ନୂଆଦିଲ୍ଲୀ,୨୧/୦୧: ୧୭୬୫ରୁ ୧୯୪୭ ଇଂରେଜ ଶାସନ କାଳରେ ରସାତଳଗାମୀ ହୋଇଥିଲା ଭାରତର ଅର୍ଥନୀତି । ଶାସନ କରିବାକୁ ଆସି ଏମାନେ ଦେଶରୁ ଲୁଟି ନେଇଥିଲେ ୬୪ ଲକ୍ଷ ୮୨ ହଜାର କୋଟି ଡଲାରର ସମ୍ପତ୍ତି । ଏହି ସମ୍ପତ୍ତି ଯାଇଥିଲା ବ୍ରିଟେନର ୧୦% ଧନୀ ବ୍ୟକ୍ତିଙ୍କ ପାଖକୁ । ୨୦୦ ବର୍ଷ ଆମ ଦେଶର ଘରୋଇ ଶିଳ୍ପ ଉପରେ କଟକଣା ଲଗାଇ ସେମାନଙ୍କ ଅଭିବୃଦ୍ଧି ବାଟ ବନ୍ଦ କରିଦେଇଥିଲେ । ବ୍ରିଟେନ ସାମଗ୍ରୀକୁ ଲଗାତାର ପ୍ରୋତ୍ସାହନ ଭାରତକୁ ଦୁର୍ବଳ କଲା ।
ସେହି ସ୍ଥିତି ଏବେ ବି ଅନ୍ୟ ଏକ ଢଙ୍ଗରେ ଜାରି ରହିଛି । ଇଷ୍ଟଇଣ୍ଡିଆ କମ୍ପାନି ଭଳି ବହୁଦେଶୀୟ କମ୍ପାନି ଗୁଡିକ ଏଭଳି ଶୋଷଣ ନୀତି ଜାରି ରଖିଛନ୍ତି । ଏକଚାଟିଆ ନୀତି, ସାମରିକ କ୍ଷମତା ବ୍ୟବହାର କରି ଦୁର୍ବଳ ରାଷ୍ଟ୍ରଗୁଡିକର ଯୋଗ୍ୟ ମାନବ ସମ୍ବଳ ଏବଂ ପ୍ରାକୃତିକ ସମ୍ବଳକୁ ଲୁଟ କରୁଛନ୍ତି ସେମାନେ ।
ଏଭଳି ତଥ୍ୟ ଅକ୍ସଫାମ ଇଣ୍ଟରନ୍ୟାସନାଲ ପକ୍ଷରୁ ଜାରି ‘ଟେକର୍ସ ନଟ୍ ମେକର୍ସ ରିପୋର୍ଟରୁ ଜଣାପଡିଛି । ସ୍ୱିଜରଲାଣ୍ଡର ଡାଭୋସରେ ଚାଲିଥିବା ୱାର୍ଲଡ ଇକୋନୋମିକ ଫୋରମ ବାର୍ଷିକ ବୈଠକ ଅବସରରେ ଅକ୍ସଫାମ ଏଭଳି ଏକ ରିପୋର୍ଟ ଜାରି କରିଛି । ଏଥିରେ କୁହାଯାଇଛି ଯେ, ବର୍ତ୍ତମାନର ବହୁଦେଶୀୟ କମ୍ପାନି ଗୁଡିକ ଯୋଗାଣ ଶୃଙ୍ଖଳାକୁ ନିୟନ୍ତ୍ରଣ କରି ସମ୍ବଳ ଲୁଟୁଛନ୍ତି । ଯାହା ‘ଗ୍ଲୋବାଲ ସାଉଥ‘କୁ ଗଭୀର କ୍ଷତି ପହଞ୍ଚାଉଛି ।
ଏଭଳି କର୍ପୋରେଟଗୁଡିକ ନିଜେ ବେଶ ଭଲ ଫାଇଦା କମାଉଛନ୍ତି । ମାତ୍ର ଏହାର ଲାଭ ଅନ୍ୟ ଦେଶଗୁଡିକୁ ମିଳୁନି । ଇଂରେଜ ଶାସନ ସମୟରେ ବୁଣାଯାଇଥିବା ଅସମାନତାର ମଞ୍ଜି ବର୍ତ୍ତମାନ ରୂପ ବଦଳାଇ କାୟା ବିସ୍ତାର କରିଛି, ତାର ବାସ୍ତବ ଛବି ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି ।
