ନୂଆଦିଲ୍ଲୀ: ଆମେରିକାର ୪୭ ତମ ରାଷ୍ଟ୍ରପତି ଭାବରେ ଶପଥ ନେଇଛନ୍ତି ଡୋନାଲ୍ଡ ଟ୍ରମ୍ପ । ଏହି ଅବସରରେ ଟ୍ରମ୍ପଙ୍କ ପାଖକୁ ଅଭିନନ୍ଦନର ସୁଅ ଛୁଟିଛି । ବହୁ ଦେଶର ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଶୁଭେଚ୍ଛା ଜଣାଇଛନ୍ତି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଟ୍ରମ୍ପଙ୍କୁ ଦ୍ବିତୀୟ ଇନିଂସ୍ ଲାଗି ଶୁଭକାମନା ଜଣାଇଛନ୍ତି । ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ମୋଦୀ ଲେଖିଛନ୍ତି, ‘ମୋର ପ୍ରିୟ ମତ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆମେରିକାର ୪୭ ତମ ରାଷ୍ଟ୍ରପତି ଭାବରେ ଐତିହାସିକ ଶପଥ ଗ୍ରହଣ ନେଇଥିବାରୁ ଶୁଭେଚ୍ଛା ଜଣାଉଛି । ପୁଣି ଥରେ ମିଳିମଶି ଦୁଇ ଦେଶର ହିତ ଲାଗି କାମ କରିବା ଏବଂ ଦୁନିଆ ଲାଗି ଉତ୍ତମ ଭବିଷ୍ୟତ ଦିଗରେ ଅଗ୍ରସର ହେବାକୁ ତତ୍ପର ଅଛି । ଆସନ୍ତା ସଫଳ କାର୍ଯ୍ୟକାଳ ପାଇଁ ଆପଣଙ୍କୁ ଶୁଭକାମନା ।’
Congratulations my dear friend President @realDonaldTrump on your historic inauguration as the 47th President of the United States! I look forward to working closely together once again, to benefit both our countries, and to shape a better future for the world. Best wishes for a…
— Narendra Modi (@narendramodi) January 20, 2025
ଆଜି ଡୋନାଲ୍ଡ ଟ୍ରମ୍ପଙ୍କ ସମେତ ଉପରାଷ୍ଟ୍ରପତି ଭାବରେ ଜେଡି ଭାନ୍ସ ଶପଥ ନେଇଛନ୍ତି । ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ୍ ଜନ ରବର୍ଟ ଟ୍ରମ୍ପଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ମା’ଙ୍କ ପାଖରୁ ମିଳିଥିବା ବାଇବେଲ୍ ଧରି ଶପଥ ନେଇଛନ୍ତି ଡୋନାଲ୍ଡ ଟ୍ରମ୍ପ ।
ଏହା ପୂର୍ବରୁ ଆମେରିକା ନିର୍ବାଚନରେ ବିଜୟ ହେବା ପରେ ଡୋନାଲ୍ଡ ଟ୍ରମ୍ପଙ୍କୁ ଶୁଭେଚ୍ଛା ଜଣାଇଥିଲେ ପ୍ରଧାନମନ୍ତ୍ରୀ ମୋଦୀ । ନିର୍ବାଚନରେ ବିଜୟୀ ହେବା ପରେ ଟ୍ରମ୍ପଙ୍କୁ ମୋଦୀ ଫୋନ୍ କରିଥିଲେ । ଏହି ସମୟରେ ଦୁଇ ନେତାଙ୍କ ମଧ୍ୟରେ ଦୀର୍ଘ ସମୟ ଧରି ଆଲୋଚନା ହୋଇଥିଲା । ଏହି ଆଲୋଚନା ପରେ ପିଏମ ମୋଦୀ ଏକ୍ସରେ ଲେଖିଥିଲେ, ‘ମୋ ବନ୍ଧୁ ରାଷ୍ଟ୍ରପତି ଟ୍ରମ୍ପଙ୍କ ସହ ଭଲ ଆଲୋଚନା ହୋଇଛି । ତାଙ୍କୁ ମୁଁ ଶୁଭେଚ୍ଛା ଜଣାଇଛି । ପ୍ରଯୁକ୍ତି, ଶକ୍ତି, ଅନ୍ତରୀକ୍ଷ ଏବଂ ଅନ୍ୟ କ୍ଷେତ୍ରରେ ଭାରତ ଓ ଆମେରିକା ସମ୍ବନ୍ଧକୁ ଅଧିକ ମଜଭୁତ କରିବା ଦିଗରେ ପୁଣି ମିଳିମିଶି କାର୍ଯ୍ୟ କରିବାକୁ ମୁଁ ଉତ୍ସୁକ ।’
