ନୂଆଦିଲ୍ଲୀ : ଡୋନାଲ୍ଡ ଟ୍ରମ୍ପ ଆମେରିକାର ୪୭ତମ ରାଷ୍ଟ୍ରପତି ଭାବେ ଶପଥ ନେଲେ। ଏହି ଶୀର୍ଷ ପଦରେ ଏହା ତାଙ୍କର ଦ୍ୱିତୀୟ କାର୍ଯ୍ୟକାଳ ହେବ, ଯେଉଁଥିରେ ସେ ଆମେରିକୀୟ ସଂସ୍ଥା ଗୁଡ଼ିକୁ ନୂଆରୂପ ଦେବାକୁ ଯାଉଛନ୍ତି। ଟ୍ରମ୍ପଙ୍କ ପର୍ବରୁ ଜେଡି ଭେନ୍ସ ଆମେରିକାର ଉପରାଷ୍ଟ୍ରପତି ପଦ ପାଇ ଶପଥ ନେଇଛନ୍ତି। ଡୋନାଲ୍ଡ ଟ୍ରମ୍ପ ଗତ ବର୍ଷ ନଭେମ୍ୱରରେ ହୋଇଥିବା ନିର୍ବାଚନରେ ବିଜୟ ହାସଲ କରି ଇତିହାସ ରଚି ଥିଲେ। ସେ ଆମେରିକାରେ ୨ୟ ଥର ଶୀର୍ଷ ପଦକୁ ଫେରିଛନ୍ତି।
ପ୍ରବଳ ଥଣ୍ଡା କାରଣରୁ ଟ୍ରମ୍ପଙ୍କ ଶପଥ ଗ୍ରହଣ ସମାରୋହ ଆବଦ୍ଧ ସ୍ଥାନରେ ଆୟୋଜିତ କରାଯାଇଛି, ଯାହା ସ୍ଥାନୀୟ ସମୟାନୁସାରେ ଦ୍ୱିପ୍ରହର ୧୨ଟା ସମୟରେ ହୋଇଛି। ଶପଥ ନେବା କ୍ଷଣି ଆମେରିକାରେ ପୁଣି ଥରେ ଟ୍ରମ୍ପ ରାଜ୍ର ଆରମ୍ଭ ହୋଇଯାଇଛି। ଶପଥ ଗ୍ରହଣ ପରେ ୭ଟି ତୋପର ସଲାମୀ ମଧ୍ୟ ଦିଆଯାଇଛି।
ରାଷ୍ଟ୍ରପତି ପଦର ଶପଥ ନେବା ପରେ ଟ୍ରମ୍ପ ରେକର୍ଡ କରିଛନ୍ତି। ପଦଭାର ଗ୍ରହଣ କରିବାର କିଛି ହିଁ ଘଣ୍ଟା ଭିତରେ ଟ୍ରମ୍ପଙ୍କ ୧୦୦ରୁ ଅଧିକ କାର୍ଯ୍ୟକାରୀ ଆଦେଶ ଉପରେ ହସ୍ତାକ୍ଷର କରାଯିବାର ଆଶା ରହିଛି। ଏଥିରେ ଜଳବାୟୁ , ଇମିଗ୍ରେସନ , ଶକ୍ତି ନୀତି ଓ ସଂଘୀୟ ସରକାରରେ ବିବିଧତା ପ୍ରକ୍ରିୟା ସାମିଲ ଅଛି।
ଟ୍ରମ୍ପ ପୁଣି ଥରେ ଆମେରିକାର ରାଷ୍ଟ୍ରପତି ହେବାରେ ପିଏମ ମୋଦି ତାଙ୍କୁ ଶୁଭେଚ୍ଛା ଜଣାଇଛନ୍ତି । ପିଏମ୍ ମୋଦି ସୋସିଆଲ ମିଡ଼ିଆ ଏକ୍ସରେ ଲେଖିଛନ୍ତି, ମୋର ପ୍ରିୟ ମିତ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଆପଣଙ୍କୁ ସଂଯୁକ୍ତ ରାଷ୍ଟ୍ର ଆମେରିକାର ୪୭ତମ ରାଷ୍ଟ୍ରପତି ହେବାରେ ଶୁଭେଚ୍ଛ। ମୁଁ ଉଭୟ ଦେଶ ଲାଭାନ୍ୱିତ ହେବା ଓ ଦୁନିଆ ପାଇଁ ସୁନ୍ଦର ଭବିଷ୍ୟତକୁ ଆକାର ଦେବା ପାଇଁ ପୁଣି ଥରେ ଏକାଠି ମିଶି କାମ କରିବାକୁ ଉତ୍ସୁକ। ଆପଣଙ୍କୁ ଆଗାମୀ ସଫଳ କାର୍ଯ୍ୟକାଳ ପାଇଁ ଶୁଭକାମନା।
ଉଲ୍ଲେଖନୀୟ ଯେ, ଟ୍ରମ୍ପଙ୍କ ଶପଥ ଗ୍ରହଣ ସମାରୋହ ପାଇଁ ବିଦେଶ ମନ୍ତ୍ରୀ ଏସ.ଜୟଶଙ୍କର ଆମେରିକାରେ ପହଞ୍ଚି ଥିଲେ। ସେ ସୋମବାର କହିଥିଲେ କି, ସେ ଆମେରିକାର ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ସମାରୋହରେ ଭାରତର ପ୍ରତିନିଧିତ୍ୱ କରି ସମ୍ମାନିତ ଅନୁଭବ କରୁଛି। ଟ୍ରମ୍ପଙ୍କ ଶପଥ ଗ୍ରହଣ ସମାରୋହ ପାଇଁ ପୂର୍ବତନ ରାଷ୍ଟ୍ରପତି ବରାକ୍ ଓବାମା, ଟ୍ରମ୍ପଙ୍କ ସହଯୋଗୀ ଓ ମିତ୍ର ଏଲନ ମସ୍କ , ମେଟାର କୋ-ଫାଉଣ୍ଡର ମାର୍କ ଜୁକରବର୍ଗଙ୍କ ସମେତ ଅନେକ ପ୍ରସିଦ୍ଧ ଉଦ୍ୟୋଗପତି ମଧ୍ୟ ପହଞ୍ଚିଛନ୍ତି।