୧୭୬୫ରୁ ୧୯୦୦ ଯାଏ ବ୍ରିଟେନ ଭାରତରୁ ୬୪.୮୨ ଲକ୍ଷ କୋଟି ଡଲାର ସମ୍ପତ୍ତି ଲୁଟି ନେଇଥିଲା । ଏଥି ମଧ୍ୟରୁ ଅର୍ଦ୍ଧାଧିକ ସମ୍ପତ୍ତି କେବଳ ବ୍ରିଟେନର ୧୦% ଲୋକଙ୍କ ନିକଟକୁ ଯାଇଥିଲା । ଏହି ସମ୍ପତ୍ତି ବ୍ରିଟେନର ଅଭିବୃଦ୍ଧିକୁ ତ୍ୱରାନ୍ୱିତ କରିଥିବା ବେଳେ ଭାରତ କାଙ୍ଗାଳ ସ୍ଥିତିକୁ ଚାଲି ଆସିଲା । ଉପନିବେଶବାଦ ରୀତିମତ ଭାବେ ଭାରତର ଶିଳ୍ପ କ୍ଷେତ୍ରକୁ ଦୀର୍ଘ ମିଆଦୀ ଭିତ୍ତିରେ ପଙ୍ଗୁ କରିଦେଲା ।
୨୦୨୪ରେ ଅରବପତିଙ୍କ ସମ୍ପତ୍ତି ୨ ଲକ୍ଷ କୋଟି ଡଲାର ବଢ଼ିଛି । ଏହା ଏବେ ୧୫ ଲକ୍ଷ କୋଟି ଡଲାର ଛୁଇଁଛି । ଗତ ବର୍ଷ ତୁଳନାରେ ଏଥିରେ ୩ ଗୁଣା ବୃଦ୍ଧି ହୋଇଛି । ଗତ ବର୍ଷ ସାରା ବିଶ୍ୱରେ ସୃଷ୍ଟି ହୋଇଛନ୍ତି ୨୦୪ ନୂଆ ଅରବପତି । ଗୋଟିଏ ପଟେ ଅତିଧନୀ ବ୍ୟକ୍ତି ବିଶେଷଙ୍କ ଅଭ୍ୟୁଦୟ ଏବଂ ଅନ୍ୟପଟେ ଦାରିଦ୍ର୍ୟର ବିକଳ ଚିତ୍ରକୁ ଅକ୍ସଫାମ ଏହାର ରିପୋର୍ଟରେ ଦର୍ଶାଇଛି ।
୬୦% ଅରବପତି ସେମାନଙ୍କ ସମ୍ପତ୍ତି ବଂଶାନୁକ୍ରମିକ ଏବଂ ଏକଚାଟିଆ ଭାବେ ଲାଭ କରିଛନ୍ତି । ଏହି ରିପୋର୍ଟ ଆତ୍ମ ପ୍ରୟାସରେ ଅରବପତି ହୋଇଥିବା ବ୍ୟକ୍ତିଙ୍କ ଦାବିକୁ ଚ୍ୟାଲେଞ୍ଜ କରିବା ସହ ବଂଶାନୁକ୍ରମିକ ସମ୍ପତ୍ତି ସମାଜରେ ଅସମାନତା ସୃଷ୍ଟି କରୁଥିବା ଦର୍ଶାଇଛି । ୨୦୩୪ ବେଳକୁ ବଂଶାକୁକ୍ରମିକ ଭାବେ ୫.୨ ଲକ୍ଷ କୋଟି ଡଲାର ସମ୍ପତ୍ତି ପରପୀଢ଼ି ଦାୟାଦଙ୍କ ନିକଟକୁ ଯିବ । ଯାହା ସମ୍ପତ୍ତି ମାତ୍ର କିଛି ଲୋକଙ୍କ ନିକଟରେ ଠୁଳ ବୋଲି ଦର୍ଶାଉଛି ।
ବେତନର ଅସମାନତା ଉଚ୍ଚ ଆୟକାରୀ ରାଷ୍ଟ୍ର ଗୁଡିକରେ ମଧ୍ୟ ରହିଛି । ଏଠାରେ ପୁରୁଷଙ୍କୁ ତୁଳନାରେ ମହିଳା ମାନେ ୨୦.୯% କମ୍ ପାରିଶ୍ରମିକ ପାଉଛନ୍ତି । ସମାନ ଦକ୍ଷତା ଥାଇ ଏହି ଦେଶ ଗୁଡିକର ପ୍ରଫେସନାଲଙ୍କ ତୁଳନାରେ ଗ୍ଲୋବାଲ ସାଉଥର ବ୍ୟକ୍ତିବିଶେଷ ୯୫% ଯାଏ କମ୍ ପାରିଶ୍ରମିକରେ କାମ କରୁଥିବା ରିପୋର୍ଟରେ ଦର୍ଶାଯାଇଛି ।
