ଜଗତସିଂହପୁର,୨୪/୦୪: ନାବାଳିକାଙ୍କୁ ବିବାହ କରି ଆଇନ ଜାଲରେ ଛନ୍ଦି ହୋଇପଡ଼ିଛନ୍ତି ଜଣେ ପୁଲିସ ସବ୍ଇନ୍ସପେକ୍ଟର । ବିବାହ ପରବର୍ତ୍ତୀ ସମୟରେ ନିର୍ଯାତନାର ଶିକାର ହୋଇଥିବା ନାବାଳିକା ଆଇନର ଆଶ୍ରୟ ନେଇଛନ୍ତି । ନାବାଳିକାଙ୍କ ମା’ ଏ ସଂକ୍ରାନ୍ତରେ ବୁଧବାର ଜଗତସିଂହପୁର ଥାନାରେ ଏତଲା ଦେଇଛନ୍ତି । ସମ୍ବେଦନଶୀଳ ମାମଲା ହୋଇଥିବାରୁ ପୁଲିସ ତତ୍କାଳ ପୀଡ଼ିତା ନାବାଳିକାଙ୍କ ବୟାନ ରେକର୍ଡ କରିବା ସହ ତାଙ୍କୁ ଡାକ୍ତରୀ ମାଇନା ନିମନ୍ତେ ଜଗତସିଂହପୁର ମୁଖ୍ୟ ଡାକ୍ତରଖାନାକୁ ପଠାଇଛି ।
ମିଳିଥିବା ଖବର ମୁତାବକ, ଜଗତସିଂହପୁର ଥାନା ଅଞ୍ଚଳର ଏହି ନାବାଳିକାଙ୍କୁ ୧୫ ବର୍ଷ ବୟସ ହୋଇଥିବା ସମୟରେ ସୋସିଆଲ୍ ମିଡିଆ ମାଧ୍ୟମରେ ତାଙ୍କ ସହ ପରିଚିତ ହୋଇଥିଲେ ବାଲେଶ୍ୱର ଜିଲ୍ଲା ରତେଇ ବାଲିଆପାଳ ଅଞ୍ଚଳର ଜଣେ ପୁଲିସ ସବ୍ ଇନ୍ସପେକ୍ଟର(ଏସ୍ଆଇ) । ନିବିଡ଼ତା ବଢିବା ପରେ ସଂପୃକ୍ତ ନାବାଳିକାଙ୍କୁ ନିଜ ପାଖକୁ କୌଣସିମତେ ସଂପୃକ୍ତ ଏସ୍ଆଇ ନେଇ ଯାଇଥିଲେ। ପାଖାପାଖି ୨ ବର୍ଷ ଧରି ଉଭୟ ଏକାଠି ରହିଥିଲେ । ବର୍ତ୍ତମାନ ପୀଡ଼ିତାଙ୍କ ବୟସ ୧୭ ବର୍ଷ । ନାବାଳିକା ଏସ୍ଆଇଙ୍କ ପାଖରେ ରହିବା ଭିତରେ ଉଭୟଙ୍କ ବିବାହ ସଂପନ୍ନ ହୋଇଥିଲା । ବିବାହ ପରେ ଉଭୟ ରାୟଗଡ଼ା, ଗୁଣୁପୁର ଆଦି ସ୍ଥାନରେ ରହିଥିଲେ, ଶାରୀରିକ ସଂପର୍କ ରକ୍ଷା କରିଥିଲେ । ପତ୍ନୀ ଭାବେ ଗ୍ରହଣ କରି ନାବାଳିକାଙ୍କୁ ନିଜ ଘରକୁ ନେଇଥିଲେ ସଂପୃକ୍ତ ଏସ୍ଆଇ ।
କୌଣସି କାରଣରୁ ଶାଶୂ ଘରେ ରହିବା ସମୟରେ ମନୋମାଳିନ୍ୟ ବଢିଥିଲା । ପୀଡ଼ିତା ନାବାଳିକାଙ୍କ ମା’ଙ୍କ ଅଭିଯୋଗ, ସେଠାରେ ଝିଅ ପ୍ରତି ଅତ୍ୟାଚାର କରାଯାଇଥିଲା । ନିର୍ଯାତନା ବଢିବାରୁ ପୀଡ଼ିତା ସେଠାରୁ ଚାଲି ଆସିଥିଲେ । ଏବେ ପୀଡ଼ିତା ନାବାଳିକା ଭୁବନେଶ୍ୱରରେ ଜଣେ ସଂପର୍କୀୟାଙ୍କ ଘରେ ରହୁଛନ୍ତି । ସଂପୃକ୍ତ ଏସ୍ଆଇ ପୁରୀ ଜିଲ୍ଲାରେ କାର୍ଯ୍ୟ କରୁଥିବା ଚର୍ଚ୍ଚାର ପରିଧିକୁ ଆସିଛି । ଜଗତସିଂହପୁର ପୁଲିସ ଏହି ମାମଲାରେ ସଂପୂର୍ଣ୍ଣ ନିରବତା ଅବଲମ୍ବନ କରୁଥିବାରୁ ଅଧିକ ତଥ୍ୟ ମିଳିପାରି ନାହିଁ । ତେବେ ପୀଡ଼ିତା ନାବାଳିକା ନିଜ ମା’ଙ୍କ ସହ ଥାନାର ଦ୍ୱାରସ୍ଥ ହେବାର ସୁରାକ୍ ପାଇ ସଂପୃକ୍ତ ଏସ୍ଆଇ ମୋବାଇଲ୍ ଫୋନ୍ ବନ୍ଦ କରି ଗାଏବ ହୋଇଯାଇଥିବା କୁହାଯାଉଛି ।
