ଭୁବନେଶ୍ୱର,୧୭/୦୫: ରାଜ୍ୟରେ ମାଟ୍ରିକ ପରୀକ୍ଷା ଫଳ ପ୍ରକାଶିତ ହେବାକୁ ଇତିମଧ୍ୟରେ ୧୫ଦିନ ବିତିଗଲାଣି । ସିବିଏସ୍ଇ ଦଶମ ଫଳ ମଧ୍ୟ ବାହାରି ସାରିଛି । ହେଲେ ଏପର୍ଯ୍ୟନ୍ତ ଯୁକ୍ତ ଦୁଇ ନାମଲେଖା ପାଇଁ ବିଜ୍ଞପ୍ତି ପ୍ରକାଶ ପାଇନି । ଯାହାକୁ ନେଇ ଚିନ୍ତାରେ ପଡ଼ିଛନ୍ତି ଛାତ୍ରଛାତ୍ରୀ।
ଗୋଟିଏ ପଟେ ଉଚ୍ଚଶିକ୍ଷା ବିଭାଗ ପକ୍ଷରୁ ଯୁକ୍ତ ତିନି ନାମଲେଖା ପାଇଁ ଆବେଦନ ପ୍ରକ୍ରିୟା ଚାଲିଛି । ଯୁକ୍ତ ତିନି ନାମଲେଖା ପାଇଁ ଗତ ଏପ୍ରିଲ୍ ୧୬ ତାରିଖରୁ ନାମଲେଖା ଆବେଦନ ଆରମ୍ଭ ହୋଇଛି । ସେହିପରି ପିଜିର ନାମଲେଖା ଆବେଦନ ଶେଷ ହୋଇ ପ୍ରବେଶିକା ପରୀକ୍ଷା ମଧ୍ୟ ସରିଲାଣି । ବିଏଡ୍ର ନାମଲେଖା ଆବେଦନ ଶେଷ ହୋଇଛି । ହେଲେ ସ୍କୁଲ ଓ ଗଣଶିକ୍ଷା ବିଭାଗ ପଛରେ ରହିଛି । ଯୁକ୍ତ ଦୁଇ ନାମଲେଖା ବିଜ୍ଞପ୍ତି ପ୍ରକାଶ ପାଉନଥିବାରୁ ଛାତ୍ରଛାତ୍ରୀମାନେ ଅସନ୍ତୋଷ ପ୍ରକାଶ କରିଛନ୍ତି ।
ବିଭାଗର ତଥ୍ୟ ଅନୁସାରେ, ୨୦୨୫-୨୬ ଶିକ୍ଷାବର୍ଷରେ ରାଜ୍ୟର ସମସ୍ତ ଜିଲ୍ଲାରେ ଥିବା ୨୩୯୫ଟି ଜୁନିଅର କଲେଜ(ଯୁକ୍ତ ଦୁଇ)ରେ ୫ ଲକ୍ଷ୬୩ ହଜାର ସିଟ୍ରେ ନାମଲେଖା ହେବ । କଳାରେ ସର୍ବାଧିକ ୩ ଲକ୍ଷ ୧୭ହଜାର ୭୦୮ଟି ସିଟ୍ ଥିବା ବେଳେ ବିଜ୍ଞାନରେ ୧ ଲକ୍ଷ ୭୯ ହଜାର ୪୫୩, ବାଣିଜ୍ୟରେ ୪୧୯୧୨, ସଂସ୍କୃତରେ ୧୩୫୦୪ ଓ ଭୋକେସନାଲ୍(ଧନ୍ଦାମୂଳକ)ରେ ସର୍ବନିମ୍ନ ୧୦୫୮୮ଟି ସିଟ୍ରେ ନାମଲେଖା ହେବ । ଖୋର୍ଦ୍ଧା ଜିଲ୍ଲାରେ ସର୍ବାଧିକ ୧୬୬ଟି କଲେଜ ରହିଛି । ଏହାପରେ ବାଲେଶ୍ୱରରେ ୧୫୬, ଗଞ୍ଜାମରେ ୧୫୪, ମୟୂରଭଞ୍ଜରେ ୧୩୬, କଟକରେ ୧୩୩, ଯାଜପୁରରେ ୧୧୪, ସୁନ୍ଦରଗଡ଼ରେ ୧୧୨, ବଲାଙ୍ଗିରରେ ୧୧୧, କଳାହାଣ୍ଡିରେ ୧୦୬ଟି କଲେଜ ଅଛି ।
ସେହିପରି ପୁରୀରେ ୯୮, କେନ୍ଦ୍ରାପଡ଼ାରେ ୯୨, କେନ୍ଦୁଝରରେ ୮୭, କୋରାପୁଟରେ ୬୬, ସମ୍ବଲପୁରରେ ୬୯, ସୋନପୁରରେ ୫୧, ଅନୁଗୁଳରେ ୬୪, ବରଗଡ଼ରେ ୮୨, ଭଦ୍ରକରେ ୮୩, ଢେଙ୍କାନାଳରେ ୬୮, ରାୟଗଡ଼ାରେ ୫୩, ନବରଙ୍ଗପୁରରେ ୫୧, ନୟାଗଡ଼ରେ ୫୫, କନ୍ଧମାଳରେ ୪୨, ନୂଆପଡ଼ାରେ ୩୯, ଗଜପତିରେ ୩୪, ମାଲକାନଗିରିରେ ୩୨, ଝାରସୁଗୁଡ଼ାରେ ୩୧, ବୌଦ୍ଧରେ ୨୫, ଦେବଗଡ଼ରେ ସର୍ବନିମ୍ନ ୨୪ଟି ଜୁନିଅର କଲେଜ ରହିଛି ।
ଚଳିତବର୍ଷ ୪ ଲକ୍ଷ ୮୪ ହଜାର ୮୬୩ ଜଣ ଛାତ୍ରଛାତ୍ରୀ ମାଟ୍ରିକ ପାସ୍ କରିଥିବା ବେଳେ ୫୫ ହଜାର ୭୩୪ଜଣ ସିବିଏସଇ ଦଶମ ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି । ମାଧ୍ୟମିକ ଶିକ୍ଷା ବୋର୍ଡର ମାଟ୍ରିକ ପରୀକ୍ଷା ଫଳ ବାହାରିବା ଭଳି ଆଇସିଏସ୍ଇ ଓ ସଂସ୍କୃତ ମଧ୍ୟମା ପରୀକ୍ଷା ଫଳ ମଧ୍ୟ ବାହାରି ସାରିଛି । ତେଣୁ କେବେ ଯୁକ୍ତ ଦୁଇ ନାମ ଲେଖା ବିଜ୍ଞପ୍ତି ବାହାରିବ, ଛାତ୍ରଛାତ୍ରୀମାନେ ଅପେକ୍ଷାରେ ରହିଛନ୍ତି ।