ଏବେ ବିଶ୍ୱ ଯୋଗାଣ ଶୃଙ୍ଖଳା ଇଂରେଜ ଶାସନ ଅମଳରେ ଲୁଟ୍ ଭଳି ବ୍ୟବହାର ହେଉଛି । ଗ୍ଲୋବାଲ ସାଉଥର ପ୍ରଫେସନାଲମାନେ ଖରାପ କାର୍ଯ୍ୟ ସ୍ଥିତି, ସ୍ୱଳ୍ପ ବେତନ ଏବଂ ସାମାଜିକ ସୁରକ୍ଷା ଲାଭରୁ ବଞ୍ଚିତ ହେଉଛନ୍ତି । କର୍ପୋରେଟ ଗୁଡିକ ହଜାର ହଜାର କୋଟିର ଲାଭ କମାଉଥିବା ବେଳେ କର୍ମଚାରୀଙ୍କ ଅଧିକାରକୁ ଭୃକ୍ଷେପ କରୁନାହାନ୍ତି । ସ୍ୱଚ୍ଛଳ ନ ଥିବାରୁ ଦେଶ ଗୁଡିକରେ ଏଭଳି ସ୍ଥିତି ବିରୋଧରେ ଲଢ଼େଇ କରିବାକୁ ସାହସ କରୁନାହାନ୍ତି ।
ରିପୋର୍ଟ ମୁତାବକ, ୧୭୫୦ରେ ଶିଳ୍ପ କ୍ଷେତ୍ରରେ ଭାରତର ଅଂଶ ୨୫% ଥିଲା ଯାହା ୧୯୦୦ ବେଳକୁ ମାତ୍ର ୨%କୁ ଖସି ଆସିଲା । ଭାରତୀୟ ଶିଳ୍ପ ଗୁଡିକ ଉପରେ କଡା କଟକଣା ଜାରି କରିବା ସହ ବ୍ରିଟେନ ଫ୍ୟାକ୍ଟ୍ରି ଗୁଡିକର କଞ୍ଚାମାଲ ଏବଂ ଉତ୍ପାଦ ବ୍ୟବହାର କରିବାକୁ ବାଧ୍ୟ କରାଯାଇଥିଲା । ବ୍ରିଟେନ ଅଶୋଧିତ ତୈଳ, ଖଣିଜ ଖନନ କରି ନିଜ ଦେଶକୁ ବୋହି ନେଉଥିଲା । ଯାହା ଜଳବାୟୁ ପରିବର୍ତ୍ତନର ଅନ୍ୟତମ କାରଣ ପାଲଟିଥିଲା ।
ନିମ୍ର ପେଟେଣ୍ଟ ବେଳେ ସ୍ୱଦେଶୀ ଜ୍ଞାନକୁ ଅଣଦେଖା କରାଗଲା । ଏଥିରୁ ଲାଭ ନେବା ସହ ପ୍ରକୃତ ହିତାଧିକାରୀ ବିଦେଶୀ ରାଷ୍ଟ୍ର ଗୁଡିକ ଭୁଲିଗଲେ । କର୍ପୋରେଟ ଗୁଡିକ ଲାଭ ନେବା ସହ ଲୋକଙ୍କ ବିକାଶ ପ୍ରତି ଏତେଟା ଧ୍ୟାନ ଦେଲେ ନାହିଁ । ବିଶ୍ୱ ବାଣିଜ୍ୟ ସଙ୍ଗଠନ ଏବଂ ବିଶ୍ୱ ବ୍ୟାଙ୍କ ଭଳି ଅନୁଷ୍ଠାନ ଗୁଡିକ ଅସମାନତାକୁ ଲଗାତାର ପ୍ରୋତ୍ସାହିତ କରିଛନ୍ତି । ଏମାନେ ସର୍ବଦା ଗ୍ଲୋବାଲ ନର୍ଥର ସ୍ୱର ହୋଇଥିବା ଏହି ରିପୋର୍ଟରେ କୁହାଯାଇଛି ।
ଏହି ରିପୋର୍ଟରେ ବିକଶିତ ଦେଶ ଗୁଡିକର କୋଭିଡ-୧୯ ଭାକ୍ସିନ ପ୍ରସ୍ତୁତିରେ ବୈାଦ୍ଧିକ ସମ୍ପତ୍ତି ବିବାଦକୁ ମଧ୍ୟ ଦର୍ଶାଯାଇଛି । ଏ କ୍ଷେତ୍ରରେ ଭାରତ ଏବଂ ଦକ୍ଷିଣ ଆଫ୍ରିକା ଭଳି ଦେଶ ଗୁଡିକର ପ୍ରୟାସକୁ ଅଣଦେଖା କରାଯାଇଛି । ସେହିଭଳି ଗ୍ଲୋବାଲ ସାଉଥକୁ ପାଣ୍ଠି ଯୋଗାଣ ଦ୍ୱାରା ଶୋଷଣ କରାଯାଉଛି । ଫଳରେ ଏହା ମଧ୍ୟ ନିୟୁତାଧିକ ଲୋକଙ୍କୁ ଦାରିଦ୍ର୍ୟ ମୁଖକୁ ଠେଲି ଦେଉଥିବା ରିପୋର୍ଟରେ କୁହାଯାଇଛି।
