ଆଇନ ଶୃଙ୍ଖଳା ବଜାୟ ରଖିବାରେ ସହଯୋଗ କରିବାକୁ ସହରବାସୀଙ୍କୁ ନିବେଦନ କରାଯାଇଛି । ହନୁମାନ ଜୟନ୍ତୀ ଶେଷ ହେବା ପର୍ଯ୍ୟନ୍ତ ସହରରେ ନିୟମିତ ବ୍ୟବଧାନରେ ଫ୍ଲାଗମାର୍ଚ୍ଚ ଓ ପାଟ୍ରୋଲିଂ ଜାରି ରହିବ ।
ଉଲ୍ଲେଖଯୋଗ୍ୟ, ଗୁରୁବାର ପୁଲିସ୍ ମହାନିର୍ଦ୍ଦେଶକ ଯୋଗେଶ ବାହାଦୂର ଖୁରାନିଆ ସମ୍ବଲପୁର ଗସ୍ତରେ ଆସି ଉତ୍ତରାଞ୍ଚଳ ପୁଲିସ ମହାନିରୀକ୍ଷଙ୍କ କାର୍ଯ୍ୟାଳୟରେ ଉଭୟ ପର୍ବ ସମ୍ପର୍କିତ ସୁରକ୍ଷା ବ୍ୟବସ୍ଥା ତଦାରଖ ଓ ପଶ୍ଚିମାଞ୍ଚଳରେ ମାଓ ସ୍ଥିତି ସମୀକ୍ଷା କରିଛନ୍ତି । ଜିଲ୍ଲା ପ୍ରଶାସନ ମଧ୍ୟ ଉତ୍ତରାଞ୍ଚଳ ଆରଡିସିଙ୍କ ଅଧ୍ୟକ୍ଷତାରେ ନିକଟରେ ଶାନ୍ତି ଓ ସମନ୍ୱୟ କମିଟି ବୈଠକ ଡାକି ସହରର ବିଭିନ୍ନ ସମ୍ପ୍ରଦାୟ ଓ ବର୍ଗଙ୍କ ସହ ଆଲୋଚନା କରିସାରିଛି । ଏଥର ଶାନ୍ତିପୂର୍ଣ୍ଣ ତଥା ସୌହାର୍ଦ୍ଦ୍ୟପୂର୍ଣ୍ଣ ବାତାବରଣରେ ଉଭୟ ପର୍ବ ଶେଷ କରିବାକୁ ପ୍ରଶାସନ ଲକ୍ଷ୍ୟ ରଖିଛି।
