ଭୁବନେଶ୍ୱର, ୧୦/୧୦ : ସାଇବର ଠକର ଅଦୃଶ୍ୟ ଜଗତରୁ ଟଙ୍କା ଫେରସ୍ତ ଆଣିବାରେ କମିଶନରେଟ୍ ପୁଲିସ ଫେଲ୍ ମାରିଛି । ଗଲା ୯ ମାସରେ ପ୍ରାୟ ୬୮ କୋଟି ୭୯ ଲକ୍ଷ ଟଙ୍କା ସାଇବର ଠକେଇ ହୋଇଥିଲା । କିନ୍ତୁ ପୁଲିସ ମାତ୍ର ୧.୪ କୋଟି ଟଙ୍କା ଫେରସ୍ତ ଆଣିପାରିଛି । ସେସବୁ ଟଙ୍କାକୁ ପୁଲିସ କ୍ଷତିଗ୍ରସ୍ତମାନଙ୍କୁ ଫେରାଇଛି । ପ୍ରାୟ ୧୧ କୋଟି ୮୬ ଲକ୍ଷ ୭୪ ହଜାର ୬୪୩ ଟଙ୍କାକୁ ଅଚଳ କରାଯାଇଛି । କିନ୍ତୁ ବଳକା ୫୫.୫ କୋଟି ଟଙ୍କା ସାଇବର ଠକ ଚଳୁ କରି ଦେଇଛନ୍ତି ।
ବୁଧବାର ଡିସିପି ପିନାକ ମିଶ୍ର ୭ଜଣ ଅଭିଯୋଗକାରୀଙ୍କୁ ପ୍ରାୟ ୪୪ ଲକ୍ଷ ଟଙ୍କା ଫେରାଇଛନ୍ତି । ଡିସିପିଙ୍କ ସୂଚନା ମୁତାବକ, ବର୍ଷ ଆରମ୍ଭରୁ ସାଇବର ଠକଙ୍କ ଦୌରାତ୍ମ ବଢ଼ିଚାଲିଛି । ଡିଜିଟାଲ ଆରେଷ୍ଟ ଓ ଟ୍ରେଡିଂକୁ ମୁଖ୍ୟ ଅସ୍ତ୍ର କରି ଲୋକଙ୍କୁ ଠକି ଚାଲିଛନ୍ତି । ସେପ୍ଟେମ୍ବର ଶେଷ ସୁଦ୍ଧା ପ୍ରାୟ ୩୬୬୦ଟି ଅଭିଯୋଗ ସାମ୍ନାକୁ ଆସିଛି । ପୁଲିସ ସାଇବର ଅପରାଧ ସମ୍ପର୍କିତ ମାମଲାର ତଦନ୍ତ କରି ଏଯାବତ୍ ମୋଟ ୨୪ଜଣଙ୍କୁ ଗିରଫ କରିଛି । ସାଇବର ଅପରାଧୀଙ୍କୁ ପିଛା କରି ପଶ୍ଚିମବଙ୍ଗ, ଗୁଜରାଟ, ରାଜସ୍ଥାନ, ମହାରାଷ୍ଟ୍ର, କର୍ଣ୍ଣାଟକ, ଦିଲ୍ଲୀ, ଆସାମ, ଛତିଶଗଡ଼ ଓ ମଧ୍ୟପ୍ରଦେଶକୁ ଯାଇଛି । ସେଠାକାର ବ୍ୟାଙ୍କଗୁଡି଼କ ସହ ଯୋଗାଯୋଗ କରି ଠକେଇ ଟଙ୍କାକୁ ଫେରସ୍ତ ଆଣିବା ପାଇଁ ପୁଲିସ ସବୁ ପ୍ରକାର ଜୋର୍ ଲଗାଇଛି । କିନ୍ତୁ ସାଇବର ଠକମାନେ ଟଙ୍କା ଠକିବା ପରେ ଏକାଧିକ ବ୍ୟାଙ୍କ ଆକାଉଣ୍ଟକୁ ଟଙ୍କା ପଠାଉଛନ୍ତି। ଅନ୍ଲାଇନ୍ ସପିଂ ଜରିଆରେ ଦାମୀ ସାମଗ୍ରୀ କିଣୁଛନ୍ତି । ଏସବୁ କ୍ଷେତ୍ରରେ କ୍ଷତିଗ୍ରସ୍ତଙ୍କ ଟଙ୍କା ଫେରସ୍ତ ଆଣିବା କାଠିକର ପାଠ ହୋଇପଡୁଛି । କେହି ଠକେଇର ଶିକାର ହେଲେ, ତୁରନ୍ତ ଡାଏଲ ୧୯୩୦ କିମ୍ବା ଚକ୍ଷୁ ପୋର୍ଟାଲ ଓ ସଞ୍ଚାରସାଥୀ ୱେବ୍ସାଇଟ୍ରେ ଅଭିଯୋଗ କରିବାକୁ ଡିସିପି ପରାମର୍ଶ ଦେଇଛନ୍ତି ।
