କଟକ, ୧୭/୫ : ବଳାତ୍କାର ପୀଡିତାଙ୍କୁ ବି ଛାଡିଲେନି ଦଲାଲ। ନରସିଂହପୁରର ଜଣେ ନାବାଳିକା ୨୦୨୦ମସିହାରେ ବଳାତ୍କାରର ଶୀକାର ହୋଇଥିଲେ । ପୀଡିତା ଯେହେତୁ ନାବାଳିକା ତେଣୁ ସରକାରୀ ନିୟମ ଅନୁସାରେ ସେ ଅନୁକମ୍ପାମୂଳକ ସହାୟତା ପାଇବା କଥା। ପୀଡ଼ିତାଙ୍କ ଅଭିଯୋଗ ଅନୁସାରେ କିଛି ମହିଳା ନିଜକୁ କଟକ ଜିଲ୍ଲାପାଳଙ୍କ ଅଫିସର କର୍ମଚାରୀ ପରିଚୟ ଦେଇ ତାଙ୍କ ଠାରୁ ଏହି ଟଙ୍କା ହଡପ କରି ନେଇଛନ୍ତି।
ପୀଡିତାଙ୍କର କହିବା ଅନୁସାରେ ସେ ଜିଲ୍ଲା ଆଇନସେବା ପ୍ରାଧିକରଣଙ୍କ ପକ୍ଷରୁ ମାର୍ଚ୍ଚ ୨୩ତାରିଖରେ ୩ଲକ୍ଷ ୭୫ହଜାର ଟଙ୍କା ପାଇଥିଲେ। ତେବେ ନିଜକୁ ଜିଲ୍ଲାପାଳଙ୍କ ଅଫିସର ସଙ୍ଗୀତା ମାଡାମ ବୋଲି ପରିଚୟ ଦେଇ ଜନୈକ ମହିଳା ସେହି ଟଙ୍କାରୁ ଲକ୍ଷେ ଟଙ୍କା ଫେରାଇ ଦେବା ପାଇଁ ପୀଡିତାଙ୍କୁ କହିଥିଲେ। ଲକ୍ଷେ ଟଙ୍କା ନ ଫେରାଇଲେ ସେ ସମ୍ପୂର୍ଣ୍ଣ ଟଙ୍କା ତାଙ୍କ ଆକାଉଣ୍ଟକୁ ନେଇ ଯିବେ ବୋଲି ଧମକ ଦେଇଥିଲେ। ତେଣୁ ପୀଡିତା ଜଣକ ସେହି ମହିଳାଙ୍କ କହିବା ଅନୁସାରେ ଦୁଇଟି ୟୁପିଆଇ କାକାଉଣ୍ଟକୁ ଲକ୍ଷେ ଏକ ହଜାର ଟଙ୍କା ପଠାଇ ଦେଇଥିଲେ। ଯେଉଁ ଦୁଇଟି ୟୁପିଆଇ ଆକାଉଣ୍ଟକୁ ପୀଡିତା ଟଙ୍କା ପଠାଇଛନ୍ତି ସେହି ଆକାଉଣ୍ଟ ଦୁଇଟିର ବ୍ୟାଙ୍କିଙ୍ଗ ନାଁ ହେଉଛି, ସୌମ୍ୟା ବିଶ୍ବାଳ ଓ ଲକ୍ଷ୍ମୀପ୍ରିୟା ରାଉତରାୟ। ପୀଡିତା ଟଙ୍କା ପଠାଇ ସାରିବା ପରେ ଯେଉଁ ଫୋନ୍ ନମ୍ବରରୁ କଲ୍ ଆସୁଥିଲା ସେ ଗୁଡିକ ସୁଇଚ ଅଫ୍ ହେଇଯିବାରୁ ସେ ଠକାମୀର ଶୀକାର ହେଇଥିବା ଜାଣିବାକୁ ପାଇଲେ। ଆଜି ପୀଡିତା ଏ ନେଇ ଲାଲବାଗ ଥାନାରେ ଏତଲା ଦେଇଛନ୍ତି ଓ ଦଲାଲମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
