ଭୋଗରାଇ,୧୭/୫ : କୌଶଳକ୍ରମେ ଏଟିଏମ୍ କାର୍ଡ଼ ବଦଳ କରି ଦୀର୍ଘ ଦିନରୁ ଗ୍ରାହକମାନଙ୍କୁ ଲୁଟ୍ କରୁଥିବା ଜଣେ ଆନ୍ତଃରାଜ୍ୟ ଏଟିଏମ୍ ଲୁଟେରାକୁ ଆଜି ସ୍ଥାନୀୟ ଲୋକେ ଧରି ପୋଲିସ୍ ଜିମା ଦେଇଛନ୍ତି । ଉକ୍ତ ଯୁବକ ଜଣକ ପଶ୍ଚିମବଙ୍ଗ ରାଜ୍ୟ ପଶ୍ଚିମ ମେଦିନୀପୁର ଜିଲ୍ଲା ଦକ୍ଷିଣ ଚବିଶ ପ୍ରଗଣା ଅନ୍ତର୍ଗତ ପଶ୍ଚିମଜଟା ଦେଉଳୀ ଅଞ୍ଚଳର ପୁତୁଲ ସର୍ଦ୍ଦାରଙ୍କ ପୁଅ ଭାଷ୍କର ସର୍ଦ୍ଦାର ବୋଲି ପୋଲିସର ପ୍ରାଥମିକ ତଦନ୍ତରୁ ଜଣାପଡିଥିବାବେଳେ ତା'ଠାରୁ ଲୁଟରେ ବ୍ୟବହୃତ ବିଭିନ୍ନ ସାମଗ୍ରୀ ସହିତ ବିପୁଳ ପରିମାଣର ପୁରୁଣା ଏଟିଏମ୍ କାର୍ଡ଼ ମଧ୍ୟ ଜବତ କରାଯାଇଛି । ତେବେ ଖବର ଲେଖା ହେବା ଯାଏଁ ସମ୍ପୃକ୍ତ ବ୍ୟାଙ୍କ କର୍ତ୍ତୃପକ୍ଷଙ୍କ ତରଫରୁ କୌଣସି ଲିଖିତ ଅଭିଯୋଗ ହୋଇନଥିବାରୁ ତାକୁ ଥାନାରେ ଅଟକ ରଖାଯାଇ ପଚରାଉଚରା କରାଯାଉଥିବା ଜଣାପଡ଼ିଛି । ଏଭଳି ଏକ ଚାଞ୍ଚଲ୍ୟକର ଘଟଣା ଘଟିଛି ଭୋଗରାଇ ବ୍ଲକ ଅନ୍ତର୍ଗତ ଥାନା ଛକ ନିକଟରେ ଥିବା ଭାରତୀୟ ଷ୍ଟେଟବ୍ୟାଙ୍କ ଦେହୁର୍ଦ୍ଦା ଶାଖାରେ ।
ସୂଚନା ଅନୁସାରେ, ଗତ ୨ତାରିଖ ଦିନ ଭାଷ୍କର ଷ୍ଟେଟ୍ ବ୍ୟାଙ୍କ୍ ଦେହୁର୍ଦ୍ଦା ଶାଖା ପାର୍ଶ୍ୱରେ ଥିବା ଏଟିଏମରେ ପଶି ସଂଖ୍ୟା ଲେଖାଥିବା ବଟନରେ ଫେବି କ୍ଲିକ୍ ଓ କାର୍ଡ଼ ଭର୍ତ୍ତି କରାଯିବା ସ୍ଥାନରେ କାଗଜ ପୁରାଇ ଏଟିଏମକୁ ଅଚଳ କରି ଦେଇଥିଲା । ଏଥି ସହିତ ଗ୍ରାହକମାନେ ଟଙ୍କା ଉଠାଇବାକୁ ଆସିବା ପରେ ଟଙ୍କା ଉଠାଇଦେବା ବାହାନା କରି ସେମାନଙ୍କଠାରୁ କୌଶଳକ୍ରମେ ଏଟିଏମ୍ କାର୍ଡ଼ ବଦଳ କରି ନେଇ ଚମ୍ପଟ ମାରିବା ସହ ପରବର୍ତ୍ତୀ ସମୟରେ ଟଙ୍କା ଉଠାଇ ନେଇଥିଲା । ତେବେ ଘଟଣାକୁ ୧୫ଦିନ ନ ପୁରୁଣୁ ଅନୁରୂପ ଭାବେ ଆଜି ଅପରାହ୍ନ ପ୍ରାୟ ୬ଟା ସମୟରେ ଭାଷ୍କର ପୁଣି ଥରେ ଉକ୍ତ ଏଟିଏମକୁ ଅଚଳ କରିବା ସହିତ ଜଣେ ଗ୍ରାହକଙ୍କ କାର୍ଡ଼ ବଦଳାଇ ନେଇ ପାଖରେ ଥିବା ଏକ୍ସିସ ବ୍ୟାଙ୍କର ଏଟିଏମକୁ ଟଙ୍କା ଉଠାଇବାକୁ ଯାଇଥିଲା । ଏହି ସମୟରେ ବ୍ୟାଙ୍କର ସୁରକ୍ଷାକର୍ମୀ ଓ ଅନ୍ୟାନ୍ୟ ଗ୍ରାହକମାନେ ଘଟଣା ସମ୍ପର୍କରେ ଜାଣିପାରି ସିସିଟିଭି ଫୁଟେଜ ଯାଞ୍ଚ କରିବା ସହିତ ବିଭିନ୍ନ ଏଟିଏମକୁ ଯାଇ ଖୋଜାଖୋଜି କରିଥିଲେ ।
ଶେଷରେ ଥାନାଛକ ନିକଟରେ ଥିବା ଏକ୍ସିସ ବ୍ୟାଙ୍କ ଏଟିଏମରେ ଭାଷ୍କର ଟଙ୍କା ଉଠାଉଥିବା ସମୟରେ ସୁରକ୍ଷାକର୍ମୀ ଓ ସ୍ଥାନୀୟ ଲୋକେ ତାକୁ ଧରି ଉତ୍ତମ ମଧ୍ୟମ ଦେବା ସହ ପୋଲିସ୍ ଜିମାରେ ଦେଇଥିଲେ । ଭୋଗରାଇ ପୋଲିସ୍ ଭାଷ୍କରକୁ ଅଟକ ରଖି ପଚରାଉଚୁରା କରିବା ପରେ ଭାଷ୍କର ଏଟିଏମ୍ ଲୁଟ୍ କରୁଥିବା ମାନିଯାଇଥିଲା । ତେବେ ଷ୍ଟେଟ୍ ବ୍ୟାଙ୍କ୍ କର୍ତ୍ତୃପକ୍ଷଙ୍କ ତରଫରୁ ଲିଖିତ ଅଭିଯୋଗ ଆସିବା ପରେ ଭାଷ୍କରକୁ ଗିରଫ କରି କୋର୍ଟ ଚାଲାଣ କରାଯିବ ବୋଲି ଭୋଗରାଇ ଥାନାଧିକାରୀ ଶ୍ରୀବଲ୍ଲଭ ସାହୁ କହିଛନ୍ତି ।
